Read Tarao Naga LUKE 6 Bible Online

LUKE 6 - Tarao Naga bible

LUKE 6

¹Nga tloh a sabatni inkhat a Jisu in loulaia asehlai, Jisu aroi in niim akrah abomta rit a ankut a chut a ansaak.

²Chuta Pharisi arouin anson, “Sabat nia trongsuur in ajanoh tlohphunoh thlou nannih in jarella nantlohme?”

³Jisu in amsangei, “Devit khatkho amah in anruuipi mii in antraamlai jangantlohme tihkha nannih in paanohchoume:

⁴mah chuvah amah in Ringpu mathruunna thlaamma khatloh a luutme mahche thiimpu noh a saa janoh amimuhna tolta amah in khatloh a loua asaakme, che amahsoh anruuipi miita khatloh a amlanme ta nannih in paanohchoume?”

⁵Mahche ankuunga asonei, “Miivaa Asa kupa in Sabat niva Akpu sa.”

⁶Chunna aktlei sabatni inkhat a nga tloh a suuksa, Jisu in sinakok inkhat a thlenga amtheih ei, mahchunna akut akchangtong kthi mii khat am.

⁷Ringjih lulok leh Pharisi ei in Jisu amraal tuuknatu sabat nia akna amthrat umeta ruunga an anpei.

⁸Chuta Jisu in anmah anrilla amidonchuta aromma, akut inkhattong akthi kupakuunga ason, “Inthoua varo, che onna ngirro.”

⁹Cheva Jisu in ankuunga asonei, “Keiin nannihta nanirui tangchou, sabat nia akthra tloh nohle thranoh tloh, miipunsi kal nohle mamaang i trongsuura tlohphume chunoh a tlohphunohme?”

¹⁰Anmahta invella a aneiche asonei, “Nikutkha jamro.” Machunna akutta ajam inva thrasa.

¹¹Chuta anmah amilung inhaanga Jisu ta kha itloh umeta anmah in khatleh khat trongsei.

¹² Mahlai achunna Jisu in muulla angennatu kalsa; mahche khulouhthlang Ringpu ting ngenna amsa.

¹³Kini avaar in, aroita akuunga aongei, mahche anmah somlei innihta achar ei che anmahta raangroi tih a anming athunnei.

¹⁴Anmahchuva, akming Pitar kho an ong Simon mahche anao Andriu, Jems khatkho John, Philip che Bartholomeu,

¹⁵Methiu che Thomas, Alphia asa kupa Jems che Jilot an ong Simon,

¹⁶Jems asa kupa Judas che Jisu ta indah a michang akvei Iskariot Judas anmah isei.

¹⁷Mahche Jisu in anmahsoh inruuia seh a anjolhna khat a ngirsei, mahche aroi anaamtea, Jerusalem na Tur che Sidon na tuiiboom apaalnata, miitam in Jisu trong rungeihnatu mahche annat ansatnata mathratnatu mah amunchunna thlengsei.

¹⁸Mahche akseengnoh li in anchut mii eita amthrat ei.

¹⁹Mahche miitam in amahta anpalnatu anjon, alamva amah atuui inthruh a miinaam aknata amthrat ei.

²⁰Cheva amah in aroita anna asonei, “Anran anriing nannihkha doi akphahsachou, alamva Ringpu va kurung huunnakha nannih nantasa.

²¹Ipek aktraam miichoukha doi akphahsachou, alamva nannihta nanimvahtu. Ipek aktrap miichoukha doi akphahsachou, alamva nannih in innui nanphahtu.

²²“Miivaa Asa kupa rella nannihta mii in nantirh a, thloia nanisaal, che nanmingta nanitan laikhan doi akphahsachou!

²³Mahni achunna tlanve mahche roomthok a inthomve, alamva anve, ringramma nannih nankhaan liinna am; alamva oinang jimma anpa anpuin ringraan eita anchut.

²⁴Chuta akdoon nannihva lahnasachou! Alamva nannih in diltlan masoh nanphah.

²⁵Ipek von anvah nannihva lahnasachou! Alamva nannih in traam uchou. Ipek annui nannihva lahnaschou! Alamva nannih in marhuui uchou mahche trap uchou.

²⁶“Mii naamtein nannih turella akthra antronglai nannihva lahnaschou! Alamva oinang jimma anpa anpuin ringraan akveieita nga tloh a anchut.”

