Read Tarao Naga LUKE 10 Bible Online

LUKE 10 - Tarao Naga bible

LUKE 10

¹Mahchuche aknua Akpu in aktlei sopsrihta phom thunna ansehnasam khuupiirel mahche amun jikchah a anmahta mii innih innih a amthlah ei.

²Mahche Jisu in ankuunga asonei, “Lou luhnatuva tam am, chuta akluhtu miiva tamnoh; churella lou luhnatu thloutloh mii amthlahnatu lou Akpu kuunga ngenve.

³Nannih in sehve; anve, uiiramuii ankaar a sadamte nanga keiin nannihta kamthlah peichou.

⁴Skhao thong maruuinohve, thong mahche kehkhraang jakhatkho phurhnohve; che lamma tukhatkho mathruunnohve.

⁵Nannih in nanluutna inn khanna matsah a, ‘Mah innkhanna leh oi am veiso!’ ta sonve.

⁶Mahche ohkhanna leh oi vaa asa kupata amle, nannih leh oi kha anmah anchunga amtu; chuta amnohle, mahchu nankuunga inlengtu.

⁷Mah innkhanna nga amve, che anmah in nanimlankha saa inna amve, alamva thlou aktlohmii in amahtu atlohman phah i matikcha; inn inkhatnata inn inkhat a inlennohve.

⁸Nannih in khuupii khat a nanluutlai anmah in nannihta ja a nanilou eile, anmah in nanmaikunga nanidoonkha saave;

⁹mah khanna ak am mii kna ksaeita mathrat eive, che ankuunga sonve, ‘Ringpu vaa kurung huunna nankuunga innaisa.’

¹⁰Chuta nannih in khuupii khat a nanluutlai anmah inta nanijanoh a nanilounoh eile, lamkhanna seh a sonve,

¹¹Nannih khuupiina uphul kankeh a akmaarta nannihta naniandah veia kannuulpei; chuta nannih in mah i romve, mahchuta Ringpu vaa kurung huunna nankuunga innaisa.

¹²Keiin nankuunga kisonchou, mahni chunna mah khuupii chunga Sodom in ralla rilvolna veitu.”

¹³“O Khorijin, nangkuungva lahnasa ah! O Bethsaida, nangkuungva lahnasa a! alamva akchek amneh thlou nankuunga atlohkha Tair leh Sidon nah tlohleva, anmah in mahlaia bulaa puunrei mahche meivut a inbok a ril anthleng tupotta.

¹⁴Chuta pichaar atlohlai nannih nanchunga Tair leh Sidon in ralla rilvolna veitu.

¹⁵Mahche Kaparnaum nango, nangva ringram phah a nakdom ume? Nangta repnanga nakthlaktu.

¹⁶“Nannih nantrongta aktheih mii in kei kitrongta antheihpei, che nannihta nanijanoh mii khanna keita keijanohsei, che keita keijanoh miikhan keita kamthlah Akpu amahta janohsei.”

¹⁷Mii sopsrih khan roomthok a inlengsei, che anson, “Akpu, nang nikminga khousaar inkho kannih kanthlanga ammei!”

¹⁸Mahchunna Jisu in ankuunga asonei, “Khu inthla in marvaannata tlananga Seitan in tla kimuh.

¹⁹Anve, muruul mahche nachal anchunga nanchilhnatu khatkho nannih jeknaei antuuita nancheknatu keiin nannihta akchek amneh kamlanchou; che jakhat inkho nannihta nanimsok tlohnohtu.

²⁰Chuta oh inna nannih in roomthok tlohnohve, mah chuvah li in nanthlanga am, chuta nannih in roomthokve mah chuvah nannih nanming ringramma injih a amtusa.”

²¹Mah pungtal achunna Jisu in Li Akseenga aroomthok a ason, “Ringram khatkho thaleiva Akpu, Pa o, nangta kampaakche, alamva mah naamte i aksing mahche akloutheih ankuungnata mathup a nisihche nao ankuunga namdangpei; oi, Pa, alamva mah i nangin namdon malungsi thlouta veisa.

