Read Tarao Naga JOHN 11 Bible Online

JOHN 11 - Tarao Naga bible

JOHN 11

¹Pek Meri leh amah ute Martha ankhuu Bethani a mii khat Lajaras kna a am.

²Akpu ta thao polh a Akpu akehta asamma aknuul Meri vaa atra Lajaras knasa.

³Chunna aute in Jisu kuunga trong mathlah a ason, “Akpu, nangin nirilvol amahkha knasa.”

⁴Jisu in mahchuta atheih in ason, “Aknakha thitangta knanoh; mah iva Ringpu paarthrata amliinna turelnaning, mah chuvah amah apaalla Ringpu Asa kupata paar amthratna turelna.”

⁵Jisu in Martha leh anaosoh che Lajaras ta arilvolei.

⁶Chunna amah knasata atheih in, amah in an amna khanna Jisu in ninih nichuunga amsa.

⁷Mahchuche aknua Jisu in aroita asonei, “Inih in Judia a veikhat sehrei.”

⁸Aroi in akuunga anson, “Lulok, Judi in nangta lung nakdenreita ipek nanjonnoh eime, chela veikhatla mah khanna sehsamla mangche?”

⁹Jisu in amsang, “Nikhatsuunga pung somleinih amnohme? Tunangkhat in suunna sehloonle amah akeh masuihnohtu, alamva amah in tukleiramna akvaar ita amuh.

¹⁰Chuta tunangkhat in khulouh a sehloonle, amah akeh amsuihtu, alamva akvaarkhan amahkuunga vaarnoh.”

¹¹Nga tloh a atrongche, ankuunga asonlaei, “Inih iruul Lajaras insa, chuta amahta kamthohnatu keiin sehtang.”

¹²Aroi in amahkuunga anson, “Akpu, amah in inleva knathra usa.”

¹³Pek Jisu vah Lajaras in athih rella atrongna veisa, chuta anmahva inna amtuta amidonpei.

¹⁴Cheva Jisu in ankuunga seenga atihpei, “Lajaras thisa;

¹⁵alamva nannih in namilotnatu keiin mah khanna amnoh angta nannih turel keiin roomthok ang. Chuta inih in amahkuunga sehrei.”

¹⁶Pheipokta an ong Thomas in anruuipijou amah aroikuunga asonei, “Inihkho amahsoh sehreio, inih in amahsoh inruuia thijou khoromnohme.”

¹⁷Pek Jisu in mahchunna athlenglai Lajaras rusuunna anphuumna nijan manli aphahpei.

¹⁸Bethani vah Jerusalem nata mel innihvakta inlaning,

¹⁹Chunna Judi jikcha in Martha leh Meri annao kupa athih rella bohnatu thlengei.

²⁰Martha in Jisu thlengsta atheih in, louseh a amahta antuukpipei, mahsuunga Meri va inna inbok a inmah.

²¹Martha in Jisu ta ason, “Akpu nanginta onna amcheleva, kei kitrakha thinoh uta.

²²Che ipekho krom mah chuvah nanginta Ringpu kuunga jangmekhat ningenchu, Ringpu in nangkuunga amlantu.”

²³Jisu in amahkuuga ason, “Nang nitra veikhat ringtu.”

²⁴Martha in amahkuunga ason, “Achena aknia veikhat ringna akhanna amah in ringtuta krom.”

²⁵Jisu in amahkuuga ason, “Veikhat akring mahche akring chaankha keitalsang; keita kamlot mii khanna thislakho ringlatu,

²⁶che tunangkhat in ringa keita kamlot miikhan tiknikho thinoh usei. Mah i nangin namlotme?”

²⁷Martha in akuunga ason, “Akpu, oi; nangva Ringpu Asa kupa, Khrista tukleiramma thlengcheta kamlotche.”

²⁸Mahchuta asonche, amah anaoeisoh Meri kuunga inlenga amahta inruktea onga ason, “Lulokha onna amsa, nangta nak ong.”

²⁹Mahchuta atheihsoh, inthademma anthohche amahkuunga sehsa.

³⁰Pek Jisu vah khuusuunga tlungnohmang, chuta Martha in antuukpina khanna ammang.

³¹Amahta boh a, inna ak amjou Judi in, Meri in khalmo intha a inthoua anthruhkhata amuh in, rusuunna seh a trapsam naita anjuihpei.

