Read Tarao Naga NOONNA THLOU 18 Bible Online

NOONNA THLOU 18 - Tarao Naga bible

NOONNA THLOU 18

¹Oiche aknua Paul in Athens mah a Korinthia ah sehsa.

²Mah khanna Pontas a pok a anthohna akmingva Akuila Judi mii khat antuukpipei, amahva akmei Priskilla soh inrangte a Itali nata thlengmang, alamva Klaudias in Judi naamteta Rome mathlah a ansehnatu jathang amlanpei. Chunna anmahta inmuhpinatu Paul in sehsa;

³alamva amah athlousoh inchunrelna anmahsoh amjoua thlou antlohjou, anmah anthlouva khlupuun thlaamtloh ei.

⁴Amah in sabat nirel sinakok a trong antelpiei, mahche Judi leh Kriik eita amjanatu aksuulei.

⁵Silas mahche Timothi in Mesidonia nata anthleng in Paul vaa akthra trongraan thloua aril amluutpei, Judi ankuunga Jisu i Khrista sa ta sakhi amlannei.

⁶Chunna anmah in amahta indah a ansaal in, apuunta thinna asonei, “Nannih nanthii nantaksaak chunga tlaso! Keiva kilaan amnoh. Ipeknata keiva Jental tinga seh usang.”

⁷Cheva ohkhannata mathlah a akming Titas Jastas an ong Ringpu ta amthruun kupakhat in seh a amah innva sinakok soh intonga am.

⁸Sinakok akpuui Krispas inruuia amah ataploikuung in Akpu ta amilot; che Corinthia na mii jikcha inkho mahchuta antheih a amilotpei che inlupsei.

⁹Nikhat khulouh a Akpu in Paul vaa ahamuh a ason, “Intrinohro, chuta trongro daichirit nohro;

¹⁰alamva keiin kanruuipiche, tukhat inkho nitakchunga nakpal namsok tlohnohtuei; alamva mah khuuboom inna keimii tam ammei.”

¹¹Ohkhanna anmahta Paul in Ringpu trong matheih a mah khanna kumkhat che thla kuruk amsa.

¹²Chuta Kalio in Akhaia vaa rampuui aveilaia, Judiei in inkhatveia Paul ta suura Pichaar koolla anthlenpei,

¹³mahche asonpei, “Mahmii in trongthuunta indah veia Ringpu ta namithruuntu ta miita amsoh ei.”

¹⁴Chuta Paul in atrongsam tumma, Kalio in Judi eita asonei, “Judi eio, nannih in mah i chimnoh thlou mahche kochanoh aiilkhoi thlou rella leva, keiin antrong anlata louphu suuk;

¹⁵chuta mah i jakhatnoh trong akmingrelna che nanrou trongthuun relna trongtlohna veile nantak nanroua mathlaakve; mainang relna keiin pichaar akpu vei indah ang.”

¹⁶Cheva amah in pichaarkool nata anmahta amnompei.

¹⁷Chunna anmah in sinakok akpuui Sosthenes ta ansuurpei che pichaarkool amaatalla ankhonpei. Chuta mah aksuukthlou khanna Kalio invah jakhatkho aril inheinohsa.

¹⁸Maiche aknua Paul in nijan ste sootbeb a amche unao pasata inthrek pinatu trong asonche Siria a muli chuunga sehsa, che Prisilla leh Akuila in amahsoh inruuijousei. Kenkri a asam akchehpei, alamva amah atrongirhna khat am.

¹⁹Cheva anmah in Ephesia ah thlenga anmahta ohkhanna amahpei; chuta atakva sinakok a luut a Judi eisoh trong inkherhsei.

²⁰Amahta ste soot a amnatu ansonta atak in indahsa;

²¹chuta inthrekna trong anmah kuunga atrongche asonei, “Ringpu in amdon veile keiin nankuunga veikhat inlenglatung,” cheva amah in Ephesia nata muli chuunga sehsa.

²²Amah in Keisaria atlungsoh, Jerusalem a hanga khakla ta roomthok a amthruunei, mah chunnata lai kak amche, Galatia che Phrikia ramma seh a aroi naamteta malottinga amtrangei.

²³Amah in Antiok a lai kak amche Kalatia mahche Phrikia ram avella khatnata khat a seh a aroi eiin Akpu amilotta ralla amtrangei.

²⁴Mahlaia Judi inkhat akmingva Appolos an ong Alenxandria ah pok mii in Ephesia ah thlengsa. Amahvah innaalla trongtheih, ringjihta thra a akrom mii.

²⁵Amahta Akpu vaa alamrelna anmitheihpei; amahvah John in alupkhop relna romslakho, anmah in li luut a Jisu relna trongsa mahche miita chimma amtheih ei.

²⁶Amah in sinakok ah intrinoh luunga trong amthronpei, amahta inna phurh a Ringpu alamta minna invuia amitheihpei.

²⁷Cheva amah in Akhaia a asehja hanga, unaopasa in arilta amitrangpei, che amahta roomthok a anroulohnatu aroi ankuunga trongjihthuunta majih a anmithlahpei. Mahkhan atlungin, malungsivaa akli a amlot miita khalmo amjoomei,

²⁸alamva atuui amma Judi eisoh trong ansin in amah in Jisu vah Khrista saa ta ringjih nata ammuh ei.