Read Tarao Naga LUKE 20 Bible Online

LUKE 20 - Tarao Naga bible

LUKE 20

¹Nikhatnia, amah in mathruunna thlaamma miita Akthra Trong matheih a che raanna amlai, akthloi thiimpu leh ringjih lulok khatkho anparuul ei in akuunga thlenga,

²amahta anson, “Kannih kankuunga kanisonro, nangin jaknang nichek namneh amma mah thlouei i nitlohme? Nohle mah akchek amneh thloui tunang in nangkuunga amlanme?”

³Amah in ankuunga amsangei, “Keikho nankuunga trongkhat naniruitang: pek keisonve,

⁴John in alupkha ringram tingname chunohle mii tingname?”

⁵Che anmahseeng seeng intella insonsei, “Inih in ‘Ringram tingna,’ ta sonmele, ‘Chuleva jarella amahta malotnoh choume?’ initihtu.

⁶Chela inih in ‘Mii tingna’ ta sonmele, mii naamtein inihta lung inidentu; alamva anmah in John ta ringraan inkhatta anloh.”

⁷Chunna anmah in mah i ramname romnoh ungta amisangpei.

⁸Mahchunna Jisu in ankuunga asonei, “Mah akchek amneh thlouei i jarelna kitlohme keiin nankuunga nanison nohtung.”

⁹Mah pandam ita mii kuungah son amthronpei: “Mii khat in nganglibil inkhat atloh, che mahchu lampaar aksaa ankuunga amsil, che amah in khuuboom khat a seh a khalmo soot a amsa.

¹⁰Che nganglirah luhnatu laikha athlengin, nganglirah ste anloupeknatu lampaar aksaa ankuunga amah roijuih inkhatta amthlah; chuta lampaar aksaa thloutloh in amahta khonna aruuk a amilengpei.

¹¹Chela amah in aktlei roijuih inkhatta veikhat amthlahla, amahlakho loukhonna khalmo usitnoh a aruuk a amilenglapei.

¹²Chelakho amah in inthumtihpi veia amah roijuih khat amthlahla; mahmii chuta khonraanna apaaltinga anlonpei.

¹³Cheva nganglibil akpu in ason, ‘Keiin mah i kha kitloh usa? Keiin kirilvol kisa kupata mathlahtang, amahta anmah in injah tuei.’

¹⁴Chuta nganglibil lampaar Aksaa thloutloh ei in amahta anmuh in, khatleh khat intella insonsei, ‘Mahmii i pipasa; amahta thatrei, chuche amah in aphah tuphukha inihta imveinatu.’

¹⁵Cheva amahta nganglibil apaalla that a anlonpei. Chuleva nganglibil akpu in anmahta kha atloh tueime?

¹⁶Amah in thlenga nganglibil lampaarsa thloutloh eita ammaang tuei, che ngangli bilta aktlei mii kuungah amlantu.” Mahchuta antheih in antihpei, “Ringpu in janohtu!”

¹⁷Chuta anmahta anna asonei, “Chuleva mah injih i jarelname: ‘Inntloh mii in andahtal lungta innkiingtu amuvei hukvei nohme?’

¹⁸Tungangkhat in mah lungchung khanna anloom miirelta akir kir a koituei; chuta mah in tunangkhat achunga inloomle amahta amvuitui.”

¹⁹Mah pungtal chunna ringjih lulok che akthloi thiimpu ei in amahta ansuurnatu insuulsei, chuta anmah in miita trihsei; alamva anmahta indah a mah pandam i ankuunga asonpeita anmah in anrompei.

²⁰Chunna anmah in amahta anruungpei, che ril akseeng veisin, inruk a aksuimii eita amithlahpei, mah chuvah amahta ruunga atronga suura pichaar aktloh akhal mahche rampuui ankuunga thlenna amilannatu.

²¹Amahta anrui, “Lulok, kannih in kanrom, mah chuvah nangin chimma trongche mahche chimma namtheih ung, nangva keimii miimii annohche, chuta Ringpu alamta chimm namtheih.

²²Kannih in Keisaar kuunga roithaangi trongsuur in ajame chunoh a janohme?”

²³Chuta amah atronga anromnatu antrong khanna amah in arompeia, ankuunga asonei,

²⁴“Baobe apumkhat kammuhve. Mah achunga injih i tume?” Anmah in anson, “Keisaar.”

²⁵Amah in ankuunga asonnei, “Chuleva, Keisaar ta veile Keisaar kuunga malanve, mahche Ringpu ta veile Ringpu kuunga malanve.”

²⁶Amah in asontrong khanna miimai kuunga amahta suur cheknohsei; chuta amah in amsangtrong khanna salungkhou seia rimta amsei.

²⁷Veikhat kiring tih i amnohta akson Sadukiis ste in amahkuung thlenga trong anrui,

²⁸“Lulok, Moses in kannih turella amjihvah miikhatva auh anao inkhat in kumei alohche asa amnoh a thileva, amah auh anao turella adhara amnatu auh anaokhan akmei veia alohtutla.

²⁹Pek auh anao sirih ammei; anparem in kumei alohche asa amnoh a thisa;

³⁰innih tihpi inkho che inthumtihpi inkho anmei veia anlohpei,

³¹mah chunanga sirih tihpi phah amahta anlohche ansa amnoh a thisei.

³²Aknuremma kumeikho thisa.

³³Alamchunna veikhat kiring athlenglaiva kumeikha anmah ankaar a tunang akmei vei ume? Alamva anmah sirih in amahta anlohpei.”

³⁴Chunna Jisu in ankuunga asonei, “Mah chupna asa ei in changvaangei che chang mavaanga inpe ei;

³⁵chuta kthinata veikhat kiringkha phahnatu matikcha ta antenche anmahva changvaangnoh tuei chekho chang mavaanga inpenoh tuei,

³⁶alamva anmahva veikhat inlenga thinoh usei, jarelna tihva anmahva ringroisoh intrim usei che veikhat akring khavaa asa vei taningeiva anmahva Ringpu asa veiusei.

³⁷Mah chuvah Moses inkho Akpu ta Abraham, Aisaak leh Jakop vaa Ringpu ta aonglai akthi mii kiringsei, mah i inchaam kaarna thaminna ataktal in seenga amdangpei.

³⁸Pek amahvah akthiva Ringpu noh, chuta akringva Ringpu; alamva mii naamte amahkuunga ringsei.”

³⁹Ringjih lulok ste in amisang, “Lulok, nangin thratea nisonpei.”

⁴⁰Alamva anmah in veikhat inlenga karaanga akuunga trong jakhatkho ruinohsei.

⁴¹Chuta anmah ankuunga asonei, “Khrista i Devit va asa kupata anmah in khatloh a ansonme?

⁴²Alamva Devit ataktal in Leila nirik a ason, ‘Akpu in kei Akpu kuunga ason,

⁴³nang jeknaeita nikehchuunna kamveinohmiil, kei kikchanga inbokro.’

⁴⁴Nga tloh a Devit in amahta Akpu a ong; chuleva khatloh a amah in asa vei ume?”

⁴⁵Amah atrongta miinaam in arungeih laia aroi ankuung asonei,

⁴⁶“Ansuul puunrei silh a inloi akdi mahche keithiil keithiilla mii in kamthruun eisota akdi chuche sinakok a akthrarem inbokna a inbok khatkho buhdoonna a mii in jnjahna vei ringjih lulok eikhata cheksilve,

⁴⁷anmah in trulmeinu an innta amiruk mahche khalmo soot a akngen veisinnei. Anmah in ralla anrol maraal aphahtu.”