Read Tarao Naga LUKE 19 Bible Online

LUKE 19 - Tarao Naga bible

LUKE 19

²Mahchunna akming Jakhaias an ong kupakhat am; amahva akthloi roithrai mii, che kdoon mii.

³Che amah in Jisu tumeta a annatu insuul, chuta mii tammal khanna muh cheknohsa, alamva amahvah arep innim.

⁴Chuna amah in Jisu ta amuhnatu tatthei achunga kalsa; alamva mahlam tonga Jisu in thlengsam.

⁵Che Jisu in mahtonga athlenglai, amahta intoua anche ason, “Jakhias, intha a trumro; alamva mi invah nang inna tlungtu tlasang.”

⁶Chunna amah in intha trumma Jisu ta roomthok a aloulohpei.

⁷Cheva mahchuta anmuh in annaam insoa trongsei, “Amah in alehchel inna rapkheikhat veia atlungnatu luutsa.”

⁸Chunna Jakhias in inthoua Akpu kuunga ason, “Anro, Akpu, keiin kdoon tangkhaiva anrankuunga kamlanei, che keiin tunangkhat antata chimnoh a louangle saruk manli kamlengei.”

⁹Mahchunna Jisu in akuunga ason, “Mi in mah innsung inna chaanring thlengsa, amakho Abraham vaa asa kupasa.

¹⁰Alamva miiva Asa kupa in akmaang khata jonnatu mahche kalnatu thlengsa.”

¹¹Anmah in trong ita anrungeihlai, anmah kuunga pandam khat asonei, alamva amah in Jerusalem innaisa, mahche Ringpu vaa kurung huunna kak hanga indang usata anmah in amidon

¹²Alamchunna amah in ason, “Phom inkaanga akpuui inkhat in kurungram aphahnatu khalmo ramlah ramboom inkhat a asehche, inlengsa.

¹³Amah roijuih somta aongche, ankuunga mina som malanna asonei, ‘Keiin kithleng nohmiil mah mina in malat a thrulhnave.’

¹⁴Amah aramna mii in amahta intirh eia amah aknua trongphurhmii mathlah a anson, ‘Mahmii in kanchunga akpu veia paal dinoh ung.’

¹⁵Amah in kurungramta aphahche inna anlengin, anmah in malat a anthrulnakha jikcha amichuung peime anromnatu, inbaobeh amlanna mii eita amahkuunga anthlengnatu am ongpei.

¹⁶Matsahna in amaikuunga ason, ‘Akpu, nang mina inkhat khanna mina som kamchuungpei’

¹⁷chunna amah in akuunga ason, ‘Thra nitlohpei, akthra roijuih! Nangin thlou indihte a malot aja niveirella, khuuboom somchunga akchek amneh veirosa.’

¹⁸Innih tihpi in thlenga ason, ‘Akpu, nang mina khanna mina ranga kamchuungpei.’

¹⁹Che amah in akuunga ason, ‘Nangin khuuboom ranga chunga akchek amneh veirosa.’

²⁰Che aktleikhan thlenga ason, ‘Akpu, nang minakha maisa, keipuun apaara khit a kisih;

²¹alamva nangva karaang mii che, churella nangta niktrih ang; nangin nisihnoh pootta niloh, che nangin nivorhnoh pootta niluh.’

²²Amah in akuunga ason, ‘Nang nibaoa anthrutal khanna keiin kamlaal uche, thranoh roijuih! Keiin kisihnoh khata kiloh mahche keiin kivorhnoh khata kiluh ta nangin nirompei?

²³Chuleva jarella kei baobehkha baobeh sihna thlaamma sinoh cheme, keiin kithlenglai mahkha akchuungsoh inruuia kamtlon uta.’

²⁴Chunna akomma akngir eita asonei, ‘Amahkuunga mina somkha loua mina som ak amkuunga malanve.’

²⁵(Chuta amahkuunga anson, ‘Akpu, amahta mina som amchesa!’)

²⁶‘Alamva keiin nankuunga kitihchou, mah chuvah ak am mii kuungah ralla kamlantu, chuta ak amnoh mii kuungnata amah in ste asihkhakho kilohtu.

²⁷Keiin anmah anchunga akpu veia kipaallaia keijekna eita onna keithlenve che anmahta kei maikuunga that eive.’ ”

²⁸Chunna amah in trongi asonche aknua, matsah a seh a Jerusalem phah a hangsa.

²⁹Amah in Chorophol Muulsoh innaia am Bethphake mahche Bethani annai in, aroi ankaarna innihta sonna amthlah ei.

³⁰“Nanmaa a am khuusonna sehve, che nannih in mahchunna naluutlai tukhat inkho achuungnanoh samong ate inkhat inkhit a am nantuuktu, mahkha majak a onna thlenve.

³¹Che anmah in mai jarelna namijakmeta nanirui eile, nga tloh a sonve, ‘Akpu in maita darkaar am.’ ”

³²Chunna amah in amthlah mii in seh a Jisu in ankuunga asonnanga antuukpei.

³³Che anmah in samong ateta amijaklai, samong akpu in ankuunga asonei, “Jarelna nannih in samong ateta namijakme?”

³⁴Chunna anmah in anson, “Akpu in maita darkaar am.”

³⁵Che mahchuta Jisu kuunga anthlenpei, samong atechunga anmah anpuun thah a Jisu ta amichuungpei.

³⁶Amah in chuunga aseh in, anmah anpuunrei lamma anlouthah.

³⁷Pekva amah in akchek amneh a atlohthlouta anmuh in rool inkaanga onga Ringpu ta mapaak amithronpei,

³⁸“Akpu minga akthleng kurungkha doiphah veisa! Ringramma leh oi khatkho anaamtetu ralla ankaanga mapaak!”

³⁹Che miitam ankaar a Pharisi arouin amahta anson, “Lulok, niroita saaleiro.”

⁴⁰Anmahta amsangei, “Keiin nankuunga kitihchou, anmah inta rim amseile, lungin ongusei.”

⁴¹Jisu in Jerusalem annai in khuupiita heianna mahchurel trap a ason.

⁴²“Nangin mi in nangtal in leh oi niveirel thloukha romcheleva! Chuta ipekva nimit annata mahchu inthup a ammang.

⁴³Alamva nichunga oinang aknichu thlengtu, mah chuvah nang jekna mii in nangta kooi a paaltuei, che nangta inhiilla aram ramna mii naamte in nangta nankhaartu,

⁴⁴Cheva nangleh nang nisa naamteta tukleia antuul usa. Che nangva asuunga lung inkhat in inkhatva achunga anmah in sinoh usei; alamva nangta nak an kithlenglai romnohche.”

⁴⁵Cheva amah in mathruunna thlaamma luut a, pootchei akjuurmii eita manom mathronna,

⁴⁶asonei, “Mah i injihsa, keiinvah ngenna inn veitu, chuta nannih in mahchu inru inraanva akon namiveipei.”

⁴⁷Amah in mathruunna thlaammma aknirel amtheih ei. Akthloi thiimpuei, ringjih lulok ei che aklokmii ei in amahta mamaangnatu anjon; chuta anmah in antlohja antlohnatu amahta anjonta tuuk cheknohsei,

⁴⁸chuta anmah in antlohja hangkha antlohnatu tuuknoh ei, alamva mii naamtein amah atrongkhanna inbeisei.