²⁷“Chuta arungai nannihta kisonchou, nannih jeknaeita rilvolve, nannihta nantirh mii eita thra tlohve,

²⁸nannihta phool nanitloh mii eita doi malanve, nannihta jakhatkho soonnoh a nanitloh anmah turella ngenve.

²⁹Nangta nimaipii inkhat ah akbeengleh amahkuunga inkhat tongkho dohro. Mahche nisilh puun naksut amahta nilungluutkho naksutle indahnohro.

³⁰Darkaar amma naninih miirelta malanve; nipoot aklou miikhannata veikhat inlenga lounohve.

³¹Mahche miita nankuunga namitlohja khananga, nannih inkho mii kuungah tlohve.

³²“Che nannihta nanirilvol miita nannih inkho rilvol choule, nankuunga jaknang roomthok mamuhna am ume? Alamva alehchel miiluung inkho miita anringvol khame.

³³Nannih nankuunga akthra aktloh miita akthra tlohchoule, nankuunga jaknang roomthokna am ume? Alamva alehchel miiluung inkho mahchunanga antlohkhame.

³⁴Che nannih in inlenga kanphahtuta namidon ankuunga baobeh mapuchoule, nankuunga jaknang roomthokna am ume? Alamva aleh akchel miiluung inkho mahchuta inlenga phahnatu alehchel ankuung akho amipu khame.

³⁵Chuta nannihta jekna mii eita rilvolve, akthrakho tlohve, inlenga keisiintuta madonnoh a mapuve, mahchunna nannih nankhaan inroltu, che nannih in ankaangremva Asa veiuchou; alamva mii in atlohman akromnoh mahche thranoh mii eita amah in amchaalei.

³⁶Nannih nanpa in nanirilvol nanga nannih inkho mii rilvol theihve.”

³⁷“Miita pichaar tlohnohve, mahche nannihkho pichaar nanitlohnoh tuei; miita malaal khonohve, che nannihkho tiknikho nanimlaal nohtuei; miita ipve, nannih namiraalkho nani iptu.

³⁸Malanve, che nankuunga nanimlantu, akthra chaanga olla namma lok a pet holh a nannih buktiimma naniraangtu. Alamva nannih in nan olna chaangtal khanna nanioltu.

³⁹“Amah inkho ankuunga pandam khat asonei, mitcho khat in mitcho khatta lamching achekume? Annih a khursuunga tlanoh tueime?

⁴⁰Aroi inkhat in amah lulok achunga amphunoh, chuta amahta mapungpha a matheih amtamche amah lulok nanga vei umang.

⁴¹Nangtalva nimit a am thinglipta muhnoh a, niuh ninaovaa anmit a am thinglipta jarella nianme?

⁴²Nang nimitalla thinglip ak amva muhnohchea a khatloh ani uh ninaota, ‘Unao o, nang nimit a ak am thinglipkha kei loutang ta son nichek ume?’ Akthra veisin nangin matsah a nang nimitna thinglipkha loumanro, mahche aknua niuh ninao anmit a am thinglipta nilohnatu seenga muh nichektu.”

⁴³“Alamva akthra thingnata thranoh akrah inrahnoh, mahche akthranoh thingnata akthra akrah inrahnoh;

⁴⁴alamva thing anaamte i amah akrah ah inrom. Alamva mii in kuling thingnata thotthing louritnoh ei mahche kuling suun inchaam nata nganglirah louritnoh ei.

⁴⁵Akthra mii in amlungla akthra lalta amthruh, mahche akthranoh mii in amlungna akthranoh lalta amthruh; alamva amlunga ak amkhata anar in trong.”

⁴⁶“Chunna keiin kisonta tlohnoh a nannih in keita ‘Akpu, Akpu,’ nan ong angi jarelname?

⁴⁷Keikuunga thlenga kitrongta arungeihche aktloh miikha tunangsoh intrimmme tihkha keiin nanimmuhtang.

⁴⁸Mah chuvah amah in thuuk a achohche lungpii chunga innmun tholla inntloh mii khat nangsa; che tuiiliin athlenglai tuii masuur in inn khata amratpei, che mah innkha machek cheknohsa, alamva mahkha thratea atlohpei.

⁴⁹Chuta trongta arungeihche aktlohnoh amahkhava innmun thratea tholnoh a philchunga inntloh mii khat nangsa; alamva tuii masuur in amrat in kak hanga inriilla puursa, che mah innkha khalmo tlik invuia maang veisa.”