Read Tarao Naga JOHN 4 Bible Online

JOHN 4 - Tarao Naga bible

JOHN 4

¹Jisu in John chunga ralla aroi seemma alupeita Pharisi in antheihta Akpu in aromlai

²(tak a Jisu atak inva tukhatkho lupnoh, chuta aroi khopin anlupning),

³amah in Judia mathlah a Kalili a sehlasa.

⁵Chunna Saikhar antih Samaria vaa khuuboom Jakop in asa kupa Joseph kuunga amlanna ram akomma Jisu in thlengsa.

⁶Mahchunna Jakop vaa tuiirum am. Chunna Jisu in lamsei asehna klah a tuiirum apanga inboksa. Mahchu suunjaivak atlaak laina.

⁷Samaria na kumei inkhat in mahchunna tuiichoi thleng. Jisu in amahta ason, “Tuii ki iinnatu kamlan roba.”

⁸Alamva amah aroieiva ansaak an iintu aklei khuuboomma sehsei.

⁹Chunna Samaria kumei in Jisu ta ason, “Nangva Judi re chea che khatloh a Samaria kumei kei kuungnata tui ni iinnatu naknih angme?” alamva Judi in Samaria soh insamnoh ei.

¹⁰Jisu in amahkuunga amsang, “Nanginta Ringpu vaa akutthol mahche ‘Tuii ki iinnatu kamlanro’ ta nikuunga tuii naknih i tumeta romchele, nangindom amahkuunga tuii nih a amah in nangkuunga akring tuii nikpek uta.”

¹¹Kumei khanna amahkuunga ason, “Lulok, mah tuii i nisuuknatu jakhatkho amnohche, che mah tuiirum i khalmo thuuk; chunna akring tuii ramnata niphah ume?

¹²Mah tuiirum ita kanimlan kan pa Jakop chung nangin liincheme, amah atak inkho, asiil inkho onnata tuii an iinnohme?”

¹³Jisu in amahkuunga ason, “Mah tuii ita ak iin miirel veikhat inlenga raaltuei,

¹⁴chuta keiin kamlansam tuiita tukhat in ak iin miiva tikniakho tuiiraal amnohluung usei; keiin kamlansam tuiita ak iin mii khavah akuunga ache amnoh ringnaturel anthruh dop veitu.”

¹⁵Kumei in amahkuunga ason, “Lulok, mah tuiichu kamlanro, chunna keiin tikniakho tuii kraal nanohtu che onna tuiichoi kithlengnoh natu.”

¹⁶Jisu in amahkuunga ason, “Seh a namsal ongro, che onna thlengpiro.”

¹⁷Kumei in amahkuunga amsang, “Keiva kamsalkho amnohre manga.” Jisu in amahkuunga ason, “Keivah kamsal amnohmang” ta chimma nisonpei;

¹⁸“chuta nangva namsal ranga tihresa o, che ipek niampi ikho nang namsalnoh; nangin nison i chimpotsa.”

¹⁹Kumei in amahkuunga ason, “Lulok, nangi ringraan cheta krompeiche.

²⁰Kan pa kanpu in mahmuul chunga Ringpu ta anlou mathruun; nang inva Ringpu amithruunna amunvah Jerusalem natu ta nison.”

²¹Jisu in amahkuunga ason, “Kumeio, keita kamlotro, Pa ta mahmuul luung inkho mahche Jerusalem luungakho namithruunnoh natu pungkha thlengsa.

²²Nannih in nanromnohta namithruun, kannih inva kanromta kamithruun, alamva chaanring athlengna i Judi tingna.

²³Chuta ipek apungchu thlengsa, Pa ta amthruun mii in Li a mahche akchimma amithruuntu tlasa, alamva mah khananga amahta amthruun miita Pa in akdit

²⁴Ringpu vaa Li, chunna amahta amthruun mii in Li a mahche akchimma amithruuntu tlasa.”

²⁵Kumei in amahkuunga ason, “Misaiah (Khrista ta an ong) thlengtu antihkha krom; amah in athlenglaia bilam anaamte inihkuunga inisontu.”

²⁶Jisu in amahta ason, “Nangkuunga aktrongi amah khasang.”

