Read Tarao Naga LUKE 13 Bible Online

LUKE 13 - Tarao Naga bible

LUKE 13

¹Chunna Pilat in Kalili na miita thii leh anmah in inthiimna pootsoh amipool relna Jisu kuunga aktong mii arou mahlaital khanna ammei.

²Chunna amah in amsangei, “Alamva nga tloh a anmah in klah knang anphah rella, Kalili na mii in Kalili a am annaamte chunga ralla alehchelsei ta namidonme?

³Keiin nannihta kitihchou, Mahchunoh, chuta nannih in nanril thlengnoh choule mahchunanga nannaamte maanguchou.

⁴Nohle Silom a am thaprel in mii somlei kiritta dolh a athat, anmah in Jerusalem a am mii anaamte chunga ralla thranoh tlohmii seita namidonme?

⁵Keiin kitihchou, Mahchunoh, chuta nannih in nanril thlengnoh chouleva mahchunanga nannaamte maanguchou.”

⁶Che mah pandam ita asonei, “Mii khat in ngangli billa alin thotthing inkhat am; okhanna amah in akrahjon athlengin akrah tuuknohsa.

⁷Chunna amah in nganglibil aktloh eita asonei, ‘Anve, mah kumthum asuung in keiin thotthing akrah akjon kthlengin, khalekkho tuuknoh ang. Tuk a loonve, leipii sul amvei i jarelname?’

⁸Chunna amahkuunga amsang, ‘Lulok, mah i mi inkumkho ammangso, keiin mah ita inhiilla kichohche haar thlakmangtang.

⁹Mah inta akthleng kumma akrah inrahle, thrasa roomthok nasa; chuta inrahnoh leva tukrosa.’ ”

¹⁰Ipek sabat nia sinakok inkhat a amah in amtheih ei.

¹¹Mahchunna kum somlei kirit thranoh li in atak a amma sol inkuuia inding cheknohluung kumei khat am.

¹²Mahchuta Jisu in amuh in amahta onga ason, “Kumeio, nitakna aksolkhanna nangta nakmahpei.”

¹³Amah achunga akut asih in kak hanga atakkha indingkengsa, cheva ringpu ta ampaakpei.

¹⁴Chuta sinakok akpuui in amahta antheihnohsa, alamva sabat nia Jisu in akna amthrat, “Thlou tlohnatu nijan kuruk am; mahni chunna thlenga akna mathratro, chuta sabat nia tlohnohro.”

¹⁵Chunna Akpu in akuunga amsang, “Akthra veisin eio, siilkonna khit a nansih siilchal nohle samongta sabat nia majak a tui maiinnatu nankainohme?

¹⁶Abraham va asakumei akvei, kum somlei kirit seitan in suura asih kumeita sabat nia amthlah nohme?”

¹⁷Che maita ason, amah anjetta akjak amphah ei; che paarthratna thlou amah in atlohkhanna mii naamte in anroomthoksei.

¹⁸Churella amah in asonei, “Ringram kurung huunnakha jaknangjim meio? Che mahchu jaknngsoh imlak ume?

¹⁹Mah i mii inkhat in amah thakbilla avorh intrammu inkhat nangsa; chuuna intrammu in moonga thingnanga inrolsa, mah chuvah marvaanna va in abaak a anbu antlohpei.”

²⁰Veikhatla asonei, “Ringram kurung huunnakha keiin jaknangsoh kamlak ume?

²¹Mahchuva, kumei inkhat in jaam olna chaang inthumma, anaamteta chol an olnohmiil akmot khanangsa.”

²²Amah in khuuboom khuuboomma, khuu khuua mahche Jerusalem a mii eita amtheihnatu thlengsa.

²³Chunna tunangkhat in amahkuunga ason, “Akpu, inkal akphah eikha mii steru tueime?” Mahchun ankuunga asonei,

²⁴“Ansiik thonga luutnatu kalthi tlohve; alamva keiin kisonchou, miitam in mah khanna anluutnatu anjontu chuta cheknoh tuei.

²⁵Innpuin inthloua innkhaar akhaarche nannih in apaalla ngirra inkhaarta chumma nantihtu ‘Akpu, innkhaar kanimhoongro,’ amah in nanimsangtu, ‘Ramnata thlengchoume keiin naniromnoh ang.’

²⁶Mahlai nannih in son namithrontu, ‘Kannih in nangsoh kansaak kan iinjou, che nangin kannih kanlam kanlam a namtheih ung.’

²⁷Chuta amah in nanisontu, ‘Keiin nannihta kisonchou, ramnata thlengchoume keiin nannihta naniromnoh ang; thranohthlou aktloh naamte eio, kei kuungnata amnohve!’

²⁸Nannih in Ringpu vaa kurung huunna a Abraham, Aisaak, Jakop mahche ringraan annaamteta nanmuhlai ohkhanna nanha maket a traptruui uchou.

²⁹Che mii in kulkung kulrel nata khatkho akhu akhinata thlenga Ringpu vaa kurung huunna tebor a inbokjou tuei.

³⁰Mahche anve, matsah miikhan juktooltu che juktool miikhan matsahtu.”

³¹Mah pungtal achunna Pharisi in thlenga akuunga asonpei, “Onnata sehrosa amnohrosa, alamva, Herot in nakthatsampei.”

³²Chunna anmahta asonei, “Nannih in seh choulaia uiiramuiita sonve, ‘Anve, keiin khousaarta kamnomei che akna eikho kamthrat ei, che nithum tihpia keiin kitlohtuphu kithlou kamche usa.

³³Chuta mi inkho, tungvakho, tuibahkho keiin sehtu tlasang; alamva Jerusalem nata ringraan inkhaluungtkho maangva veinohtu.’

³⁴Nannih nankuunga kamthlah ringraan eita akthat mahche lunga akden Jerusalem o! Jerusalem o! Aarpui in ateta amthlanuuia a oh nanga keiin nisata jikcha injomma ki oh umangme, chuta nannih in indahschou,

³⁵Anve, nannih nan innta nanmahpei. Che keiin kisonchou, ‘Akpu minga akthleng amahkha doiphah veisa ta nansonnohmiil keita keimuhnoh usachou!’ ”