Read Tarao Naga LUKE 16 Bible Online

LUKE 16 - Tarao Naga bible

LUKE 16

¹Amah in aroi ankuung akho ason ei, “Thlousil thlou marella aksih kdoon mii khat am, thlousil thloumarel mii khanna nang nipoot nicheita apupu akanana amnoh veia ahuuinapei ta akdoon kuungkhanna anlonpei.

²Chunna amahta onga ason, ‘Nangrella keiin kitheih i khame? Nangin thlousil thlou marella namluut akpul hisab kamlanro, alamva nangin veikhat inlenga thlousil thloumarel veicheknoh usache.’

³Cheva thlousil thloumarel in arilsuunga ason, ‘Kei Akpu in thlousil thloumarel phomnata keilousale, keiva khavei usangme? Keiin tuklei kichohna tukho trangnohsang, che doh a kisaakna tukho injaksang.

⁴Kei kiril kamngirhpei mah chuvah kei Akpu in thlousil thloumarel phomnata keiloule, mii inva keita anmah an inna keiloukho ajaei.’

⁵Cheva amah akpu vaa lal antoleita khatkhat a onga, matsahna miita arui, ‘Nangin kei akpu alalta jikcha intoolchme?’

⁶Amah in amsang, ‘Thao olna chaang reija.’ Amahkuunga ason, ‘Nangin hisab majih a nisihna nirikha louro, che intha inbok a sopnga majihro.’

⁷Mahchuche aktlei khatta arui, ‘Nangin jikcha intoolcheme?’ Amah in amsang, ‘Kihu olna chaang reija.’ Amahkuunga son, ‘Nangin hisab majih a nisihna nirikha louro, che soprit majihro.’

⁸Trongson majuihnoh thlousil thloumarel in ksinga thlou atlohrella amah akpu in ampaakpei; alamva akvaarvaa ansachunga tukleiramna ansa in anmah anmahtu ringnatluun turel tlohkhallah ralla singei.

⁹Keiin kisonchou, chimnohlal turella nantak nantaktu ruul linve, mahkha acheni avah anmah in nannihta ache amnoh a amna amunna naniloonna turelna.”

¹⁰“Thlou akirrua malot aja mii in thlou inrolpa akho malot aja uning; mahchuche akirrua son majuihnoh mii khanna inrolpa akho son majuihnoh veitu.

¹¹Chuleva akchimnoh lal luungakho malotphu veinoh choule, khatloh a akchim lalla nannihta thlou nanimsil ume?

¹²Aktlei miita ah malotphu veinoh chlouleva, khatloh a nang nita luungakho mii in thlou namsil tueime?

¹³Roijuih tukhat inkho akpu innihvaa routloh cheknohtu, alamva inkhatta intirh a inkhatta aringvoltu, nohle inkhattingva aril maluut a inkhattingva maluutnohtu. Nannih in Ringpu mahche lalta routloh cheknoh uchou.”

¹⁴Baobeh akditrang Pharisi ei in, mahchuta antheih lai, amahta antheihnohsei.

¹⁵Chuta ankuunga asonei, “Nantak invah miimai kuunga akchim veisungta namimuhpei, chuta Ringpu in nanril arom; alamva miikaara inkaanga indom veikha Ringpu mit an avah intirhsana vei.

¹⁶“Trongsuur leh ringraan in John amlai phah a ammei; mahlai khannata Ringpu kurung huunnavaa akthra trongta anraanpei, che mii naamtein mah khanna kalthi suuk a luutei.

¹⁷Chuta trongsuur nata tikta ansun inkhat ansoi chungva ringram leh thalei amaang in ralla laitu.

¹⁸“Tunangkhat in amah akmeita inthrekpia aktlei inkhatta loule, amah in kumei kupa inlaalthlou atlohpei, che amsal in amdah kumeita aklou amah inkho kumei kupa inlalthlou atlohpei.”

¹⁹“Akdoon mii khat louam, amah in bukal amchu puunleh bulapuun silh a anirel roomthok tlanna saa iinna paal.

²⁰Che atak pumte paan akming Lajaras an ong inran kupakhat amah kolol a ansih,

²¹Akdoon kupa vaa tebornata aktla aktli saakphukhan avon amvahjahang; mahchu chunga uii inkho thlenga amah apaannata amileiakho amiliik.

²²Anran miikha thisa, che ringroi in amahta Abraham aklaak a anphurhpei. Akdoon miikho thisa che anphuumpei;

²³cheva amah in thikhua aleluunga klah a amsa, amah in inlahnata intoua a an in, Abraham khatkho amah aklaak a am Lajaras ta amuhpei.

²⁴Chunna amah in onga, ‘Pa Abraham, keita niril kamvolroba, che Lajaras akutmajunga tuii phuumma kikdang chaar kamleita amchornatu amahta keininga mathlahroba; alamva keiin meiboom inna aleh a klah a kdoupei.’

²⁵Chuta Abraham in ason, ‘Nangin niringlaia niphahtuphu anaam niphahpei mahkha intheihro, che mahchunanga Lajaras inkho thranoh tlannoh jikcha aktuukpei; chuta pekva amah in onna diltlanna amsa, che nangva alehluunga klah a amsa che.

²⁶Mah naamte i chungakho, kannih leh nannih nankaar a tunangkhat inkho van ancheknoh natu asonna amnoh a adongna amnoh aku inrolkhat incheknoh a am.’

²⁷Amah in ason, ‘Chuleva pa o, amahta keipa inna namthlahnatu kamthruunche,

²⁸alamva kei unao ranga ammei, anmah inkho onna alehluunga lahna amun in anthlengnoh natu anmahta chaak a son eiso.’

²⁹Chuta Abraham in ason, ‘Anmah kuunga Moses mahche ringraan amsei; anmah antrongta rungai eiso.’

³⁰Che amah in asonla, ‘Nganoh nganoh, pa Abraham; chuta tunangkhat akthi kaarnata anmah ankuunga thlengeile, anmah anril anthlengtu.’

³¹Amahkuunga ason, ‘Anmah inta Moses mahche ringraan antrongta rungainoh eile, akthi kaarnata ringa ankuunga thleng seilakho anmah in tikni akho anril thlengnoh tuei.’ ”