Read Tarao Naga NOONNA THLOU 16 Bible Online

NOONNA THLOU 16 - Tarao Naga bible

NOONNA THLOU 16

¹Che amah in Derbe leh Listra akho sehsa. Mahchunna aroi inkhat akming Timothi Judi kumei khat Ringpu amlotvaa asa kupa; chuta apavah Kriik jaat.

²Amahvah Listra leh Ikoniam a am unaoei in khalmo ansoolna mii.

³Paul inva Timothi ta anruuipija, amah amunna am Judiei relna Paul in amah avunta atan, alamva amah apavah Kriik ta annaamtein anrompei.

⁴Anmah in khuuboom khuuboomma vanna anthleng in, Jerusalem a am raangroi leh anparuul ei in anmithlak trongirhnata anmah kuunga amilanpei.

⁵Nga tloh a khakla ei in malotting huktrangei mahche akni aknileh mii ahanralpei.

⁶Akseeng Li in Asia a akthra trongraan athingrella anmah in Phrikia mahche Kalatia ramta phaova sehsei.

⁷Che anmah in Misia amaatalla anthlengche, Bithinia ah sehnatu insuulsei, chuta Jisu vaa Li in anmahta maluut janohsa.

⁸Chunna Misia phaova anmah in Troas a jungsei.

⁹Mahche Paul in khulouh a ahamuhkhat amuhpei. Mesidonia na kupakhat in ngirra akuunga ngenna ason, “Mesidonia ah sehnatu thlouraang kantlohpei, mahchunna akthra trongta anmah kuunga raannahtu Ringpu in kaniongpeita ngirsung.”

¹⁰Chunna amah in ahamuh khata amuh inva anmah kuunga akthratrong iraannatu Ringpu in inihta iniongpeita kak hanga Mesidonia a sehnatu ngirsung.

¹¹Alamchunna Troas nata kannih in chimma Samothras phah a muli chuunga sehsung, mahche akhuvar a kannih in Nepolis a,

¹²Mesidonia ramsiinvaa amuvei khuuboom mahche Rome in amtuh ram Philiia a sehsung. Mah khuuboom in kannih in nijan kak nichuunga amsung;

¹³mahche sabat nia kannih in kololthong apaal avaakom khat a sehsung, mah khanna ngennamun amkho ajata kamidon, che mah khanna inchunna am kumei ankuunga trongsung.

¹⁴Kannih kantrongta arungai kumei akmingva Lidia, amahva Thijatira khuuboomna, mangkra amchu puun akjuur, Ringpu ta amthruun kumei. Paul in asonta aril amluutnatu Akpu in arilta amhoongpei.

¹⁵Che amah kumei khatkho ataploikuung annaamta kanlup in, “Keita chimma Akpu malot mii ta keilou choule, keiinna thlenga amve” ta kannihta tranga kanisonpei.

¹⁶Kannih in ngenna amunkhanna kansehlai, naichi rungaaksa khat in kannihsoh intuuksa, amahva vaknua aksuuksam akphoong li am, mah thlouchu tloh a amah akpuei turella baobeh khalmo athrulh.

¹⁷Amah rungaaksa in Paul khatkho kannihta kanijuih a, “Nankuunga chaanring phahnatu alam akraan mii i akthloirem Ringpu vah roijuihsei;” ta ongsa

¹⁸Khalmo soot a amah in maita tloh a am. Chuta Paul ta amlaangtlam khanna amahtonga inheia asonpei, “Amah ningnata nanthruhnatu keiin Jisu Khrista akminga kikchaakche.” Che mah laitalla li in inthruhsa.

¹⁹Chuta amah akpuei in baobeh ah matuura thrulhnakha imaangnatu veisa ta anmuhpeia, anmah in Paul leh Silas ta ansuurpei, anmahta keithiil suunga kaia aktloh akhal ankuunga ansonpei;

²⁰che anmahta pichaarpu ankuunga anthlenche anson, “Mahmii ei i Judi ei che anmah in inih khuboomta aminokpei.

²¹Kannih khatkho Rome a ak am mii in louphunoh mahche majuih phunoh trongsuur kastamta anmah in amitheih.”

²²Miitam inchunna antakchunga kut anthlakpei, mahche pichaar akpuin anmah anpuunreita liimma akthritpeia che anmahta sunga ankhonnatu asonpei.

²³Che anmahta sungmun suplaak a ankhonche simma ansihpei, anmahta thra a ansihnatu sim angaak eita amisilpei.

²⁴Anmahta chaakna trongchu anphahche, sim asuungremma thunna ankehta thirhang amilukpei.

²⁵Chuta khulouh janjai vak a Paul leh Silas in ngenna mahche Ringpu ta mapaakna laatloh a amsei, simsuungna in anmah anlaachuta anrungeih,

²⁶cheva kak hanga runaangnu tranga inloksa, chunna sim amunkho inloksa; kak hanga thong anaamte inhoongsei mahche thirhang inlukeikho inliimkirsei.

²⁷Sim angaak in anthoh inva thong anaamte inhoong anmuhpei, simma anthun annaamte inlit a tlaanseita amdonpeia chemta juuk a akroua ansunatu insuulsa.

²⁸Chuta Paul in ahousuuk a onga ason, “Nikroua nimangnahtu tlohnohro, alamva kannaamte onna ammung.”

²⁹Sim angaak in meiserta anihche onga innotslamma asuunga luutsa, mahche intrikho intria inchuunna Paul leh Silas amaikuunga inriilsa,

³⁰anmahta apaal amthruh eiche asonei, “Unaoeio, keiin inkal kphahnatu jangkitlohtu tlame?”

³¹Che anmah in anson, “Akpu Jisu ta malotro, nangleh nitaploikuung in inkal nanphahtu.”

³²Cheva amah khatkho ataploikuung in anpumteta Akpu trongta ansonpei.

³³Che mahni khulouh talla anmahta phurh a ansokna munta amah in tlenna achaammei, che mah laitalla amah khatkho ataploikuung pumte inlupsei.

³⁴Cheva anmahta a inna athleneiche ankuunga saakphu adoonei; mahche ataploikuung pumtein amilot inva khalmo anroomthoksa.

³⁵Chuta ram avaar invah pichaarpuei in pulista mathlah a ason, “Anmahta mathlah a maseh eiro.”

³⁶Cheva sim angaak in Paul kuunga amah trongchuta asonpei, “Pichaarpuei in nannihta mathlahnatu keikuunga mii amithlahpei; churella pekva inthruh aleh oia sehvesa.”

³⁷Chuta Paul in ankuunga asonei, “Kannih kamiraalkho tuuknoh ei, Rome namii kannihta miikaara kanihkhonche simma kanisihpei, mahche kannihta inruk a kanimthlahsam peime? Mahchu janohtu, antaktal thlenga kannihta apaalla kanimthurh eiso.”

³⁸Pulis in amah trongchuta pichaarpu ankuunga atongpei, cheva anmah i Rome na mii eita antheih inva intrisei.

³⁹Mahchunna ankuunga thlengseia kanlaalpeita ansonpei, che anmahta apaalla mathruh a khuuboom mathlah a ansehnatu ansonpei.

⁴⁰Nga tloh a anmah in simnata inthruhsei, Lidia ta seh a anphahpei, unao eita anmuh in anmah arilta anthokche sehsei.