Read Tarao Naga JOHN 8 Bible Online

JOHN 8 - Tarao Naga bible

JOHN 8

²Juktiing inranga amah in mathruunna thlaamma veikhat thlenglasa; mii naamte in amahkuunga thlengsei che amah in inbok a anmahta amtheih ei.

³Ringjih lulok mahche Pharisi ei in kupalaal kumei inkhatta, alaia amingirh

⁴che anmah in akuunga anson, “Lulok, amah kumei i kupasoh inlaalla amlaitalla kansuurpei.

⁵Moses trongsuur avah oinang miita lung denna thatnatu kankuunga trongthuun kanimlanpei. Amah kumei irella nang invah jangnisonjame?”

⁶Amahta janoh a maraal amithlaknatu chaang anna mah ita akuunga anson. Jisu in inkhup a tukleichunga akut majung in amjih.

⁷Amahta rui ruia an am in, amah in ngirjok a ankuunga asonei, “Nannih nankaar a aleh ak amnohluung miikhan matsah a amahta lung deenso.”

⁸Che veikhatlakho inkhup a tukleichunga akut majung in amjih.

⁹Anmah in ohchuta antheih in, anparem nata mathronna inkhat khat a inthrukirsei, che Jisu leh amaikuunga angir kumeikhopta inmahningsei.

¹⁰Jisu in intouva anche amahta ason, “Kumeio, ramche seime?” Tukhat inkho nangta namlaalnoh seime?

¹¹Kumei in ason, “Akpu, tukhat inkho keita kamlaalnohsei.” Che Jisu in ason, “Kei inkho nangta namlaalnoh sang; inlengrosa, che veikhat inlenga aleh tlohnohronoh.”

¹² Veikhatla Jisu in ankuunga trong asonei, “Kei i tukleiramtu akvaar khasang; kei kiknu akjuih mii in inthim kaara sehnohtu, chuta akringvaa akvaarkha atak ah amtu.”

¹³Mahchunna Pharisi in amahta anson, “Nang nikroutu sakhi namlan; nang sakhi i chimnoh.”

¹⁴Jisu in amsang, “Kei kikroutu sakhi malan sanglakho, kei sakhikha chim, alamva keiin ramnata thleng angme mahche ramma sehtungme krom, chuta keiin ramnata thleng angme chuche ramma sehtungme nannihva romnohchou.

¹⁵Nannihva miihoong aknujuih a pichaar nantloh, keiva tukhatkho pichaar tlohnoh ang.

¹⁶Chulata keiin pichaar tloh angle, kei pichaar tlohva chim, alamva kei kikroua pichaar tlohnoh ang, chuta kei leh che keita kamthlah amahsoh kitlohjou.

¹⁷Nannih trongsuur avah mii innihva sakhi in chimta injihsa;

¹⁸Kei kikroutu sakhi kamlan, che keita kamthlah Pa in keitu sakhi amlan.”

¹⁹Alamchunna anmah in akuunga anson, “Nangpa ram amme?” Jisu in amsang, “Nannih in keikho kei Pakho romnohchou; nannih in keita keiromchoule, kei Pakho nanrom utaning.”

²⁰Mahtrongi mathruunna thlaamsuung baobeh sihna thlaamma amah in amtheih ei, chuta tukhat inkho amahta suurnoh ei, alamva amahtu laikha tlungnohmang.

²¹Veikhatlakho anmahta asonei, “Keiin seh usang, che nannih in keita nanjontung, mahche nannih in nanleh a thiuchou; keiin kisehna a nannih in thleng cheknoh uchou.”

²²Mahlaia Judi in anson, “Keiin kisehna samma nannih in thleng cheknoh uchou” ta asonni, amah akroua inthatsam meio?

²³Amah in ankuunga asonei, “Nannihva athlang nachou, keiva achungna ang; nannihva tukleiram nachou, keiva tukleiram nanoh ang.

²⁴Keiin nannihta kisonchou mah chuvah nannih nanleh khanna thiuchou, alamva nannih in keita amahsa ta kamlotnoh choule nannih nanleh khanna thiuchou.”

²⁵Amahta anson, “Nangi tunangcheme?” Jisu in anmahta asonei, “Matsah nata keiin nankuunga kisonkhasa.

²⁶Keiin nankuunga khalmo kisontuphu mahche pichaar kitlohnatu tam am; chuta keita kamthlah amahkhavah chim, keiin amahkuung nata ktheihta tukleiramma indanga kisonpei.”

²⁷Pa rella anmah kuunga kitrongkha anmah in lou theihnohsei.

²⁸Chunna Jisu in ason, “Nannih in miiva Asa kupa khata nandomlai akhanna kei i amahsang ta nanrom umang, keiin kichek kamneh khanna jakhatkho tlohnoh ang, chuta Pa in keikuunga kamtheih khata nga tloh a trongsang.

²⁹Che keita kamthlah amah in keisoh amjou, keita kikroua keimahnoh, amahta mapelnatu lai amrel keiin thlou kitloh.”

³⁰Amah in nga tloh a trongsa, che miitam in amahta amilotpei.

³¹Amahta amlot Judi kuunga asonei, “Nannih inta kei kitrongah injommata amchoule, atatak a nannihva kei kiroisachou,

³²che nannih in akchimkhata nanromtu, mahche akchim khanna nannihta thlaang thlaang nanimveitu.”