²⁷Mahai talla amah aroi in thlengsei. Mah kumeisoh tronga a am in anmahva salungkhousei, chuta tukhat inkho “Jangnimdonme” nohle “Jarella amahsoh trongcheme” ta aksonchek amnohsei.

²⁸Mahchunna kumei in amah tuiipulta amahche, khuuboomma inlenga miita asonei,

²⁹“Keiin kitloh anaamteta keison mii i thlenga anve. Mahmii i Khrista antih khatame?”

³⁰Anmah in khuuboom nata inthruh a amahkuunga thlengsei.

³¹Mahlaia aroi in amahta ngenna anson, “Raabi, buh saarosa.”

³²Chuta amah in ankuunga asonei, “Nannih in nanromnoh saakphu kisaaktuphu am.”

³³Mahchunna aroi in khatleh khat insonsei, “Tunangkhat in amah in asaaktuphu anthlen meio?”

³⁴Jisu in anmahta asonei, “Keita kamthlah amah in amdonta aktlohche amah athlouta thratea amche i keitu saakphusa.

³⁵‘Ipek thla manlia amche lou luhna thla thlengusa ta nannih in insonnoh choume?’ Anve, keiin nankuunga kisonchou, ipek lou luhnatu kuunsa ta nankang domma lou anve.

³⁶Akvorh amah in akvaatsoh aroomthok jounatu akvaat amah in atlohman aphahche ache amnoh a ringnaturel akrah amhuung.

³⁷Alamva onna ason i achimna vei, ‘Inkhat in chi avorh mahche aktlei inkhat in avaat ta anson i akchimsa.’

³⁸Nannih in nantlohnohta nanluhnatu; aktlei in antlohpei, che nannih in anmah anchekna kaar a luutsachou.”

³⁹Mah kumeivaa aringtukna thaminna, “Keiin kitloh naamte amah in keisonpei” ta asonkhanna Samaria khuuboomna miitam in amahta amilotpei.

⁴⁰Nga tloh a Samaria na mii in amahkuunga anthlenglai, anmahsoh an amjounatu amahta anngenpei; cheva ohkhanna ninih anmahsoh amjousa.

⁴¹Amah atrongkhanna miitam in ral ralla amahta amilotpei.

⁴²Anmah in kumei kuunga anson, “Nangin kankuunga maita nisonrella kannih in malotnoh ung, alamva mah i kantak in kantheihpei, che mah i taktak a tukleiramta akkal Akpu sa ta kamrompei.”

⁴³Nijannih aknua Jisu in mah khannata Kalili a sehsa.

⁴⁴Alamva ringraan ta ataktal aramna mii in injahnoh eita Jisu ataktal in sakhi amlan.

⁴⁵Nga tloh a Jisu in Kalili a aseh inva buhdoonna a Jisu in atloh naamtekha Kalili na mii in Jerusalem a muh a Jisu ta anlohpei. Alamva anmahkho buhdoonna a sehsei.

⁴⁶Churella Jisu in tuiita ngangli tuii am olkha Kalili vaa Kana a veikhat sehsa. Che Kaparnaum a asa kupa kna phom aknai mi inkhat am.

⁴⁷Jisu in Juda nata Kalili a thlengsa ta amah in atheihlai amahkuunga seh a asa kupa aknata thlenga amthratnatu angen, alamva thisamma knasa.

⁴⁸Churella Jisu in akuunga ason, “Nangin salungkhouna daang muhnohchele malotnoh luung uche.”

⁴⁹Phrangki in ason, “Lulok, ksakupa in athihnoh maa a inthabeb a keiphahro.”

⁵⁰Jisu in amahta ason, “Inlengro nisakupa in ringtu.” Jisu in amahkuunga asontrongta malot a inlengsa.

⁵¹Chunna amah in anlengsuunga, amah roijuih in lamma antuukpia nisakupa ringsa ta asonpei.

⁵²Anmahta aruiei jaknang laia naoin thrame, anmah in anson, “Majaan pung sirih atlaklai atlun in amahpei.”

⁵³Jisu in “Nisakupa thratu” ta amahkuunga asonna pungtalkha amah in arompei; chunna amah atak che ataploikuung apumtein amilotpei.

⁵⁴Jisu in Judia nata Kalili a athlengche daang ampaang maisoh veinih tihpisa.