Read Tarao Naga NOONNA THLOU 11 Bible Online

NOONNA THLOU 11 - Tarao Naga bible

NOONNA THLOU 11

¹Ipekva Jental jaat inkho Ringpu trongta anrouloh peita Judia a am unaopasa inkho antheihpei.

²Mahchunna Pitar in Jerusalem ahanglai, avuntan ruul in amahta trong injetpia,

³anson, “Jarella nangin avuntan mii kuungah seh a nisaakpi eime?”

⁴Chuta Pitar in ankuunga thra matheih a intlaanga son amthronpei:

⁵“Keiin Joppa khuuboomma kingenlai, stuuipa in keidolh a kiamlai ahamuhkhat a intlaapkhat nanga trumma, ringram akiing manli nata amthlaak kimuh; mahchu kikuunga trumsa.

⁶Mahchuta innaia kian in akeh manli amsa inkhat in inkhatta that a aksaa raprilsaei, intolh a akseh saei, mahche marvaanna va ei kimuh ei.

⁷Che ahoukhat in keison kitheihpei; ‘Inthouro, Pitar; that a saaro.’

⁸Chuta keiin kison; ‘Mahchunoh, Akpu; alamva akbuur mahche akseengnoh, kbaoa tiknikho luutnohmang.’

⁹Chuta ringramtingna ahouin veinih tihpia amsangpei, ‘Ringpu in amseengche eita buur tih a lounohro.’

¹⁰Mah i veithum suuksa, cheva anaamte ringramting ahanpei.

¹¹Mah laitalla kupa inthum kan amna a tlungsei, anmahva Keisaria nata keikuunga amithlah ei.

¹²Inkaang inniim mathlinnoh a anmahsoh sehjounatu Li in keita keisonang.

¹³Khatloh a ringroi in amah a inna ngir amuhmeta kanisonung che atihpei, ‘Joppa ah tumekhatta mathlah a akming Pitar an ong Simon ta thlenso;

¹⁴nangleh nitaploikuung apumtein chaanring nanphahnatu amah in akthra trongta nangkuunga araantu.’

¹⁵Keiin trong kamthronlai, Akseeng Li thlengnanga, antak chungakho thlengsa.

¹⁶Mahchunna Akpu in khatloh a asonme keiin intheihsang, ‘John inva tuiia naniluppei chuta nannihva Akseeng Li in naniluptu.’

¹⁷Inih in Akpu Jisu Khrista ta imlotlai Ringpu in inimlan kuttholta intrimbenga anmah ankuungakho malanleva, Ringpu ta andah a akthlengchek kei i tusangme?”

¹⁸Mahtrong ita antheih in anmahva daichritsei. Mahche Ringpu ta paar mathrat a ansonpei, “Cheva Ringpu in Jental jatihkho anril mathlenga chaan amphah ei.”

¹⁹Ipekva Stephen hunhaia Akpu amlot mii eita anchutpeia inthektlamsei, anthek eikha Phonikia a Saipras a mahche Antiok phah a inlaa a sehsei, Judi noh a aktlei jaat a trongkha raannoh ei.

²⁰Chuta Saipras a mahche Sairini na mii arouin Antiok a thlenga Kriik trong aktrong Judi ankuunga trongei mahche Akpu Jisu ta anraanpei.

²¹Mahche Akpu akut in anmahta anruuipiei, mahchunna miitam in malot a Akpu tinga inheisei.

²²Mah trongraanni Jerusalem ah am Khakla amikur a tlungsa, cheva anmah in Barnabas ta Antiok a amithlahpei.

²³Amah in athlenglai Ringpu vaa malungsita amuhpei, che amah in aroomthoksa; anmah in Akputa malot a chet a an amnatu annaamta ril amthokei;

²⁴alamva amahva Akseeng Li in khatkho malot ah sip akthra mii. Mahche miitam Akpu kuunga athlenei.

²⁵Nga tloh a Barnabus in Saul ta ajonnatu Tarsas a sehsa;

²⁶cheva amahta aktuukpeia, Antiok a athlenpei. Alamva kumkhattluun anmah in Khakla soh intuuk a miitamta anmitheih; che Antiok a aroieita matsahremma Khristen ta an ongpei.

²⁷Pekva mahlaia ringraan in Jerusalem nata Antiok a thlengsei.

²⁸Mahche ankaarna khat akming Akabas in ngirra tukleiram apumta trihkhop saakchaal suuktuta Li in matsah a amphoongpei; che mah i Klaudias in apaallai suuksa.

²⁹Mahchunna aroi in anchek anchek nujuih a, Judia a ak am anmah unaopasa ankuunga majoomna mathlahnatu ngirsei;

³⁰Che thlouchu antlohpei, majoomnachu Barnabas leh Saul kut ah mathlah a anparuul eita anmiphahpei.