³²Meri in Jisu amna a thlenga Jisu ta amuhsoh, amah akehkungah akhuk makamma ason, “Akpu, nanginta onna amcheleva, kei kitrakha thinoh uta.”

³³Amah in atrapta Jisu in amuh in, amasoh akthlengjou Judi kho trapsei, chunna amah akli leh aril khalmo asokpei;

³⁴chunna amah in ason, “Amahta ramma nanphuumme?” Akuunga anson, “Akpu, thlenga anro.”

³⁵Jisu in trapsa.

³⁶Cheva Judi in ansonpei, “Anve, jikcha amahta arilvolme!”

³⁷Chuta ankaarna arouin anson, “Mitchota anmuhchek amah in mii ikho athihnoh natu tlohcheknoh ume?”

³⁸Jisu in veikhatla aril khalmo sok a, rusuunna thlengsa; mahchu rusuunpiina, che lung inkhat inkhaar a am.

³⁹Jisu in ason, “Lungkha phongve.” Akthivaa aute Martha in akuunga ason, “Akpu, pekva innam usa, alamva athihna nimanli aphahpei.”

⁴⁰Jisu in akuunga ason, “Nanginta malotchele Ringpu va paarthra nimuhtuta naksonnoh angme?”

⁴¹Chunna anmah in lungta anphongpei. Che Jisu in intoua a anche ason “Pa o, nangta kampaakche alamva nangin kei kitrongta naktheih ang.

⁴²Nangin keita anirel naktheih angta krom, chuta onna miitam ngirra ak am mii turella kisonche, mah chuvah nangin keita namthlah angta anmah in amilotnatu.”

⁴³Mahchuta asonche, housuuk a onga ason, “Lajaras, inthouro!”

⁴⁴Akeh akut puun inlep a, che amai puunna inthlomma akthi miikhan inthruhsa. Jisu in anmahta asonei, “Amahta majakve, che masehvesa.”

⁴⁵Alamchunna Meri soh akthlengjou Judi jikcha in, Jisu in atlohthlou khata anmuh in amahta amilotpei;

⁴⁶chuta arouinva Pharisi ankuunga seh a Jisu in atlohthlou khata antongpei.

⁴⁷Chunna akthloi thiimpu leh Pharisi in jamata maboomma, anson, “Inih in kha itloh usame? Alamva mahmii in daang jikcha ampaangpei.

⁴⁸Nga tloh a oinanga atloh ita maja maleva, mii naamte in amahta amilot usa, cheva Rome na akchek amneh in thlenga inihtu akseeng amunleh inih jaatboomta inimmaang usa.”

⁴⁹Chuta ankaarna inkhat mah kumma akthloi thiimpu akvei Kaiphas in ankuunga asonei, “Nannihva jakhatkho romnohchou;

⁵⁰mah chuvah nannaamte nanmaang ngutva mii khat athih in jaatboom anaam amaangchunga ralla thranohme.”

⁵¹Mah i amah atak turellakhop sonnoh, chuta mahkum chunna akthloi thiimpu aveilai Jisu in jaatboom turella thituta matsah a alouphoongpei,

⁵²amah jaatboom relna khop noh, chuta inthek invorh a ak am Ringpu vaa asaeita veikhat inlenga athlenna turelna.

⁵³Chunna mahni khannata mathronna amahta khatloh a ithat umeta intelsei.

⁵⁴Machunna alamveia, Jisu in Judi ankaar a indanga sehloon tlohnohsa, chuta rapril komma am Ephraim khuupii aveella sehsa, aroi eisoh machunna amjousei.

⁵⁵Ipekva Judi ei laalna buhdoon innaisa, che mii aktamva anmah khuuboom nata laanna buhdoon aphahnoh amaa a antak maseengnatu Jerusalem a hangsei.

⁵⁶Anmah in Jisu ta jonna, mathruunna thlaamma ngirra khatleh khat insonsei, “Nannihva jangnamidonme? Amahvah laalna buhdoonna thlengnoh usa, thlengrei ume?”

⁵⁷Pekva akthloi thiimpu leh Pharisi ei in akthloi trong anmithruhpei, mah chuvah “Tukhat Jisu amna akrom mii in anmah kuunga marom eiso, chunna amahta ansuurnatu.”