Read Tarao Naga JOHN 18 Bible Online

JOHN 18 - Tarao Naga bible

JOHN 18

¹Jisu in trong ita asonche, aroisoh inruuia Kidron phai vanna sehsei, machunna am thakbil asuunga amah leh aroisoh luutsei.

²Ipek Akpu ta akjuur Judas inkho amunkha arom; alamva Jisu in amunchunna injomma aroisoh antuukna.

³Chunna Judas in raalmii leh akthloi thiimpu tingnata aklok ste che Pharisi eisoh mitton khatkho chemsoh inruuia mahchunna sehsei.

⁴Chunna Jisu in mah naamte i atakchunga suuksam aromrella, anmaatonga avache asonei, “Tuta nanjonme?”

⁵Anmah in anmisang, “Najareth na Jisu.” Jisu in ankuunga asonei, “Keitalsang.” Amahta akjuur Judas kho anmahsoh ngirjoua am.

⁶Amah in ankuunga, “Keitalsang,” ta asonlai annunga inlenga tukleichunga inriilsei.

⁷Amah in veikhat inlenga ankuunga aruiei, “Tuta nanjonme?” Che anmah in ansonpei, “Najareth na Jisu.”

⁸Jisu in amsang, “Keisangta, nankuunga ksonpeichou; nannih in keita keijonchoule, miiei i inlengeiso.”

⁹Mahtrongi atlungna turel amah in trongsa, “Keita kamlan ankaarna tukhatta sulla mamaangnohtung.”

¹⁰Chunna Simon Pitar in achoih chemta akjuukche, akthloi thiimpu vaa aroi akchangtong amkurta apheklokpei. Naichi chuva akmingva Malkhus.

¹¹Jisu in Pitar kuunga ason, “Nang chemkha akhumsuungah thunro; Pa in keikuunga amlan kammi keiin innohtupot angme?”

¹²Chunna raalmii ruul, che raalmii reijapuui mahche Judi vaa phrangki akthloi ei in Jisu ta ansuurpei che amikaangpei.

¹³Mansahremma amahta Annas kuunga anthlen; alamva mahkum achunna amahvah akthloi thiimpu Kaiphas vaa apu.

¹⁴Kaiphas in Judi naamte thitu ngut ah mii khat athih in thloia thratuta akson miikhare.

¹⁵Simon Pitar leh aktlei aroi in Jisu aknu anjuih. Mah aroi chuvah akthloi thiimpusoh inrom, akthloi thiimpu innmuk phah a Jisu ta juih a luutsa,

¹⁶chuta Pitar vah thong apaalla ngirra am. Chunna akthloi thiimpusoh inrom aktlei aroi inkhat in inthruh a, che thong akngaak kumeikuunga asonche Pitar ta asuunga amluutpi.

¹⁷Thong akngaak rungaakhan Pitar ta ason, “Nangkho amah aroi ankaarna inkhatnoh cheme?” Amah in ason, “Keiva amahnoh ang.”

¹⁸Ipek roijuih leh phrangki eiva khalmo ksikrella meihol meita luh a inhiilla ngirra antak malumma amsei. Pitar kho anmahsoh jouta mei oh a am.

¹⁹Chunna akthloi thiimpu in Jisu ta aroi eisoh miita amitheihrella trong arui.

²⁰Jisu in akuunga amsang, “Keiin tukleiramma indanglonga trongsang; lai amrel Judi in anboom anboomna sinakok jikcha a mahche mathruunna thlaamma kamtheih ei, keiin inruk akson amnohluung.

²¹Jarelna nakruiangme? Keiin jangta kisonme aktheih anmah in anromtu, anmah kuunga ruieive.”

²²Mah ita asonsoh, akomma akngir phrangki ankaarna inkhat in Jisu amaipiia akbeengche ason “Oinanga nangin akthloi thiimpu kuunga namsangtu phume?”

²³Jisu in amsang, “Keiin chimnohta trong khonoh ang, chimnoh a sonnoh ang; chuta keiin chimma trong sangleva, jarelna nakbeeng angme?”

²⁴Chunna Akpu ta khit a Annas in thiimpu aklok Kaiphas kuunga amthlahpei.

²⁵Ipek Simon Pitar in ngirra meiholmei oh a am. Amahkuunga anson, “Nangkho mahmii aroi ankaarnanoh cheme?” Mahchuta indah a ason, “Keiva amahnoh ang.”

²⁶Pitar in amkur apheklok roijuihvaa unao khat in arui, “Nangkho amahsoh inruuia thakbilla sehjoua kimuhmii khanohcheme?”

²⁷Mahchuta Pitar in veikhatla indahlasa, mah laitalla aarkhong inkhuungsa.

²⁸Chunna anmah in Jisu ta Kaiphas kuungnata Pilat akoolla anthlenpei. Mahchu juktiingpina. Anmah in laalna buhdoon saak iinna antakta mabuurnoh natu anmahvah koolla luutnoh ei.

²⁹Chunna Pilat in inthruh a ankuunga asonei, “Mahmii i jaknang alaal amrelna nanthlenpeime?”

³⁰Amahkuunga amisang, “Mahmii in thranoh atloh amnohleh, nangkuunga thlennoh tu ung.”

³¹Pilat in ankuunga asonei, “Nantaksaak in amahta phurh a, nannih trongsuur nujuih a pichaar tlohve.” Judi in amahkuunga anson “Tunangmii khatta that aja tih a kankuunga rai amnoh.”

³²Mah i Jisu in jaknang hoonga thi umeta ason trongkhata atlungnatu suuksa.

³³Chunna Pilat in amah koolla veikhat aluutche Jisu ta onga arui, “Nangi Judiei kurung cheme?”

³⁴Jisu in amsang, “Mah i nang niril suungnata nisonme, chunoh a aktlei in keirelna nikuunga ansonta trongcheme?”

³⁵Pilat in amsang, “Kei Judi angme? Nang jaatboom leh akthloi thiimpu in nangta keikuunga kanpek ang. Nangin jangnitloh relname?”

³⁶Jisu in amsang, “Kei kurung ramva tukleiram nanoh; kei kurung rammi tukleiram naleh, keita Judi ankut a kamlannoh tuei, kei roijuih in raal antlohpi tuei; chuta kei kurung rammi tukleiram nanoh.”

³⁷Pilat in akuunga ason, “Chule nangvah kurung cheme?” Jisu in amsang, “Keiva kurungang tih a nangin nisonpei. Akchimkhata sakhi kamlannatu mairelna keiin poksang, Akchim akveimii in kei kihou antheih.”

³⁸Pilat in akuunga ason, “Akchimmi khome?” Mah ita asonche, Judi ankuunga veikhat inthruh a asonei, “Keiin amahchunga jakhat amaraal tuuknoh ang khame.

³⁹Chuta laalna buhdoon aknia nannih turella keiin miikhatta mathlahnatu nannih kastam am; Judiei kurungi nannih turella keiin mathlah nanditme?”

⁴⁰Anmah in ong onga amisang, “Mahmii inoh chuta Barabbas ta” — Ipek Barabbas vah inrumii.