Read Tarao Naga JOHN 20 Bible Online

JOHN 20 - Tarao Naga bible

JOHN 20

¹Ipek kouhtu matsah akni anthim laia inranga Makadalini Meri in rusuunna thlengsa, ni inthimmang, che rusuun akhaar inhoonga am amuhpei.

²Chunna amah in tlaanna, Simon Pitar mahche Jisu in arilvol aktlei aroi ankuunga seh a ansonei, “Anmah in Akpu ta rusuunnata anlohche ramma ansih peitame kannih in romnohsung.”

³Chunna Pitar in aktlei aroisoh inthruh a anmah in rusuuntonga sehsei.

⁴Anmah annih a tlaanjousei, chuta aktlei aroi in Pitar ta aralche matsah a rusuunna tlungsa;

⁵che inkhup a ahunbirh in, amah in bulapuun am amuh, chuta asuungva luutnoh.

⁶Cheva Simon Pitar thlenga, amah aknu juihveia rusuun suunga luutsa; anmah in bulapuun am anmuhpei,

⁷che amah akang anthlomnava bulapuun soh amjounoh chuta ajea inlumma am.

⁸Che matsah a rusuun akphah aktlei aroi in asuunga luutsa, che amuhpeia amlotpei;

⁹alamva amah in ringtu ta Ringjih in asonkha, anmah in romnoh mangei.

¹⁰Cheva aroi in innting inlengsei.

¹¹Chuta Meri vah rusuun apaalla ngirra trapsa, che amah in trap malamma rusuun asuunga inkhup a a an;

¹²chunna amah in inngoua inliing ringroi innih, Jisu aruung antolhna a inkhat in aluuthlunga che inkhat in akehthluunna inbok a am amuh ei.

¹³Anmah in akuunga anson, “Kumei nang jarella trapcheme?” Amah in ankuunga asonei, “Alamva anmah in kei Akpu ta anlohpei, che amahta ramma ansihpeime romnohsang.”

¹⁴Mahchuta asonche anhei in, Jisu ngirra am amuhpei, chuta amah invah mahkha Jisu sa tih a romnohsa.

¹⁵Jisu in akuunga ason, “Kumei, jarella trapcheme? Tuta nijonme?” Amahta thakbil akngaak mii meta akuunga ason “Lulok, nangin amahta loucheleva keisonro, ramma nisihpeime, keiin amahta loutang.”

¹⁶Jisu in akuunga ason, “Meri.” Amah in inheia akuunga Hibru tronga ason, “Rabboni!” (arthava Lulok).

¹⁷Jisu in akuunga ason, “Keita kamtuhnohro, alamva Pa kuunga kalnoh ma ang; chuta kei kiuh kinao ankuunga seh a soneiro, keiin Pa kuunga khatkho nannih nan Pa kuunga, kei Ringpu kuunga khatkho nannih Ringpu kuunga kalsam ma ang.”

¹⁸Chunna Meri Makadalini in seh a aroi ankuunga asonei, “Keiin Akpu ta kimuhpei” che amah in Meri Makadalili kuunga ason naamte anmah ankuunga atongpei.

¹⁹Kouhtu matsahrem akni khulouhram a, Judi ta antrih rella, aroi in an amna innkhaarta ankhaarpei, Jisu in thlenga ankaar a ngirra anmahta asonei, “Leh oi in nannihta nanimruui veiso.”

²⁰Mahchu asonche, amah akut innihleh apangneemkho ammuh ei. Cheva aroi in Akpu ta anmuh in anroomthoksei.

²¹Jisu in veikhat inlenga ankuunga asonei, “Leh oi in nannihta nanimruui veiso. Pa in keita kamthlah nanga, keiinkho nannihta kamthlahpeichou.”

²²Mahchuta asonche ankuunga akphuk seemma asonei, “Akseeng Li phahve.

²³Nannih in tunangkhatvaa alehta ipchoule, anmah anlehta in ipsei; anmahta nannih in ipnohchoule, anmah anlehta in ipnohsei.”

²⁴Ipek (pheipok takho an ong) Thomas somleinih ankaarna inkhatvah Jisu in athlenglaia anmahsoh louamnoh.

²⁵Chunna aktlei aroi in akuunga anson, “Kannihva Akpu kanmuhpei.” Chuta ankuunga ason, “Keiin amah akut a thirkit amun mahche thirkit akhur a kikut majungin kipuurnohmiil, keiva malotnohtung.”

²⁶Nirit aknua, amah aroi Thomas kho ankaar a injaosa. Inn ankhaar chuta Jisu in athlengche innkaar a ngirra asonei. “Nankuunga leh oi amso.”

²⁷Chunna Thomas kuung ason, “Nikut majungkha onna sihro che kikut i anro; nikutkha jamma kpangneemma puurro, malotnoh tlohnohro, chuta malotro.”

²⁸Thomas in akuunga amsang, “kei Akpu mahche kei Ringpu!”

²⁹Jisu in akuunga ason, “Nangin keita namlot angi keita nakmuhrelna angme? Muhnoh a amlot mii eikha doiphahsei.”

³⁰Ipek mah nirik in anjihnoh aktlei daang khalmo tam Jisu in anmaikunga atlohpei.

³¹Chuta Jisu vaa Ringpu Asa kupa Khrista sa ta namilotnatu, che malot a nannih in amah akminga ring nanphahnantu amah i injihsei.