Read Tarao Naga JOHN 14 Bible Online

JOHN 14 - Tarao Naga bible

JOHN 14

¹“Nannih nanril malah a insuk inhal tlohnohve, Ringpu ta malotve, keikho kamlotve.

²Kei Pa inna khum tam am; chunohleva, keiin ksonche uchou mah chuvah keiin nannih turella amunkhat amchaang sehtung?

³Che keiin nannih turella seh a amunkhat machaang sangleva, keiin veikhat thlenglatung che kei kiamna a nannikho nan amnatu kloh uchou, chunna keiin kiamna a nannihkho am uchou.

⁴Che keiin ramma seh angme nannih in lamkha nanrom.”

⁵Thomas in akuunga ason, “Akpu, nang ramma sehsam cheme kannih in romnoh ung, che khatloh a kannih in lamchu kanromchek ume?”

⁶Jisu in akuunga ason, “Lam khakho, akchim khakho, mahche akring khakho keisang; keinoh avah tukhat inkho Pa kuunga thlengnoh tuei.

⁷Nannih inta keita keirom chouleva, kei Pakho nanrom uta; ipekva nannih in amahta nanrompei che nanmuhpei.”

⁸Philip in amahkuunga ason, “Akpu, Pa ta kanimmuhro, che kannih in peltu ung.”

⁹Jisu in akuunga ason, “Khalmo soot a keiin nannihsoh inruuijousang, che ipekphah keita keiroomnoh mangchoume? Keita keimuh miikhan Pakho amuhpei; nangin khatloh a Pa ta kammuhro ta nisonmangme?

¹⁰Keiin Pa kuunga ammangche Pa in keikuunga amta malotnoh cheme? Keiin nankuunga kisontrongi kei kikrou kichek kamneh a trongnoh ang, chuta keikuunga ak am Pa in athlouta atloh.

¹¹Keiin Pa kunga che Pa in keikuunga amta kamlotro; chunohle kei kthloukhanna malotro.

¹²Keiin atatak a nankuunga kisonchou, keita kamlot amah in keiin ktlohthoukha amah inkho atlohtu; che maichunga akliin thloukho amah inkho atlohtu, alamva keiin Pa kuunga sehsang.

¹³Bilam nannih inta keiminga nihchoule mahkha keiin kitlohtu, chunna Apa in Asakuunga paar amthrattu;

¹⁴bilam nannih inta keiminga nihchoule, mahkha keiin kitlohtu.”

¹⁵“Nannih in keita keirilvol choule, kei kitrongthuun namijuhtu.

¹⁶Che keiin Pa kuunga kingentu, che nannihsoh ache amnoh a amjounatu amah in aktleikhat Nanichaaktu amthlahtu.

¹⁷Tukleiram inkho phah acheknoh akchim Li, mah chuvah tukleiram inva muhkho muhnoh mahche romkho romnoh, chuta nannihva amahta nanrom; alamva amah in nannihsoh inruuia amtu che nanrilsuunga amtu.

¹⁸“Keiin nannihta sarahsa naoleeng nanga nanimah nohtung; keiin nankuunga thlengtung.

¹⁹Tukleiram in lai kak aknua keita keimuhnoh uchou, chuta nannih in keita nanmuh latung; alamva keiin ringsang, nannihkho ring uchou.

²⁰Mahni chunna keiin Pa ninga ammang, che keiin nannih ninga ammangta nanromtu.

²¹Kei trongthuunta akjuih amah in, keita aril kamvol ang; che keita keirilvol amahta Pa inkho arilvoltu, che keiin amahta kirilvolla kitaktalta kammuhtu.”

²²Judas (Iskariot khanoh) in akuunga ason, “Akpu, khatloh a kankuunga nitaktalta nammuhsam ungme, tukleiram avah mamunohtung nitihme?”

²³Jisu in akuunga amsang, “Mii khat inta keita keirilvolle, amah in kitrong amjuihtu, che Pa in amahta aril involtu, che inih in amahkuunga thlenga che amahsoh inih in itloh ikhaljoutu.

²⁴Tunangkhat in keita keirilvolnohle kitrongta majuihnohtu; che nannih in nantheih trongi kei ningnanoh chuta keita kamthlah Pa kuungna.”

²⁵“Keiin nannihsoh kiamjoulai mah i trongsang.

²⁶Chuta keiminga Pa in nannihta Nanichaak Li Akseeng amthlahtu, amah in nannihta anaamte nanimtheih a keiin kson anaamte ikho nanrilla nantheihnatu atlohtu.

²⁷Leh oi nankuunga kmahchou; kei leh oi nankuunga kamlanchou; keiin kamlanchou i tukleiram in nanimlan khanangnoh. Nannih nanrilla insuk inhal tlohnohve, che intrikho intrinohve.

²⁸Nankuunga ksonkha nannih in nantheihpei, ‘Keiin sehtung, mahche nankuunga thlenglatung.’ Nannih in keita keirilvol choule, keiin Pa kuunga kisehsam i nanroomthoktu, alamva Pa in keichunga liin.

²⁹Che anaamte i asuuknoh amaa a keiin nankuunga kisonpeichou, chunna mah i asuuklai nannih in namilotnatu.

³⁰Keiin nannihsoh tam trongnoh usang, alamva tukleiram akpuui in thlengsa. Amah in keichunga ralla atuui amnoh;

³¹chuta Pa in kikuunga trongthuun amlankhata kitlohning; chunna Pa ta kirilvol tih a tukleiram in anromtu. Inthouvesa onnata sehrasei.”