Read Tarao Naga LUKE 23 Bible Online

LUKE 23 - Tarao Naga bible

LUKE 23

¹Cheva anmah naamte in inthloua, Jisu ta Pilat kuunga anphurhpei.

²Amahta maraal mathlaak mathronna anson, “Mahmii in inih jaatboomta amahnoh lamma inhea amseh, che Keisaar tinga roithaang malan athing, chela ataksaak in keiva Khrista kurung angta ason.”

³Mahchunna Pilat in amahta arui, “Nangi Judi ei kurung cheme?” Chunna Jisu in amahkuunga amsang, “Nangin nisonre peio.”

⁴Che Pilat in akthloi thiimpu leh miitam ankuunga asonei, “Mahmii i keiin amraal jakhatkho tuuknoh ang khame.”

⁵Chuta anmah in tranga tak a anson, “Amah in miita akrok, Kalili nata maiphah a che Judia apumte luunga miita matheih a hou amsuuk.”

⁶Pilat in mahchuta atheih in, mahmii i Kalili na mii meta aruiei.

⁷Chunna Jisu vah Herot in apaalna athlanga am miita Pilat in arom inva, mahlaia Herot atakkho Jerusalem a amtaningva, Jisu ta amahkuunga amthlahpei.

⁸Herot in Jisu ta amuhlai khalmo aroomthoksa, alamva amah in Jisu ta amuhjana khalmo sootsa, jarelna tihva amah athlou rella atheihpei, che Jisu in salungkhouna daang atlohta amuhja a am.

⁹Nga tloh a Jisu ta trong khalmo arui; chuta amah in masangnohsa.

¹⁰Akthloi thiimpu mahche ringjih lulok eiin amahta khalmo malaal a lonna ngirei.

¹¹Che Herot in amah raalmiisoh Jisu ta mananga aminuihpei; mahchuche amahta annaal puunreia maliinga, Pilat kuunga amilengpei.

¹²Mahlaital achunna Herot leh Pilat vah inkhatveia ruul veisei, alamva matsah avah khatleh khat jekna veia ammei.

¹³Cheva Pilat in akthloi thiimpuei, thloupuuiei, mahche mii eita ongjoua,

¹⁴anmahta asonei, “Miita amahnoh lamma akchingmii nantihche keikuunga nanthlenpei; keiin amahta nanmaikunga minna suia kianche, anve, nannih in mahmii ita lonna trongchou i keiva amah amaraal tuuknoh ang;

¹⁵Herot inkho amah amaraal tuuknoh, chunna amahta inihkuunga amthlahlapei. Anve, amahta thatnatu matikcha amaraal jakhatkho amnoh.

¹⁶Alamchunna amahta kikchaakche kamthlahtu.”

¹⁷Khuldoon ujou hoongna aknia Pilat in anmah turel mii inkhatta amthlahtu tla.

¹⁸Chuta annaamte in khalek veia ongjousei, “Mahmii i that a, kannih turella Barabbas ta mathlahro.”

¹⁹Amah khuuboomma hou amsuuk che mii athatrelna simma inthunning.

²⁰Pilat in Jisu ta amthlahja hanga ankuunga veikhatla asonei;

²¹chuta anmah in ong onga “Amahta mathluro, amahta mathluro!” ta onga ansonpei.

²²Che amah in veithum tihpi ankuunga asonei, “Jarelname, amah in jaknang thranohthlou atlohpeime? Amahta thatnatu matikcha maraal jakhatkho keiin tuuknoh ang khame; alamchunna amahta kikchaakche kamthlahtu.”

²³Chuta anmah in tranga tak a, rool inkaanga onga amahta imthlutupot ta annihpei. Anmah anhouin achekpei.

²⁴Cheva anmah in annih nujuih a Jisu ta thatnatu ajapei.

²⁵Anmah in annih nujuih a trong amsuuk khatkho miithat rella simma anthun miita amthlahpei; chuta anmah in amidon nujuih a antlohnatu Jisu ta ankuunga amlanpei.

²⁶Cheva nga tloh a anmah in Jisu ta anphurhlai, Sairini na mii khat akming Simon khuuboom nata akthleng amahkuunga thingkharhta amiphurhpei, che amahta Jisu aknua amisehpei.

²⁷Miitam in amah aknuta anjuih, anmah ankaar a kumei arouin amahturel anlukhe beenga sinthruuiei.

²⁸Chuta Jisu in anmahta inheia asonei, “Jerusalem asakumei eio, keiturel trapnohve, chuta nannih nantakturel khatkho nansaturel trapve.

