Read Tarao Naga NOONNA THLOU 10 Bible Online

NOONNA THLOU 10 - Tarao Naga bible

NOONNA THLOU 10

¹Keisaria a akming Kornilias an ong Itali na raalmii reija akpuui mii khat louam,

²amahva akchimlamseh che taploikuung apumma Ringpu ta trihmii inkhat, mahche mii kuungah aril liinna amlantheih khatkho Ringpu kuunga tranga akngenmii.

³Nikhatni pung kuvak a Ringpu vaa ringroi inkhat in amahkunga thlenga Kornilias kuunga asonkha ahamuhkhat a thra a amuhpei.

⁴Cheva amah in trihkanga anche ason, “Akpu mah i Jangsame?” Mahchunna ringroi in amahta ason, “Nangin ningen mahche namlan eikha Ringpu amaikhuunga koroutu veia kalsa.

⁵Ipek kupa eita Joppa a mathlah eiro, che Pitar ta an ong Simon ta thlengpi eiso.

⁶Amahva savun akseem Simon soh amjou, amah innva tuiiboom apaalna.”

⁷Amahkuunga aktrong ringroi in ansehnua, amah roijuih ankaar nata innihche amah in atirh akjuihtrang raalmii anaamkaar a akchimlamseh inkhatta aongpei,

⁸amah in maisoh inkeih a alamtanga asoneiche anmahta Joppa a amthlahpei.

⁹Mahchuche akhuvar a anmah in lamma nga tloh a ansehlai, khuuboom innaisei, pung kurukvak a Pitar in angennatu inchunga kalsa.

¹⁰Cheva avon traamma jangmekhat asaakjasa; atak in intrinanga amuh inkhatta muh a amsa.

¹¹Che ringram inhoongsa mahche jamekhat inrolh intlaapkhat thalei akiing manlia amthlak amuhpei.

¹²Mahchunna alamtanga saak iin injao, avonna intolla akseh che akjuung vaakho injaosei.

¹³Mahche amahkuunga ahoukhat thlengsa, “Pitar, inthouro, that a saaro.”

¹⁴Chuta Pitar in ason, “Akpu, mahchunoh; alamva keiin tiknikho sakmangleh akseengnoh lousanoh ma ang.”

¹⁵Khatla veinitihpi hou amahkuunga thlenglasa, “Ringpu in amseengche pootta nangin seengnoh ongnoro.”

¹⁶Mah i veithumkhek inlenga nga tloh a suuksa, cheva kak hanga pootkha ringramma ahanpei.

¹⁷Ipek Pitar in amuh ahamuhkha arthata inhalla amsuunga; anro, Kornilias in amthlah kupa in Simon innkha khometa thonga ngirra amsei

¹⁸cheva anmah in Pitar ta an ong Simon kha amah khanna ammeta anruipei.

¹⁹Mahche Pitar in ahamuh kharelna anhalsuunga, Li in amahkuunga ason, “Anro, kupa inthum in nangta nakjonei.

²⁰Inthoua trumro, che niril inhal tlonoh a anmahsoh inruuijouro; alamva anmahkha keiin kamthlah ei.”

²¹Cheva Pitar in trumma anmah kuunga asonei, “Nannih in nanjonkha keisang, jarelna thlengchoume?”

²²Anmah in anson, “Raalmii reijapuui, akchimlamseh che Ringpu ta trihmii, Judi jatih apumtein antrongna Kornilias in nangta amah inna nithlengnatu che nang nitrongta arungeihnatu akseeng ringroi in amahkuunga amthlahpei.”

²³Chunna anmahta aongche amah inna asih ei. Akhuvar a amah in inthoua anmahsoh inruuia sehsa, mahche Joppa tingna unaopasa ste in amahta anruipei.

²⁴Akhuvar a anmah in Keisaria a luutsei, Kornilias in anmahta ngaak a mahche ataploikuung unaoeisoh che anthringpi apaieita onga a ampiei.

²⁵Pitar in asuunga aluut in, Kornilias in amahta antuukpipei che amah akehkungah inriilla amahta amthruunpei.

