Read Tarao Naga NOONNA THLOU 17 Bible Online

NOONNA THLOU 17 - Tarao Naga bible

NOONNA THLOU 17

¹Pekva anmah in Amphipolis mahche Apollonia vanna ansehche Thessalonika a thlengsei, mah amunchunna Judi ei sinakok khat louam.

²Cheva Paul in anchangna nujuih a ankuunga luutsa, mahche kouh inthumkhek amahsoh ringjih nata rui ria intelsei,

³Khrista in klah knang doua thinata ringtutla ta invuia anmahta amitheih ei, “Keiin nankuunga kraanva Jisu i Khrista khasa.”

⁴Mahche ankaarna mii arouva amitheih in mahchu anjapei, cheva mathruunna ril akluut Kriik miitam mahche aklok kumei tam in Paul leh Silas soh pulsei.

⁵Chuta Judiei in kallak eia kulthoknoh miita thlenna, miitam anmichunpei mahche khuboomta hou anmisuukpei, cheva Jason innta kut anthlakpei, anmahta apaalla miitam anmaa a mathruunnatu anjonpei.

⁶Cheva anmahta antuuknoh invah anmah in Jason mahche anmah unaopasa arouta khuuboomna akchek amneh ei anmaikuunga kaia ongsei, “Tukleiramta achung athlang amlatmii eikha onna thlengsei,

⁷che Jason in anmahta alouloh ei, mahche annaamtein Keisaar jathangta indah a thloutloh a antihpei mah chuvah Jisu antih aktlei kurung khat am.”

⁸Miitam che khuuboomna akchek amneh eiin mahchuta antheih in anril innoksa.

⁹Cheva anmah in Jason mahche aktlei tingnata baobeh anlohche, anmahta amisehpei.

¹⁰Unao pasa eiin kak hanga khulouh a Paul leh Silas ta Beroa a amithlahpei; che mahkhan antlungin anmah in Judi ei sinakok a luutsei.

¹¹Pekva amah Judi ei in Thessalonika a am Judiei anchunga ralla anril liinnei, alamva anmah in akthra trongraanta traamma anlouloh, mahche ringjihta aknirel chim chimnoh amijon.

¹²Mah churella Kriik ah ankaang savaanga am kupa kumei miitam in amilotpei.

¹³Chuta Paul in Beria akho Ringpu trongta araanpei ta Thessalonia na Judiei in anrompei, mah khanna thlenga miitamta masoh a hou anmisuukpei.

¹⁴Cheva kak hanga unaopasa eiin Paul ta tuiiboomma sehnatu amithlahpei, chuta Silas leh Timothi va mah khanna inmahsei.

¹⁵Mahche Paul ta akthul ei in amahta Athens phah a anthlenpei; che Silas leh Timothi ta inthademma amahkuunga mathlengnatu jathang anphahche anmah in sehsei.

¹⁶Pekva Paul in Athens ah anmahta ngaak a an amlai, khuuboom khanna rappu leili in sip a am anmuh in amlunghaangsa.

¹⁷Chunna amah in sinakok a Judi eisoh mahche anril luut a amthruunmii eisoh trong inngeia intelsei, che aknirel keithilla ak ammei sohkho trong intellei.

¹⁸Epikurian leh Stoik aksui amjon ei in Paul soh intuuksei. Mahche mii arouin ansonpei, “Amah in trongtlammi jangta asonmeio?” Arouin ansonpei, “Amah i aktlei ramboomna rappurella trong akraan mii inlo, alamva amah in Jisu mahche thinata ring rella trong.”

¹⁹Cheva anmah in Paul ta matuh a Aiopakas kuunga thlenna ansonpei, “Nangin trong niraan akthar namtheihna i jangtame kannihkho kanromja khame?

²⁰Alamva akthar trongla kamikura nithlen; chunna mah i jangta nisonname kanromja.”

²¹Pekva Athens na mii naamte mahche okhanna am miiramna in akthar trongla son chunoh arungainoh avah aktlei jakhatkho tlohnoh a amningsei.

²²Chunna Paul in Ariopakas alaia ngirra ason, “Athens a am miieio billamma nannih in heikoh ah nanril khalmo luutmiichou tih a kirom.

²³Alamva kiseh kisehna a nannih in namithruunpot ei i kimuh kian in nga tloh a inhak a injih thiilkung khat keiin kiktuukpei, ‘Inromnoh rappua.’ Churella nannih in romnoh a namithruun ita keiin nankuunga sonna kiraanchou.

²⁴Ringpu vaa tukleiram mahche mah khanna ak am apumteta akseemsa, amah in marvaan leh thaleitu Akpu taningva mii in kut ah iseem thlaamma amnoh.

²⁵Amah in avaatna amnanga miiva kut in amahta routlohna phukho suuknoh, ipekphah amah in mii naamteta chaan, phuuk mahche billamta amlan.

²⁶Ohche amah in mii khatnata miijaatih anaamteta thaleichung apumtea anna amnatu aseempei. Amah in lai laitu aksuuksam aknieita khek khekta amnaipei mahche mii in an amnatu ramrieita matsah a amdon nujuih a atlohpei,

²⁷anmah in mii naamte nata inlah a amnoslakho, anmah in Ringpu ta anjonnatu, ankut in amahta palla anrilla suuk mahche tuuk ancheknatu,

²⁸alamva inih in amah kuungah ringme, inchek iphah mahche paalme; mah i nannih nanmii jirim amjih arouin anson nanga ‘Alamva inihva amah atuteme.’

²⁹Alamchunna inih in Ringpu vaa atute taningmeva, Ringpu i miikut in iseemtheih mahche miirilla madonna iseem ra-ao nohle harngou nohle lung leili khatnang tih a inih in madonnoh tupotme.

³⁰Mii eiin Ringpu ta aromnoh laiva Ringpu in miita a ipmang, chuta ipekva amah in amun anaamtea ak am mii naamteta rilthlengnatu trongthuun amlanpei,

³¹alamva amah in thlou athun mii khanna tukleiramta chimma pichaar atlohnatu aknikhat amnaipei, amahta thinata maringa mii naamte kuunga chimsa ta asonpei.”

³²Pekva akthi in iringsme ta anraan antheih invah mii arou invah amahta aminuihpei; chuta mii arou inlavah ansonpei, “Mairelna kannih in nangkuung nata veikhat kanrungeih jamang.”

³³Nga tloh a Paul in mii anboomeita amahpei.

³⁴Chuta mii arou invah Paul ta anjuihpei che amilotpei, anmah ankaar a Aropakas va jamana Dionisias, kumei khat akming Darmaris che anmahsoh inruuia aktleikho injaosei.