Read Tarao Naga NOONNA THLOU 13 Bible Online

NOONNA THLOU 13 - Tarao Naga bible

NOONNA THLOU 13

¹Pekva Antiok ah am khakla ah raangroiei, lulok ei, Barnabas, Niker an ong Simeon, Sairini na Lusias, Herot koolla akjao Manian mahche Saul,

²anmah in Akputa amithruunlai mahche buh hella anngenlai, Akseeng Li in ankuunga asonei, “Thlou antlohnatu keiin kiong Barnabas leh Saul kha kei turella threk eive.”

³Cheva buh hella anngenche ankutta anchunga ansihche anmahta amithlahpei.

⁴Li Akseeng in amthlah eia anmah in Seleukia a jungsei, che mah khannata Saipras a muli chuunga sehsei.

⁵Anmah in Salamis antlunglai, anmah in Judi ei Sinakokrel Ringpu atrongta anraan. Che anmahta majoomnatu John ta amiruui.

⁶Tuiikoiram ta anmah in vanna Paphos a anseh in, mahchunna leiva aktloh theihsoh che chimnoh ringraan akming Bar — Jisu an ong Judi khatsoh intuuksei.

⁷Amahva Serkias Paulas antih rampuui khatsoh inruuimii, mahmii rampuui in Ringpu trongta arungeihja hanga Barnabas leh Saul ta aongei.

⁸Chuta rampuui in amlot khannata mathlahnatu leiva theih Elimas in (alamva amahmingi amilengin mainanga suuk) anmahta athingei.

⁹Chuta akming Paul kho an ong Saul in Li Akseeng sip a amahta antlinga ason,

¹⁰“Seitan asa kupa, akchimlamseh naamteta andah mahche billam mii masimna miileemleh thranoh in sip nang, Akpu vaa antluun lamta amkor dongnoh umangcheme?

¹¹Chunna pekva anro, nang nichunga Akpu akut am, nimit chotu mahche lai kak kini muhcheknoh uche.” Kak hanga sumphai leh inthim in achunga tlasa mahche amah akutta matuh a ansehpinatu miita maalla ajonpei.

¹²Cheva rampuui khanna aksuuk thloukhata amuh inva amlotpei, alamva Akpu rella amitheihna khanna amahva salungkhou khemsa.

¹³Pekva Paul mahche anruuipiei in Paphos nata Pamphilia khuuboom Perka a muli chuunga thlengsei. Mah khanna John in anmahta amah eiche Jerusalem a inlengsei;

¹⁴chuta anmah in Perka nata Pisidia na Antiok ah thlengsei. Che sabat nia anmah in sinakok a luut a inboksei.

¹⁵Trongsuur nata che ringraan in amijih niriknata anpaache, sinakok akpuui ei in anmah kuunga mii mathlah a anson, “Unaoeio, miita bungthoknatu nantrongsam amchoule, mahchu sonve.”

¹⁶Ochunna Paul in ngirra akut a khoh an ason, “Israel ei mahche Ringpu aktrih eio, rungaive.

¹⁷Israel vaa Ringpu in ipa ipu eita acharpei mahche anmah in Ijip a an amlai anmahta matheih matamma amliinei, che anmahta akutbaanga domma mah khannata anthruhpiei.

¹⁸Che raprilla kum soplivak anruuipiei.

¹⁹Che amah in Canaan ramma jaatboom sirihta ammaangche, anpa anpuin an amna ram phahphu veia anmahta amlannei, mahkha kum reija manli alei sopngavak luut.

²⁰Mahchuche aknua ringraan Samuel phah a amah in trongtloh eita amlannei.

²¹Che anmah in kurung khat thunnatu annihpei; chunna Ringpu in Benjamin jatihna Kis asa kupa Saul ta kum sopli anchunga paalnatu amlannei.

²²Che Ringpu in amah aphomnata alohche, Davit ta anmah kurung amveipei; mah churella sakhi veia asonpei, ‘Keiin Jesi asa kupa Davit kuunga kiril kikditta kphahpei, keiin kamdon anaamte amah in atlohtu.’

²³Ringpu atrongchet nujuih a mahmii atute a Israel ta Akkal Jisu amthlahpei.

²⁴Amah in athlengnoh maa a Israel annaamte in anril thlengatu John in trong araanpei.

²⁵Mahche John in athlou achetumma asonei, ‘Nannih in keita tumeta namidon angme? Keiva mahmii khanoh ang, chuta amahva kiknua thlengmang, keiva amah akehkhraang arui majakho kimtik amnoh.’

²⁶“Unaoeio, Abraham innsuungvaa asa kupaeio, mahche nannih nankaar a Ringpu aktrih eio, inihkuunga amah chaanringvaa akthra trongi amthlahpei.

