Read Tarao Naga MARK 3 Bible Online

MARK 3 - Tarao Naga bible

MARK 3

¹Amah in sinakok ah khatla luutsa, mahchunna akutthi mii khat rouam.

²Chunna amahta amilaalnatu sabat niah amahta amthrat umeta anngaak.

³Che akut thimiita ason, “Tingvaro.”

⁴Mahche anmah ankuungah asonei, “Sabat niah akthra tloh chunohleh thranoh tloh, chaanta kal chunohleh that i tlohphume tlohphunohme?” Chuta anmah in rimta amsei.

⁵Cheva amah in amlung inhaanga anmahta invella aneiche, anril antrangrella mii khata ason, “Nikutkha jamro.” Amah in ajampei, cheva akutkha thrasa.

⁶Pharisi in inthruhsei, che amahta khatloh a immaang umeta kak hanga Herodia eisoh intelsei.

⁷Jisu in aroieiso inruuijoua tuiiboomma sehjousei, che Kalili nata miitam in anjuih.

⁸Jerusalem nata Idumia Jordan araalnata, che Tair leh Sidon na miitam in amah in atlohthlou khata antheih a amah kuungah thlengsei.

⁹Che amah in aroita muli khat amahturel amichaang natu asonei, alamva mii tammalsei, chunohleva anmah in anlom usa;

¹⁰alamva amah in miitamta amthratei, chunna natna rii akna annaam in amahta palnatuta akuungah anlompei.

¹¹Che akseengnoh li akluut mii in Akpu ta anmuh in amah kuungah inriilla ongsei, “Nangi Ringpu Asa kupache.”

¹²Mahchunna miikuungah kamromnoh veta anmahta tranga asonei.

¹³Amah in muulla kalla, akdittal eita aongpei; che anmah in akuungah thlengsei.

¹⁴Amahsoh inruuipi jounatu, che trongraan mathlahnatu,

¹⁵che khousaar manom ancheknatu, akchek amnehvaa lii an amnatu mah somleinihta acharei,

¹⁶Pitar ta Simon tih akho an ong;

¹⁷Jebedi asa kupa Jems che Jems anao John amah in Boanerkes takho aong, mah chuvah kini inthlavaa asa kupa;

¹⁸Andriu, Philip, Bartholomi, Methiu, Thomas, Alphias asa kupa Jems, Thadias, Kana na Simon,

¹⁹che amahta akjuur Judas Iskariot isei. Che inna inlengsa;

²⁰mahchuche miitam in veikhat thlenglasei, chunna anmah in saa iinkho cheknohsei.

²¹Che amah taploikuungin mahchuta antheih inva anmah in ansuurnatu inthruhsei, alamva mii in antihpei, “Amah in anroua insengsa”

²²Che Jerusalem nata akthleng ringjih lulok eiin anson, “Amah atak i Biljebul soh inruuisa, che khousaar aklok akliia amah in khousaarta amnompei.”

²³Che anmahta akuungah aongeiche pandam malanna asonei, “Khatloh a seitan in seitanta amnomchek ume?

²⁴Kurung khat in paalta akroua injanoh a inthrek baak suukleva, amah innsuungkha paal cheknohtu.

²⁵Che innsuung khatin akroua injanoh a inthrek baak suukleva, amah innsuungkha paal cheknohtu.

²⁶Che Seitan in ataksaakta injanoh a inthrek baak suukleva amah in paal cheknoh, chuta amahtu achena thlengsa.

²⁷Chuta tukhat inkho akraang mii inna luut a, akraang mii khata matsah a makaangnoh avah amah apootchei sut cheknoh tuei, amkaangche aknua sut anchek umang.

²⁸“Atak a keiin nankuungah kisonchou; miisavaa anleh naamte mahche anmah in thranoh antrong anaamva in ipkirtu;

²⁹chuta tukhat in Li Akseengta thranoh indah a trongle, tiknikho in ipnohtu, chuta ache amnoh alehvaa amraal am”

³⁰Alamva anmah in ason, “Amah atak ah akseengnoh li amsa.”

³¹Che amah anuleh auh anao thlengsei; che apaalla ngirra anmah in mii mathlah a amahta amiong.

³²Che miitam in amahta lomma inbok a amsei; che anmah in akuungah anson, “Nangnu leh ninao eiin apaalla nakjonna amsei.”

³³Chunna amah in amsang, “Kei kinu mahche kiuh knaochu tuseime?”

³⁴Che akomma inlomma anbokeita invella anche asonei, “Kei kinu mahche kei kiuh kinaova onna amsei!

³⁵Tunangkhat Ringpu amdon aktloh miikha kei kinao, kisar mahche kinusei.”