Read Tarao Naga JOHN 16 Bible Online

JOHN 16 - Tarao Naga bible

JOHN 16

¹“Nankeh narilnoh natu mah i keiin nankuunga ksonpeichou.

²Anmah in nannihta sinakok nata nanimnomtu, nannihta nanithatmii tunangkhat in Ringpu kuunga mathruunnatu kannihta kanimlan peita amidon laikha atak a thlengsa.

³Chunna mah i antlohtu alamva anmah in Pa khatkho keita keiroomnoh ei.

⁴Anmah anpungchu athleng laia nannih in nantheihnatu mah i ksonpeichou. “Alamva keiin nannihsoh kiamjou rella, mahlaiva trongi nankuunga sonnoh ang.

⁵Chuta pekva keita kamthlah amahkuunga seh usang; chuta nankaarna tukhat inkho keita ‘Ram sehsam cheme’ ta keiruinoh noh uchou.

⁶Chulata mah i nankuunga kisonrella nannih nanril klah a sipsachou.

⁷Chuslakho keiin akchimta nankuunga kisonchou: nannihtu athratna veinatu keiin seh ang, keiin sehnoh angleva, nannihta Nanimjoom thlengnohtu; chuta keiin seh a mahkha nankuunga kamthlahtu.

⁸Che amah in athlenglaia, tukleiramvaa aleh, akchimlamseh khatkho pichaar rella sonna bahap amthlaktuei:

⁹alamva aleh amrella, anmah in keita kamlotnohsei;

¹⁰akchimlamseh amrella, alamva Pa kuunga kei seh usang che veikhat keita keimuhnoh usachou;

¹¹trongtloh latloh rella, alamva tukleiram akpu ita amilotpei.

¹²“Keiin nankuunga kisontu tam am, chuta mahchu nannih relva tammal usa.

¹³Akchim Li khan athleng laia, mah akchim khanna nannihta nanichingtu; alamva amah akrou akchek amneh khanna trongnohtu, chuta amah in atheihkhata trongtu, che akthlengsam anaamte turel nankuunga nanimromtu.

¹⁴Amah in keita paar kamthrattung, alamva amah in kikuungnata alohche nankuunga nanimromtu.

¹⁵Pa in asih anaammte keita; alamchunna kisonpeichou keikuungna anaam alohche nankuunga mahchu nanimromtu.”

¹⁶“Kak amche aknua, nannih in keita keimuhnoh usachou; che veikhatla kak amche aknua nanmuh latung.”

¹⁷Chunna arouin khatleh khat insonsei, “Kak amche aknua nannih in keita keimuhnoh usachou, che veikhatla kak amche aknua nanmuh latung; ‘Alamva Pa kuunga sehsang.’ Amah i jaknang trongta asonna meio?”

¹⁸Anmah in anson, “ ‘Kak amche aknua’ atihna i jaknang trongta asonname? Jarelna trongme kannihva romnohsung.”

¹⁹Amahkuunga anruija khata Jisu in aromma, ankuunga asonei, “Kak amche aknua, nannih in keita keimuhnoh usachou, che veikhatla kak amche aknua nanmuh latungta keiin nankuunga kisonrel nanroua inrui sachoume?”

²⁰Keiin nankuunga atatak a kisonchou, nannih in marhuuia trap uchou, chuta tukleiram inva aroomthoktu; nannih in klah knang nanphahtu, chuta nannih in nanlah nannangkha roomthokting in oltu.

²¹Kumei in nao amuhtumma klah, alamva amah apungkha thlengsa; chuta amah in nao apoknua, tukleiramma mii khat poksa ta aroomthok rella amah in alah anangkha veikhat intheihnoh.

²²Mainanga ipek nannihkho klah knang nanphah, chuta keiin nannihsoh veikhat inmuhlatung che nanril aroomthoktu, chuche nanroomthok kha tukhat inkho nankuungnata nanilounohtu.

²³Mah akni achunna nannih in keikuunga jakhatkho keinihnoh usachou. Keiin nankuunga atatak a kisonchou, nannih in keiminga Pa kuunga nannihja nihchoule, mahchu nanimlantu.

²⁴Ipekphah nannih in keiminga jakhatkho keinihnoh mangchou; nihve, che nanphahtu, chunna nannih nanroomthok kha atlungnatu.

²⁵“Mah i nankuunga ahoong trong veia ksonpeichou; nankuunga ahoongtronga trongnoh a, Pa relna seengbenga keiin nankuunga kisonnatu laikha thlengsa.

²⁶Mahni chunna nannih in keiminga nannihtu. Keiin nannih turel kipakuunga kinihtuta sonnoh ang;

²⁷alamva nannih in keita nanringvolang chuche kei i Ringpu kuungnata thlengsang ta namilot.

²⁸Kei Pa kuungnata thlengsang che tukleiram a thlenglasang; veikhatla tukleiram kamthlahche kipakuunga sehlatung.”

²⁹Amah aroi in anson, “Oi, ipekva ahoong trongnoh a indanga trong sache.

³⁰Bilam anaamte nangin niromkir che tunang inkhat in nangkuunga nakrui amnohta ipekva kannih in kanrompei; ohchunna nangi Ringpu nata thlengcheta kamilotpeiche.”

³¹Jisu in ankuunga amsang, “Ipekva namilot peime?”

³²Nannih in inthek invorh uchouva, keirouta nanmahnatu laikha thlengusa, atak a, thlengkho thlengsa.

³³Nannih in kikuunga leh oi nanphahnatu, mah i nankuunga kisonchou. Tukleiramma klah knang nanphah chuta nanril matrangve; keiin tukleiramta kichekpei.