Read Tarao Naga NOONNA THLOU 19 Bible Online

NOONNA THLOU 19 - Tarao Naga bible

NOONNA THLOU 19

¹Appolos in Corinthia a amlai Paul in achungtong khuuboom vanna Ephesia ah thlengsa. Mah khanna aroi ste aktuukpei.

²Che anmahta asonei, “Nannih in namilotlai Akseeng Li nanphahme?” Chunna anmah in anson, “Akseeng Li am tihkho kannihva lou theihnoh ung.”

³Chunna amah in asonei, “Chuleva nannih in jaknang hoongkhanna inlupchoume?” Anmah in anson, “John in alupna hoongkhanna inlupung.”

⁴Chunna Paul in ankuunga asonei, “Rilthlengnatu John in alupei, amah aknua akthleng mah chuvah Jisu ta amilotnatu asonei.”

⁵Mahchuta antheih in anmah in Akpu Jisu akminga inlupsei.

⁶Mahche Paul in anchunga akut asih in Akseeng Li anchunga trumsa; ohchunna anmah in aktlei tronga trongsei che Ringpu trongta anraanpei.

⁷Mahcheva anmah annaamvah mii somleinih vak ei.

⁸Che amah in sinakok ah luut a intrinoh a thlathum tronga Ringpu kurung huunna relna antelpipei mahche amilotnatu aksuulei,

⁹chuta mii arou inva anril maluutnohsei, che malotnohsei, mahche anmahta mah a sehsa che aroieita sehpia Tirannas thlaampiia aknirel intelsei.

¹⁰Amah in kumnih phah a am, chunna Asia a am Judi leh Kriik annamte in Akpu trongta antheihpei.

¹¹Ringpu in Paul akut ah salungkhouna thlou khalmo amtloh,

¹²chunna lumaan nohle puuneita amah aruungnata phurh a aknakuunga anthlen in akna aksaa thraei mahche thranoh li in anmah ankuungnata inthruh ei.

¹³Mahlaia amun khatnata khat ah inloi akseh ei in thranoh lita amnomchek Judi mii ste inkho thranoh li akluutta manomnatu anchunga Akpu Jisu mingta sonna antih ei, “Paul in araantrongva Jisu minga nanthruhnatu keiin jathang kamlanchou.”

¹⁴Judiei akthloi thiimpu akming Skiva asa kupa sirih in mainangta tloh a ammei

¹⁵Chuta thranoh li in anmahta amsangei, “Keiin Jisu ta kirom mahche keiin Paul kho kirom; chuta nangva tucheme?”

¹⁶Cheva thranoh li in aluutna mii khanna antakchunga injaamsa, anmah naamteta insuulpia achekirei, cheva anmah in athlaia mahche atakta insoksik a inn khannata tlaansei.

¹⁷Ephesia ah am Judi mahche Kriik annaamte in maita anrompei; chunna annaamtea intri hangsei; mahche Akpu Jisu mingta inkaanga amipaakpei.

¹⁸Amlot mii jikcha inkho thlenga inruk a thranoh antlohthlouta indanga ansonpei.

¹⁹Che mittrang aktheih miitam inkho anmah nirik thlenna miitam anmaikuunga matlonna anhaalkirpei; anmah in nirik anaamteva aman anten in pulla harngou baobeh akpul sopngasa.

²⁰Nga tloh a Akpu trongta khalmo raanna pungporh a akchek amnehsoh liinsa.

²¹Pekva mah ei i aknua Paul in Mesidonia che Akhaia vanna Jerusalem a asehnatu Li in ason, “Keiin mahkhan kiamche Rome kho kmuhtutla.”

²²Che amahta amjoom Timothi leh Erastas innihta Mesidonia ah amthlah eiche amah atakva Asia ah kak amsa.

²³Mahlaia Akpu vaa lamrella khalmo trong suuksa.

²⁴Alamva akming Demitrias antih mii khat harngou akseem in Artemis rapputhlaam ahoongta maseemma mii jikchaeita thlou matloh a khalmo baobeh aphahnaei.

²⁵Mah thlouin aktlohjou mii eita onga machunna asonei, “Unaoeio, mah thlou itloh inna inih in doonkhaalme ta nanrom.

²⁶Mahche nannih in nantheihpei che nanmuhpei mah chuvah Ephesia khop noh a Asia ram apumtea Paul in miita kut ah iseem rappu i Ringpu noh tih a sonna miita amah atrongting aphurh ei.

²⁷Maanna inih baobeh thrulhnata thihnaringna ah mathlaak khop noh a akthloi rappunu Artemis vaa mathruunna thlaam inthangkho akming amthitu, Asia naamte che tukleiram amun apumtea mii in anmithruun rappunuvaa akchek amneh akulkho ammaangtu.”

²⁸Maita antheih in anmah in khalmoa amilung inhaangsei, cheva ongseia antihpei, “Ephesia na miiei Artemis in akthloisa.”

²⁹Nga tloh a khuuboom apumteta anmihal tlampei; anmah in Paul soh sehjou Mesidonia na mii Kaijas che Aristarkas ta suura khalek veia leengna munna intha a luutsei.

³⁰Paul in miitam kaar a luuttangta amdon, chuta aroi eiin amahta maluutnohsei,

³¹amah apaiei, Asia na aktloh akhal arouin amahta leengna munna intrinoh a luutnatu ansonpei.

³²Pek arouin trongkhat a ongsei chela arouinla trongkhat ah ongsei, che mii aktam in jangtlohnatu inhom seime ta maromnohsei.

³³Miitam kaarnata arouin Alexander ta amaatonga an ilpei. Mahchunna Alexander in miitamta rimta an amnatu akut a amrompei, atakta anngaaknatu trong aksuul.

³⁴Chuta mah i Judi miisa ta anrom invah, pung innivak anmah in rool khalek a ongsei, “Ephesia na mii Artemis in akthloisa.”

³⁵Chuuna khuupiina amjih miikhan miitamta daichrit a asih ei che asonei, “Ephesia kupaeio, Ephesia khuuboomna akthloi rappunu Artemis thlaamta aksel mahche marvaannata aktla akseeng lungta akromnoh jaknangmii amchoume?

³⁶Mahchunna mah i indahna janoh taningva nannih in rimta amtu tlachou mahche innotslamma jakhatkho tlohnohve.

³⁷Alamva rappu mathruunna thlaamna pootta inrunoh mahche inih rappunuta thranoh a aktrongnoh mii eita nanthlenpei.

³⁸Churella Demitrias che amahsoh kutthloua aktheih mii inta tukhat chunga trongkat amleva, pichaarkool inhoonga am, mahche rampuuimii ammei; anmah in aklaanchu thlen eiso.

³⁹Chuta nannih in maichunga nanjon amleh, mahchu pichaar aknujuih a injomma aktlohkhal jama in trongir amithlaktu.

⁴⁰Alamva mi in housuuk irelnavah inih in thihna ringnasoh intuukmangme, mainang housuuk relnava kannih in akchim malan cheknohtu ung.”

⁴¹Maita asonche miitam inchunta amthriinpei.