²⁹Alamva anve, ‘Nao akpoknoh khung mahche naophomma nao amnohluung khatkho naochuh am innohluung eikha doiphah veisei!’ ta ansonna aknikha thlengsa.

³⁰Mahchuche muulpiita, ‘Muul nannih in kantakchunga tlave’; che rapthingta, ‘Rapthing nannih in kannihta kanibahve’ ta anmah in son amithron usa.

³¹Alamva thing an emlai mainang ita tlohseile, achaarlaiva khavei ume?”

³²Amaraal am aktlei mii innihkho Jisu soh thatjounatu anphurhpei.

³³Kangruh Amun antihkhanna anmah in anthlenglai, ohkhanna Jisu ta amithlupei, che anmaraal am innihta inkhat in amah akchangtonga mahche inkhat in akveitonga amithlupei.

³⁴Mahchunna Jisu in ason, “Pa o, anmahta ip eiro; alamva anmah in jangthlouta kantlohme antak in romnoh ei.” Che amah puunreita ankaar a insemnatu reipak chaang in ansei.

³⁵Ohkhanna akngir in anna ammei; chuta Judi akchingei in amahta manuih a anson, “Amah in mii aktleiva akalpa; mahmii i Ringpu in achar Khrista chu veile atak anroua inkalso!”

³⁶Raalmii inkho thlenga ngangli tui akthuurta amahkuunga malanna,

³⁷amahta anson, “Nangin Judi kurung chele, nikroua inkalro!”

³⁸Amah akangchunga, “Mah i Judi ei Kurung” ta injih a am.

³⁹Thingkharh a anthoi anmaraal am ankaarna inkhat in Jisu ta manuih a ason, “Nangva Khrista noh cheme? Nikroua inkalro che kannihkho kanikalro khame!”

⁴⁰Chuta aktlei inkhat in amahta saalla ason, “Nangin Ringpu ta trihnoh cheme, nangva niphahtuphu nimaraal talta niphahpei ta romnoh cheme?

⁴¹Inihva iphahtuphu taksa, alamva inihva itlohkhaanta matikcha a iphahpei, chuta amah kupa ivah chimnoh jakhatkho tlohnoh.”

⁴²Chunna amah in Jisu ta ason, “Jisu, nang kurung huunna a nithlenglai keita kantheihrono.”

⁴³Mahchun Jisu in akuunga ason, “Tak a keiin nikuunga kisonche, mi in nangta keisoh inruuia Paradais a amjou ume.”

⁴⁴Mahchu ipek pung kurukvak tlasa, che ram apumte pungku phah a inthimsa,

⁴⁵kini in anthimlai; mathruunna thlaam a anjaarpuun innih suuk a inthritsa.

⁴⁶Cheva Jisu in rool inkaanga onga ason, “Pa o, kei kikli nikut a kamsil peiche!” Mahchuta asonche akphuk achena veisa.

⁴⁷Pek raalmii reija akpu in mah aksuuk chuta amuh in, amah in Ringpu ta mapaak a ason, “Tak a amahvah amaraal amnoh miirea!”

⁴⁸Mah aksuuk khata an annatu anboom mii naamte in, ohkhata anmuh in, anlukhe beeng beenga an inna inlengsei.

⁴⁹Amahta akrom annaamte in che Kalili nata amah aknujuih kumei ei in saraalla ngirra aksuuk khata anna amsei.

⁵⁰Ipek Judia ah Arimathia khuupiina akming Joseph an ong mii khat am. Amahva jama ankaarna inkhat, kthramii che akchimlamseh mii,

⁵¹amahva anmah in amidonta che antloh thlouta jathlaang thlaang miinoh, mahche amahva Ringpu vah kurung huunna loungaak a am mii.

⁵²Amah kupa in Pilat kuunga seh a Jisu aruungta anih.

⁵³Chunna Jisu aruungta mathrumma innaal pitlangpuun inkhat a aklepche, tukhatkho anlousih nohna lungppiita viit a anseem rusuunna asihpei.

⁵⁴Mahkha thlouraang antlohni akni veisa, che sabat amthronni tumnasa.

⁵⁵Kalili nata Jisu aknujuih a akthleng kumei in Joseph ta juih a rusuunta che Jisu aruungta khatloh a ansihme ta a an;

⁵⁶Cheva anmah in inlenga amrimtui pootleh inteina thao thlouraang antlohpei. Mahche trongthuun in ason nujuih a sabat nia anmah in inngaisei.