Read Tarao Naga JOHN 5 Bible Online

JOHN 5 - Tarao Naga bible

JOHN 5

¹Mah i aknua Judi ei ujou hoongna athlengin, Jisu in Jerusalem a hangsa.

²Ipek Jerusalem a Sadam Thong akomma pukhri inkhat am Hibru tronga Bethjatha antih akiing ranga vei thlaam kooia am.

³Mahthlaam chunna akna aksa mitcho, kehtlik mahche anpangnem akthi tamkhaak intolh a ammei.

⁴Alamva inromloua ringroi in pukhrisuunga trumma tuii amchektrang, mahlai tukhat in matsah a tuiikhanna trumle, anmah annat satna thraei.

⁵Kum sopthumlei kirit kna atak solmi inkhat mahchunna am.

⁶Mahmii chunna ohkhanna khalmo soot a kna intolh a am Jisu in amuh a amahkuunga ason, “Nang ninatna thra nikditme?”

⁷Akna miikhan Jisu ta amsang, “Lulok, tui anchek ancheklaia pukhri a keitrumpinatu kimii amnoh, chunna keiin kitrumlaiva aktlei mii in keichung matsah a trummei.”

⁸Jisu in amahkuunga ason, “Inthouro, nang nantolhnakha choia sehro.”

⁹Chunna kak hanga mahmiikha thrasa, che amah in antolhnata choia sehsa. Pek mahchu sabat nina.

¹⁰Chunna knathra mii khata Judi in anson, “Mah i sabatni, nangin nantolhnata choia sabat nia sehche i tlohphunoh.”

¹¹Chuta amah in ankuunga amsangei, “Keita kamthrat amah in keisonang, ‘Nang nantolh nata choia sehro.’ ”

¹²Amahta anrui, Nikuunga “Nantolhnata choia sehro ‘ta naksonmiichu’ tunangme?”

¹³Chuta keita tunang in kamthrat angme romnoh ang, alamva aphomchunna miitam ammeia Jisu va inlitsa.

¹⁴Mahchu aknua Jisu in amahta mathruunna thlaam a antuukpia, ason, “Anro, nang thrakhem sache! ralla akthranoh nichunga atlaknoh natu veikhat aleh tlohnohrosa.”

¹⁵Amahta amthratkha Jisu sa ta Judi ankuunga atongpei.

¹⁶Churella Judi in Jisu ta andah a chut amithronpei, alamva amah in sabat nia thlou atlohpei.

¹⁷Chuta Jisu in ankuunga amsangei, “Pa in pekphah i thlou atlohmang, keiinkho kitlohmang.”

¹⁸Mairella Judi in Jisu ta thatnatu ralla anjonpei, alamva amah in sabat nita khoi khop noh a, Ringpu ta amah Apa tih akho aong, amah atakta Ringpu soh amtrim.

¹⁹Jisu in anmahta asonei, “Keiin nankuunga taktak a kisonchou, Apa in atlohkha muhnoh avah Asa kupa in akrou avah jakhatkho tlohcheknoh; alamva Akpu amah in atlohkha Asa kupa inkho mahchusoh intrimma atlohning.

²⁰Alamva Pa in Asa kupata arilvol, che amah atak in atlohthlou anaamte amahkuunga ammuh, che nannih in salungkhounatu oichungkho ralla anroolthlou amah in akuunga ammuh umang.

²¹Alamva Pa in akthi miita amringche akring amlannanga, nga tloh a Asa kupa inkho madonna amring miita akring amlan.

²²Pa in tukhatkho pichaar tlohnoh, chuta Asa kupa akuunga pichaar tlohnatu amsilpei,

²³chunna anmah in Pa ta injah nanga, mii naamte in Asa kuptakho injah tupotchou. Tunangkhat in Asa kupata injahnohle, amahta amthlah Apa ta injahnoh ei

²⁴Keiin nankuunga taktak a kisonchou, keitrongta rungaia aktheih mahche keita kamthlah amahta amlot amah in ache amnoh a ring aphahpei; amah in pichaar tlohna a thlengnoh usa, chuta amahvah kthinata akring tinga akvanpei.

²⁵“Keiin nankuunga taktak a kisonchou, akthi mii in Ringpu vaa Asa kupa ahou antheihnatu pungkha thlengkho thlengsa, ipekho veimang, che ahoukha aktheih mii in ringusei.

²⁶Alamva Pa in ringa am khananga, amah in Asa kupa ningakho ringa amnatu amlanpei,

²⁷che amah in miivaa Asa kupa aveirella pichaar atlohnatu amahkuunga amtik amneh amlanpei.

²⁸Mah kson in salungkhou tlohnohve; alamva pungkha thlengsa, lai achunna rusuunna ak am naamte in amah ahouta antheihtu.

²⁹Thra aktlohmii in thinata ringa kiring aphatu, che thranoh aktlohmii in thinata aringche pichaar aphahtu.”

³⁰“Keiin kichek kamnehruin jakhatkho tlohcheknoh ang; keiin ktheih nujuih a pichaar kitloh; che kei pichaarva akchim, alamva keita kamthlah amah in amdon khanoh a keiruin kamdonta jonnoh ang.

³¹Kei kitak kikroutata sakhi malan angle, kei sakhi i chimnoh;

³²Keirella sakhi amlan aktlei inkhat am, che amah in keirella sakhi amlankha chimta krom.

³³John akuunga trongtong namithlah, che amah in akchimrella sakhi amlanpei.

³⁴Keiin kphah sakhi i miikuung nanoh chuta mah i nannih in inkal nanphahnatu nankuunga trongi kisonchou.

³⁵Amahvah antruung meiser khasa, che nannih in lai kakturel amahvaa akvaara roomthok nandit.

³⁶Chuta John khachunga ralla akliin sakhi keita am; alamva Pa in keikuunga amlanthlou tal khata kamchenatu tloh a ammang, Pa in keita kamthlah angta kthlou in sakhi veisa.

³⁷Che keita kamthlah Pa in kei turella sakhi amlanpei. Nannih in tikni akho amah ahou theinoh mangchou, amah ahoongkho tiknikho muhnoh mangchou;

³⁸che amah atrongkha nanrilsuunga amnohmang, alamva amah in amthlah khata nannih in malotnohchou.

³⁹Nannih in ringjihta nanjon, alamva mahsuung akhanna nannih in ache amnoh ring nanphahtuta namidon; che keitu sakhiva mah anjih khasei;

⁴⁰chuta nannih in ring nanphahnatu kikuunga thleng indah mangchou.

⁴¹Keiin mii kuungnata paarthra lounoh ang.

⁴²Chuta nannih nanrilsuunga Ringpu ta rilvol i amnohchouta kromchou.

⁴³Keiin Pa akminga thlengsang, chuta nannih in keita keija a keilounohchou; aktlei inkhat in amahtal akminga thlengleva nannih in amahta nanloulohhtu.

⁴⁴Khalekruta akvei Ringpu tingnata paarthra nannih in lounoh a, inkhat in inkhatnata paarthra louva nannih in khatloh a malot nanchek ume?

⁴⁵Keiin nannihta Pa kuunga kamlaal uchouta madonnohve; nannih in matuura nansih Moses in nannihta maraal nanimlan.

⁴⁶Nannih inta Moses ta malotchoule, nannih in keita namilot tupot ang, alamva amah in keirella amjihpei.

⁴⁷Chuta amah in amjih khata nannih in malotnoh choule, nannih in kei kitrongta khatloh a namilot ume?”