Read Tarao Naga NOONNA THLOU 14 Bible Online

NOONNA THLOU 14 - Tarao Naga bible

NOONNA THLOU 14

¹Pekva Ikoniam a Judi ei sinakok a luutjousei, che anmah in antrongin Judi leh Kriik khalmo tam in Akpu amilotpei.

²Chuta amlotnoh Judi ei in Jental eita hou masuuknatu anrok mahche anmah unaota tuur thunna chirol antlohpei.

³Chunna anmah in Akpu relna karaang kanga tronga mah khanna soot amsei, anmah ankut a daang jikcha mahche salungkhouna thlou jikcha tloh a Akpu amlungsivaa trongrelna sakhi veisei.

⁴Chuta mah khuuboomna mii eikha ajejea inthreksei, mii arouin Judi ei toonga, mahche aktlei arouinla raangroiei toonga amsei.

⁵Jental leh Judiei in anmah ramngaak eisoh amahta manangnatu mahche lung dennatu ansuulpei,

⁶ta mahchuta anrom inva Likaonia vaa khuuboom Listra leh Derbe che amah aveel ramboom a tlaansei;

⁷che mahram chunna akthra trongta anraanpei.

⁸Pekva Listra a akeh sehtheihnoh a pok akehtu kupakhat inbok a am.

⁹Paul in atrongta amah in minna arungeih; mahche keita kamthrattung ta amah in amlotkha Paul in amuh a amahta antlinga,

¹⁰arool inkaanga ason, “Nang nikehkhan chimma ngirro.” Chunna amah in inthomma sehsa.

¹¹Paul in atlohthlouta miitam in anmuh inva anrool makaanga Likaonia tronga asonpei, “Rappu eiin miihoong loua inihkuunga trumsei.”

¹²Anmah in Barnabas ta akming Jias antihpei che Paul ta akming Hermes antihpei, alamva amahva akthloi trongraansei.

¹³Khuuboom amaatalla am mathruunna thlaamma Jias vaa thiimpu in mii tamsoh inthiimna a ankatja relna siilchal leili leh reikuul eita palthonga anthlenpei.

¹⁴Chuta raangroi Barnabas leh Paul in mahchuta antheih a, anpuunreita anthritche miitam ankaar a luutthop a ongsei,

¹⁵“Miieio, jarella mah i nantlohme? Kannihkho nannihsoh intrim miiung, nannih in mainang akanana amnoh thlou ita nga tloh a ringram, thalei, tuiiboom mahche mahsuunga am pumteta akseem akring Ringpu kuunga nanheinatu nankuunga akthra trongta kanthlenchou.

¹⁶Akcheche ringnatluun na amah in jaat naamteta anmah in amidon lamma ansehnahtu ajehsei;

¹⁷chuta amahtu sakhi amnoh avah mahnoh, alamva amah in marvaanna khuta masuur a akthra manjangnuram inimlan; amah in akthrata atlohpei, saak iin mahche roomthoksoh inruuia nannih nanrilta ampelpei.”

¹⁸Mah trongchu ansonphao mii in anmah kuunga inthiimnahtu poot ankatsam luungkho anmah insuulla matlohnoh ei.

¹⁹Chuta Antiok leh Ikoniam nata Judi arouin mah khanna thlengsei; mahche mii eita anmisohpei, anmah in Paul ta lunga andenche thi inaisa amidonna khuuboom apaalla ankaipei.

²⁰Chuta aroi eiin amahta kooia an amlai, amah in inthoua khuboomma luutsa; mahche akhuvar a amah in Barnabas soh Derbe a sehsei.

²¹Anmah in khuuboom khanna akthra trongta anraanpei mahche aroi tam anseemche anmah in Listra, Ikonia mahche Antiok a inlengsei,

²²aroiei anlita matranga mahche malottinga inngainoh natu anmahta bungthok a asonei, trihkhop a klah knang jikchata doua inih in Ringpu kurung huunna a luut ume.

²³Mahche anmah turelna khakla relta anmah in anparuulta phom anthunei, che buh hella ngenna anmah in amlot mii eita Akpu kuunga amisilei.

²⁴Mahche anmah in Pisidia inthruh a ansehche Pamphilia a thlengsei.

²⁵Che anmah in akthra trongta raanna amilanche Attalia a jungsei;

²⁶mahcheva anmah in amipaangthlou kharelna Ringpu vaa malungsi in anmahta amisilna amun Antiok phah a muli chuunga thlengsei.

²⁷Mah khanna antlungin khakla anaamteta matlonna amichunche Ringpu in anmah anpaalla antlohthlou naamte che Ringpu in Jental jaat in amilotnatu akhaar amhoong peita anmah kuunga sonna amidangpei.

²⁸Che anmah in aroi eisoh inruuia mahmun khanna soot amsei.