Read Tarao Naga NOONNA THLOU 15 Bible Online

NOONNA THLOU 15 - Tarao Naga bible

NOONNA THLOU 15

¹Chuta Judia nata mii arouin thlenga unaopasa eita amitheihva, “Moses trongthuun nujuih a nannih in nanvun tannoh chouleva nannihta nanikalnohtu.”

²Mahchunna Paul leh Barnabas in anmahsoh injahnoh a trong inngei insinsei, mahtrong inruiina relnava Paul leh Barnabas mahche aktlei mii arouta Jerusalem a raangroiei mahche anparuul ankuunga anhangnatu thlou anthunpei.

³Nga tloh a khakla in anmahta mathlah a anmah in Phonikia mahche Samaria inthruh a anthleng in Jental jatih in anril anthleng kharelna antongpei, mahchunna khalmo anroomthokta unaopasa kuunga amidangpei.

⁴Anmah in Jerusalem anthlengsoh khaklana raangroiei mahche anparuul eiin anmahta roomthok a anlousonpei, che Ringpu in anmah anpaalla atlohthlou anaamteta anmah kuunga ansonpei.

⁵Chuta Pharisi nata amlot mii arouin ngirra anson, “Anmahta anvun tannoh janoh, mahche Moses vaa trongthuunta majuihnatu anmahta chaaknoh janoh.”

⁶Mairelna intelna raangroi leh anparuul eiin inboomma intuuksei.

⁷Anmah in trong soot a anngeiche aknua Petar in ngirra anmahta asonei, “Unaoeio, nannih in nanrom mah chuvah keiin Jental jaat in kanarnata akthra trongraanta theih a amilotnatu matsah a Ringpu in ikaarnata keita keicharpei.

⁸Miirilta akrom Ringpu in ankuunga sakhi amlanpei, inihkuunga Akseeng Li amlannanga anmah kuungkho Akseeng Li amlanpei,

⁹mahche inihleh anmah ikaar a inthliin jakahtkho sihnoh, chuta malot apaalla anmah anrilta amseengpei.

¹⁰Mahchunna pekva ipa ipuinkho che inih inkho roon icheknoh potrik rukolta aroi anriingchunga thoonga nannih in Ringpu ta jarella chaang nan anme?

¹¹Chuta inih in imlot mah chuvah anmah nanga Akpu Jisu Khrista vaa malungsi apaalla inihkho inikaltu.”

¹²Paul leh Barnabas anpaalla Ringpu in Jental Jaat ankaar a daang mahche salungkhouna thlou jikcha atlohrella ansonta anrugeih in mii inboom annaamte daichritsei.

¹³Anmah in trong ancheche, Jems in amsang, “Unaoeio, keiin kisonni minna rungaive,

¹⁴Simeon in inisonpei Ringpu in amah akming turelna anmah ankaar nata mii ruulkhatta alohnatu khatloh a Jental jatih a seh a an anme.

¹⁵Ringraan antrong leh maisoh injaei, mah i nga tloh a injihsa,

¹⁶‘Maiche aknua keiin inlengtunga, Davit in a amna inn inthrit khata keiin kiseemlatu; tumma akmaang khata keiin kiseemlatu, che mahchuta keiin kamngirhlatu,

¹⁷mah chuvah anlei mii eiin mahche kei kikming ak ong Jental jaat naamtein Akpu ta anjontu,

¹⁸mah namte i Akseem Akpu akromin ason.’

¹⁹“Alamchunna kei pichaarva maisa, mah chuvah Jental jaat in Akpu kuunga inheisei inih in anmahta malaannoh eirei,

²⁰Chuta rappu ramnaia ankatpoot seengnoh mahche ariing raak a anthatsa khatkho thii saa iin antlohnoh nahtu majihreio.

²¹Alamva amaa leithingna ringnatluun jikchanata khuuboomrel Moses vaa trongthuunta raanna thlengsei, sabat nirel Sinakok ah paa a thlengsei.”

²²Chunna Antiok ah amithlah angroi leh anparuulsei mahche khakla naamtein thratuta ngirsei, anmah in unaoei ankaar nata Barnabas ta an ong Judas leh Silas ta charra anmithlahpei,

²³amah athlangna trongjihthuun isoh amithlahpei: “Raangroi leh anparuul mahche unao pasa in Antiok ah, Siria mahche Silisia ah am Jental jaatna unaopasa nankuunga kamithruunchou.

²⁴Kannih in kamitheihnoh kankuung nata mii arouin nannihta mah trongin insuuk inhal nanimphahpei mahche nanrilta machetnohsa ta kantheihpei,

²⁵kannih in inkhatveia mii ste char a, anmahchuva kanringvol Barnabas leh Paul ta mathlah i thratuta kanjapei

²⁶anmah in inih Akpu Jisu Khrista rella anmah anchaan rou anjapei,

²⁷churella kannih in Judas mahche Silas ta kamithlahpei, kannih in kanjanakha anmah in nankuunga anson usa.

²⁸Amah darkaar inoh a akliin potrik amnoh i Akseeng Li in mahche kannihting thrasata kamidonpei;

²⁹mah chuvah rappu ramnaia ankatpoot akseengnoh saakphu saanoh, kupa kumei aleh thloua sehnoh, mahche ariing raak a anthat mahche thii saa iin nata nannih in inpelve. Mainang nata nannih in inpeelchoule, nannihting akthra veitu.”

³⁰Nga tloh a anmahta amithlahpei, anmah in Antiok a jungsei; mahche amlot kulsa eita anmitlonche, trongjihthuun chuta ankuunga amilanpei.

³¹Anmah in mahchuta anpaache rilthokna trongkhanna anmah in anroomthoksa.

³²Ringraankho vei Judas leh Silas in unao eita trongla jikcha a anmah arilta thok a amitrangei.

³³Anmah in kak an amche, unao pasa eiin amahta amthlah miikuungala leh oia amithlahpei.

³⁴Chuta Silas in mah khanna a am in thratu kamdon.

³⁵Chuta Paul leh Barnabas vah aktlei mii eisoh Akpu trongta matheih a che raanna Antiok a amsei.

³⁶Nijan kak aknua Paul in Barnabas ta ason, “Inih in akthratrong iraan iraanna khanna veikhat inlenga khuuboomrel ak am iuhnao eikha khakha am eimeta anneiro.”

³⁷Barnabas invah Mark ta an ong John ta anmahsoh inruuia ansehpija.

³⁸Chuta Paul in Pamphilia a inpella inmah chuche anmahsoh thloutloh sehjounoh a anmahta inruuipi i thranohtuta Paul in amdonpei.

³⁹Anmah ankaara injanoh a khalmo anjetrella anmah in khatleh khat inthreksei; Barnabas in Mark ta phurh a muli chuunga Saipras a sehsei,

⁴⁰chuta unaoei in anmahta Akpu vaa malungsia amisilh peitaningva Paul inva Silas ta chaar a sehsa.

⁴¹Che amah in Siria mahche Silisia vanna seh a khakla anlita amitrangei.