Read Tarao Naga JOHN 21 Bible Online

JOHN 21 - Tarao Naga bible

JOHN 21

¹Maiche aknua Tiberias tuiiboomma Jisu in atakta veikhatla aroi ankuunga anmuh ei; amah ataksaakta oinanga ammuh ei.

²Simon Pitar, pheipokta an ong Thomas, Kalili vaa Kana na Nathanael, Jebidi asa kupaei, che aktlei aroi innihsoh amjouei.

³Simon Pitar in ankuunga asonei, “Kei ngaman sehtang.” Amahta anson, “Kannihkho nangsoh inruuia sehtu ung.” Anmah in inthruhseia mulisuunga chuungsei; chuta mah khulouhthlang chunna anmah in jakhatkho mannohsei.

⁴Ram didata avaar in, Jisu in tuiikomma ngirra amsa; mahchu aroi inva Jisu sa ta romnohsei.

⁵Jisu in ankuunga asonei, “Naoeio, nga injaochoume?” Akuunga amisang, “Injaonoh ung.”

⁶Amah in ankuunga asonei, “Torokha muli nansihna akchangtonga denve, che nannih in nga ste nanmantu.” Chunna anmah in andenpei, cheva ipekva nga atammal inva, anmah in kai cheknohsei.

⁷Jisu in arilvol aroi Pitar khata ason, “Amah i Akpu taksa!” Mahchuta Simon Pitar in atheih inva puunrei aveipei, amah in puunrei silhnoh a thloutloh a am cheva tuiiboom suunga choonga luutsa.

⁸Chuta aktlei aroi in nga sip torota kaia muli chuunga thlengsei, alamva anmah in tuiipaal nata khalmo inlanoh ei, chuta kehkaar reija vakning.

⁹Anmah in tuiipaal anphahsoh, meiholmei anmuhpei, che meichunga machaar a ansih ngaleh tolkho anmuhpei.

¹⁰Jisu in asonei, “Nannih in nanmannga ste heive.”

¹¹Chunna Simon Pitar in muli amnatinga avaache nga aksip torota apaalting akaipei, anmahva mii reija sopngalei inthummei; mahchu ngatam slakho, torova inthritnoh.

¹²Jisu in ankuunga asonei, “Thlenga saakphu saavesa.” Ipekva amah i Akpu sa ta anrompeia, “Nangi tucheme” ta tukhat inkho ruinohsei

¹³Jisu in thlenga tolta alohche ankuunga ngasoh inruuia amlannei.

¹⁴Ipek mah i Jisu in thinata aringche nua aroi ankuunga amunna veithum tihpisa.

¹⁵Anmah in saakphu ansaakche nua, Jisu in Simon Pitar kuunga ason, “John asa kupa Simon, anmah chunga ralla nangin keita niril namvol angme?” Amah in akuunga ason, “Oi Akpu; Keiin nangta kirilvolche i nangin nakromang.” Amah in akuunga ason, “Kei sadamta masaak ma iin eiro.”

¹⁶Veinih tihpi amah in akuunga ason, “John asa kupa Simon, Nangin keita niril namvol angme?” Amah in akuunga ason, “Oi, Akpu; keiin nangta kirilvolche i nangin nakromang.” Amah in akuunga ason, “Kei sadamta kem eiro.”

¹⁷Veithum tihpila akuunga ason “John asa kupa Simon, nangin keita niril namvol angme?” “Nangin keita niril namvol angme?” ta veithumkhek amah in akuunga ason inva Pitar marhuuisa. “Akpu, nangin bilam niromkir; keiin nangta kiril involche i nangin nirom.” Jisu in akuunga ason, “Kei sadamta masaak ma iin eiro.

¹⁸Taktak a keiin nikuunga kisonche, nangin nao niveilaiva, nikroua ninaam raak a che nangin nisehjana a sehche; chuta nangin nichang laiva, nangin nikut nijamtu, chuche aktlei in ninaam akraaktu che nangin niseh nandahna a nakphurhtu.”

¹⁹(Maita Jisu in asonnava, Pitar i khatloh hoonga thitume che Ringpu ta khatloh hoonga paar amthrat ume amtheihna.) Mahtrong chuta asonche akuunga ason, “Kiknu keijuihro.”

²⁰Pitar in anhei in che Jisu in arilvol aroi in aknu anjuihta amuhpei, buhdoon laia amah alukhe a innaia antolh in akuunga ason, “Akpu, nangta nandahsamchu tume?”

²¹Pitar in amahta amuh a, amah in Jisu ta ason, “Akpu, mahmii iva khavei ume?”

²²Jisu in akuunga ason, “Mah i keiin kimdon veileva keiin kithlengnohmiil keininga amtu, mahchunang ningva khavei uche? Kei kiknu keijuihro!”

²³Amah aroi i thinoh uta tih a insonkha unao ankaar a inthangsa; Jisu inva akuunga amahta thinohtu talva tihnoh, chuta, “Mah i keiin kimdon veileva keiin kithlengnohmiil mahchu keininga amtu, mahchunang miiningva khavei ume?”

²⁴Amah aroichuva aksuuk thlourel sakhi amlan khare, che amah in aksuuk thlourel amjihpei; inih in irom mah chuvah amah ringtukna thamin i chim.

²⁵Chuta aktlei aksuukthlou jikcha Jisu in atloh khalmo tam am; bilam naamte tanga majih maeva, tukleiram a am nirik naamtekho mahchu imjih in bangnohtu ta keiin kamdon.