²⁷Alamva Jerusalem a am mii mahche anchunga akpaalei in Akpu ta asak maromnoh ei, chekho sabat nirel anpaa ringraanei antrongta lou theihnoh ei, amahta malaalla, matsah a inphoongche khata amithlungna amiveipei.

²⁸Amahta thatnatu alam tuuknoh seiklakho Pilat kuunga annihpei.

²⁹Che amahrella injih naamte anmah in amithlungpei, amahta thingkharh nata anlohche rusuun khat a ansihpei.

³⁰Chuta Ringpu in amahta kthinata amringpei;

³¹mahche Kalili nata Jerusalem a athlengpijou mii ankuunga nijan khalmo soot a atakta ammuh ei, anmah in pekva mii kuungah sakhi veisei.

³²Che ipa ipu ankuunga Ringpu atrongchet akthra trongraanta nankuunga kanthlenchou,

³³Jisu ta amringche anmah ansakuunga mah ita amthlungpei; che mah i leila nirik innih tihpia injih inangsa, ‘Nangva kei kisa kupache, mi in keiin nangta kpokpeiche.’

³⁴Che amah in athihche amringpei, che kmaang kremma veikhat inlengnoh usa, nga tloh a amah in ason, ‘Keiin Davit vaa akseeng mahche doieita kamlan uche.’

³⁵Alamchuna aktlei leila nirik akho ason, ‘Nang nimii akseeng khata nangin akthi mamuhnoh uche.’

³⁶Davit relnava, amah atak ringnatluun in Ringpu in amdonrouta atlohche thisa mahche apa apu rusuunpiia amahkho anphuumpei, che aruungin thusa

³⁷chuta Ringpu in amringche amah invah thi muhnohsa.

³⁸Alamchunna unaoeio, maita nankuunga marom kikdit mah chuvah amah apaalla alehnata ipnatu trongi kanraanchou.

³⁹Moses vaa trongsuur apaalla nannih in alehnata nanningtam phahnoh choukha amahta malot apaalla mii naamtein alehnata ningtam nanphahpei.

⁴⁰Ringraanei in anson nirik a injih eikha nantak a tlaknohnatu cheksilve.

⁴¹‘Anve, mii manuihtrang eio, salungkhouve maangve; alamva keiin nannih laia thloukhat kitloh, mii khat in mahchu nankuunga sonna marom slakho, thloukhat i nannih in tiknikho malotnohchou.’ ”

⁴²Anmah in anthruhsoh, mah ivah akthleng sabat nia anmah kuunga ansonnatu mii in inruruh a ansonpei.

⁴³Mahche sinakok a inchunkha ankoisoh, Judi mahche Judiei heikoh a akluut Ringpu ta ril luut a amlot miitam in Paul leh Barnabas annuuta anjuihpei, raangroi in anmah kuunga tronga che anmah in Ringpu vaa malungsia chat amnoh a an amnahtu antak ei.

⁴⁴Akhuvar sabat nia khuuboomna miitam in Ringpu trongta rungeihnatu inboomsei.

⁴⁵Chuta Judi in miitam khata anmuh inva, anmah in kallak a phuulsei, Paul in ason trongkhata mathleng tlamma anmahta andah a inhaangkanga trongsei.

⁴⁶Mahchunna Paul leh Barnabas in pirkenga a trongseia antihpei, “Matsahrem kannih in Ringpu atrongi nannih nankuunga sonnoh janohsa. Chuta nannih inva mah i indahschou, mahche ache amnoh ringna phah i nantaksaak in matik chanohta pichaar nantlohsaak taningva, anve kannihva Jental tinga inheia sehsung.

⁴⁷Alamva nga tloh a Akpu in kankuunga trongthuunta malanna kanisonpei, ‘Keiin nangta Jental jatih turella akvaar kamvei peiche, mahchunna thalei achenakhem phah a nangin chaanringta nithlennatu.’ ”

⁴⁸Mah ita Jental jatih in antheih inva anmah in anroomthoksa mahche Ringpu trongta paar anmithratpei; mahche ache amnoh ringna phahnahtu ancharmii in anmilotpei.

⁴⁹Mahcheva Akpu trongta anmah ram avel apumtea anraanpei.

⁵⁰Chuta Ringpu ta ril luut a amlot kumeiei, injah aja kumeiei mahche khuuboomna aklok kupa eita Judi in hou masuuk a, che Paul leh Barnabas ta andah a anchutche, anmah ramsiintinga aminompei.

⁵¹Chuta anmahta andahna veia ankehna uphulta antatche amithiimpei, cheva Ikoniam a sehsei.

⁵²Mahche aroi eiin roomthok khatkho Li Akseeng in sipsei.