²⁶Chuta Pitar in amthohche ason, “Ngirro; keikho miiang.”

²⁷Cheva amahsoh trongjoua asuunga luutsei che miitam amjou antuukpipei.

²⁸Che anmahta asonei, “Nantak Judi khat in aktlei jatih khatta inruuipi chunohleh intuukpi i khatloh a trongsuura tlohphunoh ta nanrom, chuta keiin tukhatta sakmang chunohleh akseengnoh tih a kiongnohnatu Ringpu in kammuh peiang.

²⁹Chunna mairella keita kamthlah anga, keiin indahnoh luunga thlengsang. Nannih in jarelna keikuunga mii namithlah meta kiruinachou.”

³⁰Kornilias in ason, “Nijan manli amaa a, pungku atlak in, keiinna ngenna ammang; cheva anro, antleh puunrei silh a kupakhat kimaa a ngirsa,

³¹amah in ason, ‘Kornilias nangin ningenkha kitheihpei, che nangin niril liinna namlan eikha Ringpu amaa a antheihpei

³²alamchunna Joppa a akming Pitar an ong Simon ta ongnatu mii mathlahro; amahvah tuiiboom komma am savun akseem Simon inna tlunga amsa.’

³³Chunna kak hanga nangkuunga mii kamthlah, nangin nithlengi khalmo tlansa. Alamchunna Akpu in nangkuunga trongthuun amlan naamteta kanrungeih natu ipek kannaam Ringpu amaikuunga amsung.”

³⁴Mahchunna Pitar in aanga ason, “Taktak a keiin kirom mah chuvah Ringpu va keimii miimii manainoh,

³⁵chuta amahta aktrih jaatboom eita khatkho akchim aktloh miita amahkuunga loulouphu suuk.

³⁶Amah in Israel kuunga trong amthlahkha nannih in namrom, leh oi vaa akthra trongta Jisu in araan (amah in anaamtetu Akpu sa),

³⁷Judia ram pumteta sonna amdangnakha John in alupnua Kalili nata mathronna araanpei:

³⁸Ringpu in khatloh a Najareth vaa Jisu ta Akseeng Lia che tuuisoh thao apoime; khatloh a amah in akthra thloutloh a mahche seitan in akroieita mathrat a amunrelta seh, alamva Ringpu in amahta anruuipi.

³⁹Amah in Judi ei ramboom leh Jerusalem annih a atlohthlou anaamte relna kannih in sakhi veisung. Jisu ta thingkharh a mathoia anmah in anthatpei;

⁴⁰chuta Ringpu in amahta nithum tihpia thinata amringpei mahche indanglonga inmuhsa;

⁴¹mii naamtein muhnoh eichuta Ringpu in acharche kannih in sakhitu veia kanmuhpei, amah in thinata aringche amahsoh kansaak kan iinjoupei.

⁴²Akringei mahche akthiche eita pichaar tlohnatu Ringpu in akseengthlou tlohnatu phom athunni amahmii isa ta mii kuungah akthratrong anraan mahche sakhi malannatu amah in trongthuunta kanimlanpei.

⁴³Ringraan annaam in amah relna sakhi amilan mah chuvah amahta amlot mii naamte in amahminga alehnahta in ip anphahtu.”

⁴⁴Pitar in trong ita asonlai aktlei mii naamte chunga Akseeng Li trumsa.

⁴⁵Cheva Pitar soh thlengjou amlot mii ankaarna in salungkhousei, alamva Jental anchungakho Akseeng Li apoihpei.

⁴⁶Alamva anmah in aktlei tronga trongsei Ringpu ta inkaanga amipaakta anmah in antheihpei. Mahchunna Pitar in ankuunga sonna amdangva,

⁴⁷“Inih in Akseeng Li iphah nangjimma akphah eita lupnatu tunangkhat in tuiita ithingchek ume?”

⁴⁸Cheva anmah in Khrista minga lupnatu anmah kuunga jathang amlannei. Mahche anmah in Pitar kuunga kak anmahsoh amjounatu anngenpei.