Read Tarao Naga JOHN 15 Bible Online

JOHN 15 - Tarao Naga bible

JOHN 15

¹“Keiva akchim ngangli khasang, che ngangli thakbil akpu vah Pa.

²Akrah amnoh keikuunga ak am abaak anaam amah in atan, anrahsam abaakva ralla anraahnatu amseengche ralla akrah inrah.

³Keiin nankuunga kitrongin nannihva seengsachou.

⁴Keikuunga amve, che keiin nankuunga amtung. Ngangli in akuungsoh inkeihnoh a abaak akroua inrah cheknoh nanga, nannih in keisoh nan amnohmiil inrah cheknoh uchou.

⁵Keiva ngangli khasang, nannihva abaak sachou. Tukhat in keininga amleh, che keiin amahninga am angle, amahvah tam inrahtu, alamva keinoh a nannih in jakhatkho tlohcheknoh uchou

⁶Tukhat in keininga amnohle, abaak tanna ilonche chaar nanga chaar uchou; che akchaar abaak eita matlonna meikaara thlaak a mahchu kaangsei

⁷Nannih inta keininga amchoule, che kei kitrongta nankuunga amle, nannih in nannihja nihve, che mahchu nankuunga veitu.

⁸Nannih in tam nanrah khanna Pa ta paar amthratpei; chunna nannih in kei kiroi veisachou ta seenga namimuhpei

⁹Pa in keita aril kamvol khananga, keiinkho nannihta kiril involchou; kei rilvolkhanna inpotnoh a amve.

¹⁰Keiin Pa trongthuun eita ngaak a che amah arilvolkhan kiam nanga, nannih inkho kitrongthuun eita ngaakchoule, kei rilvolkhan ipotnoh a am uchou.

¹¹Kei kroomthok asipnatu, mah ita nankuunga ksonpeichou.

¹²“Mah i kei trongthuunsa, chunna keiin nannihta kirilvol nanga nannihkho khatleh khat ril involve.

¹³Tukhat in amah apai turella achaan amthlahchung, ralla akliin rilvol tukhat kuungkho amnoh.

¹⁴Kei trongthuun ita majuih choule, nannih i kei kipaichou.

¹⁵Maicheva keiin nannihta roijuihta naniongnoh usang, alamva roijuih in amah akpu in jangthlouta atlohme romnoh; chuta keiinva nannihta kipaita kiongpeichou, alamva Pa kuungnata ktheih anaam nankuunga kamrom peichou.

¹⁶Nannih in keita keichar nohchou, chuta keiin nannihta kcharpeichou mahche thlou kithun peichou chunna nannih in seh a akrah nanrahnatu che akrah in nannihsoh amjounatu; chunna bilam Pa kuunga keiminga nichoule, mahchu amah in nankuunga nanimlantu.

¹⁷Mah i nankuunga kei trongthuunsa, nannih khatleh khat ril involve.”

¹⁸“Tukleiram in nannihta nantirhle, nannihta nantirhnoh amaa a keita kantirhseita romve.

¹⁹Nannih inta tukleiramna choule, tukleiram in amah ata veia nannihta nanirilvoltu; alamva nannihva tukleiram nanohchou; chuta keiin nannihta tukleiram nata kichar peichou, churella tukleiram in nannihta nantirh.

²⁰‘Roijuih inkhat in amah akpuchunga liinnoh’ ta nankuunga kson trongkha intheihve, anmah in keita keichut eileh, nannihta nanichutpei; anmah in kitrongta majuih eileh, nantrongkho amijuihtu.

²¹Chuta mah naamte i keirella nankuunga antlohtu, alamva keita kamthlah amahta anmah in romnoh ei.

²²Keiinta thlengnoh a che ankuunga trongnoh angleva, anmah anleh amnoh uta, chuta ipekva anmah anlehva ip janoh usa.

²³Keita kantirh amah in Pakho intirhsa.

²⁴Tukhat inkho atlohnoh thlouta keiin ankaar a tloh sangleva, anmah anleh amnoh uta; chuta ipekva anmah in Pa leh keita muhkho kanimuhpei, che kannihta kanintirkho kanintihrsei.

²⁵Mah i anmah trongsuura anjih trongkhat a atlungnatu relnasa, mahchuva, ‘Jakhat khonoh ah anmah in keita kantirhsei.’

²⁶Chuta Pa kuungnata keiin nankuunga kamthlahsam Nanimjoom athlenglai, akchimva Li inkho Pa kuungnata athlenglai, amah in keirella sakhi amlannatu,

²⁷che nannih inkho sakhichou, alamva mathron lainata nannihva keisoh inruuijoume.”