Read Tarao Naga JOHN 3 Bible Online

JOHN 3 - Tarao Naga bible

JOHN 3

¹Ipek Pharisi ankaarna akming Nikodimas an ong Judi akpuui mii khat am.

²Mahmii kupa in nikhat khulouh a Jisu kuunga thlenga ason, “Rabbi (Lulok) nangva Ringpu tingnata akthleng lulokcheta kanrom; Ringpu in inruuipinoh avah, nangin nitloh daang i tukhat inkho tloh cheknohtu.”

³Mahchunna Jisu in akuunga amsang, “Taktak a keiin nikuunga kisonche, tunangkhat inta thar a poknoh leva, amah in Ringpu vaa kurungram muh cheknohtu.”

⁴Nikodimas in Jisu ta ason, “Mii khat in atarche khatloh a inlenga pok achekume? Amah in anu poomsuung veinih inlenga luut a pok achekume?”

⁵Jisu in amsang, “Atatak a keiin nikuunga kisonche, tunangkhat in tuiia mahche Li a poknoh avah, Ringpu kurung ramma luut cheknohtu.

⁶Ruunga akpok in ruungsa, mahche Li a pok in lisa.

⁷Nangin thar a poktu tlacheta nikuunga kson khanna salungkhou nohro.

⁸Thli in araangja na a raanna seh, mahchuta nangin ahou nitheih, chuta mahchu ramnata thlengme nohle ramma sehme romnohche; mahchunang jimma Li ah akpokho veiningme.”

⁹Nikodimas in amahkuunga ason, “Mah i khatloh a vei achekume?”

¹⁰Jisu in amahkuunga amsang, “Nangin Israel ei lulok inkhatveia mah kisonita loutheinoh cheme?

¹¹Atatak a keiin nikuunga kisonche, inih in iromkhata trongningme, che inih in imuhkhata sakhi veiningme; chuta kannih in kanson sakhita nannih in lou indahschou.

¹²Tukleiram a poot eita nankuunga kson in malotnoh choule, ringramna poot eita nankuunga son angleva khatloh a namilotchek ume?

¹³Miivaa Asa kupa in ringramnata trum khanoh a tunangkhat inkho ringramma kalnohmang.

¹⁴Moses in raprilla murulta akdomnanga, miivaa Asa kupata akdomtu tlasa,

¹⁵mah chuvah tukhat in amahta malotle ache amnoh a ring anphahtu.”

¹⁶Alamva Ringpu in tukleiramta maichah phah a arilvolsa mah chuvah amah Asa kupa inkhatru khata inimlanpei, chunna amahkhata amlot tukhat in kmaang krel amnoh a ache amnoh ringna aphahtu.

¹⁷Alamva Ringpu in tukleiramta amlaalnatu Asa kupata mathlahnoh, chuta amah apaalla tukleiram in inkal aphahnatu Asa kupata amthlahpei.

¹⁸Amahta amlot mii khata malaalnoh, amahta amlotnoh mii khata amlaalpei, alamva amah in Ringpu vaa Asa kupa akming khanna malotnoh

¹⁹Mah pichaarchuva maisa, mah chuvah tukleiramma akvaar thlengsa, chuta mii invah akvaar khachunga anthimta thloia anditpei, alamva anmah anthloua thranoh seengsa.

²⁰Alamva thranoh aktloh miirel in akvaarta intirh ei, amah in atlohthlouta indangtuta akvaara thlengnoh ei.

²¹Chuta tunangkhat akchim aktloh amahvah avaarna a thlengtu, jarelname tihva amah in Ringpu in atlohthlou khanna seenga andangnatu relna.

²²Maiche aknua Jisu in aroi eisoh Judia ramma sehsa; mahchunna anmahsoh inruuia ohchunna nikhat ninih nichuunga anlupsei.

²³John inkho Salim akom Anon ah alup ei, alamva mah khanna tuiitam am; mii akthlengeita alup ei.

²⁴Alamva mahlaiva John va simma inthunnohmang.

²⁵Ipek John aroi leh Judi inkhat ankaar a maseengna rella trong inkharhna suuksa.

²⁶Che anmah in John kuunga thlenga anson, “Rabbi, Jordon araalla nangsoh amjou, nang sakhi namveikha onna amsa, amah in miita tui alup ei, miikha anro, che mii naamte in amahkuunga thlengei.”

²⁷John in amsang, “Ringram tingnata akphahkhop amahnoh avah tukhat inkho jakhatkho phah cheknoh ei.

²⁸Keiva Khrista khanoh ang, chuta amah amaa a keita kamthlah angta keiin kisonkhata nantak in keitu sakhi veisachou.

²⁹Tharei in aktuukha changrisa, mahkha thareivaa apaisa, ngirra amahta arungeih, changrivaa ahouta atheih in aroomthok hang; alamchunna mah roomthok inna kirilla sipsang.

³⁰Amahvah ahanraltu tla, chuta keiva inlengtu tla ang.”

³¹Achung tingnata akthleng amah in achungtingna; tukhat thalei tingna in thaleivaa ata vei, amah in thalei rella trong, ringram tingnata akthleng amahvah apumte achungtinga.

³²Amah in amuhta che atheihta sakhi amlan, chuta amah aringtukna thaminta tukhat inkho lounoh ei;

³³amah aringtukna thaminta aklou miiva Ringpu i chimsa ta atak a chum innamsa.

³⁴Alamva Ringpu in amthlah mii khanna Ringpu atrongta trong, jarelna tihva Amahkuung aksip Li ta amlan;

³⁵Pa in Asa kupta arilvol, chunna poot anaamte amahkuunga amsilpei.

³⁶Asa kupata amlot tukhat in ache amnoh ring aphahpei; Asa kupa trongson amjuihnoh tukhat in ache amnoh ring phahnohtu, chuta Ringpu in inhaanga asaokha atakchung amtu.