²²Bilam naamte Pa in keikuunga namsilpei, che Pa noh a Asa kupakha tumeta tukhat inkho romnoh ei, nohle Asa kupa noh a Pa ta tukhat inkho romnoh ei che Asa kupa in achar miikhan amahta amdangnatu relna.

²³“Mahche aroi ankuunga inheia inruk a asonei, nannih in nanmuhta akmuh eiva doi akphahsei!

²⁴Alamva keiin kitihchou, ringraan leh kurung eiin nannih in nanmuhta anmuhja, chuta muhnoh ei, mahche nannih in nantheihta antheihjahang, chuta theihnohsei.”

²⁵Mahche anve, ukil inkhat in inthoua Jisu ta chaang anna ason, “Lulok, ache amnoh ringna kphahnatu jangkitloh ume?”

²⁶Jisu in akuunga ason, “Trongsuura khatloh a injih a amme? Che katloh a nipaame?”

²⁷Amah in amsang, “Nangin Akpu Ringpu ta niril apumte, niruung ringna apumte, nikli apumte, mahche nimdon apumtea rilvolro, che nangin nanthringpita nitaknanga rilvol eiro.”

²⁸Mahchunna Jisu in akuunga ason, “Nangin khalmo chimma namsangpei khame, mahchu tlohro, che nangin ringuche.”

²⁹Chuta atak in akchim aveija hanga Jisu ta ason, “Keiin kinthringpi miichu tume?”

³⁰Jisu in amsang, “Mii inkhat in Jerusalem nata Jerikho phah a ajunglai, amah in inru inraan ankut a tlasa, amah apuunrei ansutche marat a akthi hoonga mah a sehsei.

³¹Pek mah laitalla reipakthra veia thiimpu inkhat in amah lamtongkhan ajunglai; amahta amuh in akomtonga peella sehsa.

³²Mahchunanga Levi na mii khat inkho amun achunna athlengin, amahta amuh, aktleitonga peella sehlasa.

³³Chuta Samaria na mii khat in rapkheitla asehlai amah amnatonga thlengsa amahta amuh in aringvol hangsa,

³⁴cheva amahkuunga thlenga asoknata thaoleh ngangli tuii poih a athlompei, cheva amah atak sachunga amchuungche miitlungna inn khat ah aphurhpei che thratea asihpei.

³⁵Mahche akhuvar a amah in baobeh dinari innih thlenna miitlungna inn akpu ta malanna ason, ‘Amahta thratea anna rou tlohro; che amah relna nangin baobeh namluut anaamte keiin veikhat kithlenglai kamlengkir uche.’

³⁶Anmah inthum ankaar a jaknangmii in inru inraan ankut ah aktlavaa anthringpi mii veime ta nangin nimdon sakhi khome?”

³⁷Amah in ason, “Amahta aringvol hanga rou aktloh miihkhasa.” Mahchunna Jisu in akuunga ason, “Nangin seh a mah khananga tlohro.”

³⁸Anmah in nga tloh a ansehlai, amah in khuu inkhat a luutsa; cheva akming Martha an ong kumei khat in Jisu ta lousoonga amah inna amthlungpei.

³⁹Amah anaokumei Meri an ong inkhat am, amah in Akpu akehkungah inbok a amah atrongta arungeih.

⁴⁰Chuta Martha in routloh a khalmo innoksa; amah in Jisu kuuga thlenga ason, “Akpu o, kei kikroua routloh inchek angta kinaoin keimah i thousanoh cheme? Keita kamjoomnatu amahta sonro.”

⁴¹Chuta Akpu in amsang, “Martha, Martha, nithlou tamrella inchoia lah sacheme;

⁴²thlou inkhatva darkaar. Amahkuung nata inlounoh tupot akthra chuumta amah in acharpei.”