³³Anmah in akuunga amisang, “Kannihva Abraham atuteung, chunna kannihva tunangkhat miivaa naichi louveinoh mangung. Mahchuta khatloh a ‘Nannihva thlaang thlaang mii veiuchou,’ ” ta nakson ungme?

³⁴Jisu in ankuunga amsangei, “Keiin nankuunga a tak a kisonchou, tunangkhat alehthlou aktloh miiva alehvaa naichisa.

³⁵Naichi in inna ache amnoh a amma relnoh; asa kupa vaa ache amnoh a am.

³⁶Chunna Asa kupa inta nannihta ningtamna nanimphahle, nannih in atatak a aningtam mii vei uchou.

³⁷Nannihva Abraham atutechouta krom; chulata nannih inva keita thatreita nanjonnang, alamva kei kitrongi nanrilsuunga amnatu aphom amnoh.

³⁸Keiin Pa kuungnata kimuh kimuhkhata trongsang, che nannih inkho nanpa kuungnata nantheih nantheih khata nantlohpei.”

³⁹Anmah in akuunga amisang, “Abraham vah kannih kan pa.” Jisu in ankuunga asonei “Nannih inta Abraham asa veichoule, Abraham in atlohthloukha nantloh tupotsa,

⁴⁰chuta Ringpu tingna akchimta theih a nannih nankuunga akson keita, ipekva thatnatu nanjonnang; Abraham va mainangi tlohnoh.

⁴¹Nannih nanpa in atlohthlouta nannih inkho nantloh.” Anmah in akuunga anson, “Kannihva kumei kupa inlaalla pok miinoh ung, kannih kan Pa inkhat am, mah chuvah Ringpu sa.”

⁴²Jisu in ankuunga asonei, “Ringpu ta nannih nan Pa maveichoule, nannih in keita nanrilvol tupotsang, alamva keiin Ringpu nata inthruh a thlengsang; kei kikrou kichek kamneh a thlengnoh ang, chuta amah in kamthlah ang.

⁴³Keiin nankuunga ksonni jarelnaru lou theihnoh sachoume? Mah i jarelname tihva nannih in kei kitrongta rungai cheknohchou.

⁴⁴Nannih nanpa seitan vaa atasachou, che nanpa in akditta tloh i nannih in namidon khasa. Amahvah akungnata mathronna miithat mii, amahkuunga akchim atlohnatu amnohluung, alamva amahkuuga akchimluung amnoh. Amah in amchinthivaa atronglaia, amah atak a am anono khata trong, alamva amahvah amchinthi, che amchin apasa.

⁴⁵Chuta keiin nankuunga akchimkhata kisonrel, nannih in keita kamlotnohchou.

⁴⁶Nannih nankaar a keita alehchel namithlaknoh angme? Keiin akchimta am angle, jarella kamlotnoh choume?

⁴⁷Ringpu ata akveimii in Ringpu trongson arungeih; jarelna, nannihva Ringpu atanohchou churella Ringpu atrongta rungainohchou.”

⁴⁸Judi in amahkuunga amisang, “Nangva Samaria na mii che chuche khousaar chuung miicheta nikuunga kansonni chimnoh ungme?”

⁴⁹Jisu in amsang, “Keiva kousaar chuung noh ang; chuta keiva Pa ta injah ang, nannih inva keita kanjahnoh chou.

⁵⁰Chuta kei kikroutu paarthratna jonnoh ang; mahchuta onna akjon Mii khat am amah in pichaar atlohtu.

⁵¹Keiin nannihta taktak a kisonchou, tunangkhat in kei kitrongta ngaak a majuih choule, mahmii khavah tikniakho kthi muhnohluung usa.”

⁵²Judi in amahta anson, “Ipek inih in irompei mah chuvah nannihva khousaar chungsachou, Abraham in thisa, ringraankho thisei; chuta nangin nisonva, ‘Tunangkhat in keitrong ngaak a majuihleva, amah in kthi tiknikho matemnohtu.’

⁵³Kan pa Abraham athihche nuaa nangin liinsacheme? Ringraankho thisei! Nang nikrouta tu angmeta insooncheme?”

⁵⁴Jisu in amsang, “Kei kikrouta paarthratna mavei angle, kipaar thratna i jakhat khonoh; keita paar kamthratva nannih in Pa ta nan ong keipa in paar kamthrat ang.

⁵⁵Chuta nannih inva amahta romnohchou; keiinva amahta krom. Keiin amahta romnoh angta sonangle, keikho nannih nanga chinthi veisang; chuta keiva amahta krom churella amah atrongta ngaak a kamjuih.

⁵⁶Nannih nanpa Abraham in kei kiknita kmuhtu ta aroomthok; amah in ohchuta amuh a aroomthoksa.”

⁵⁷Mahchunna Judi in akuunga anson, “Nangva kum sopngakho phahnoh mangche, che nangin Abraham ta nimuhpeime?”

⁵⁸Jisu in asonei, “Keiin nannihta taktak a kisonchou, Abraham apoknoh maa a kei louamsang.”

⁵⁹Chunna amahta andennatu lung anchunpei; chuta Jisu vah inthupsa, mahche mathruunna thlaamnata inthruhsa.