Read Tarao Naga NOONNA THLOU 20 Bible Online

NOONNA THLOU 20 - Tarao Naga bible

NOONNA THLOU 20

¹Housuukha annemnua, Paul in aroieita onga bungthok amlanei che anmahta mah a asehnatu asonche atakva Mesidonia ah sehsa.

²Amah in ram jikchahta vanna asehlai anmahta ril matrangna trong khalmoa asonei, che amah in Kriis ah thlengsa.

³Mah khanna thlathum amsa, che amah in Siria ah muli chuunga sehtangta anchaanglai, Judiei in amahninga thranoh tlohnatu ansuulpei, chunna amah in Mesidonia vanna anlengnatu aril ngirsa.

⁴Amah in anruuipi miieichuva Beroia na Piarhas asa kupa Sopater, Thessalonia na Aristarkhas mahche Sekandas. Che Derbe na Kaias, Timothi che Asia na Taikhikas leh Trophimas mahche Timothi anmahsei.

⁵Anmah in kanmaa a louseh a Troas ah kaningaak a louamsei,

⁶chuta Chol jaonoh Tol buhdoon aknua kannih in Philippi nata muli chuunga sehsung, mahche nijan ranga aknua Troas ah ankuunga thlengsung, mah khanna nijan sirih amsung.

⁷Matsahrem kouh aknua, kannih in tolta masuuknatu kanchunlai, Paul in tungva asehja hanga anmahsoh janjai phah a tronga amsa.

⁸Kannih in kanchunna achungnung khumma mitton tam intaar.

⁹Akming Eutikhas antih naokhat in inn thongsiinna inbok a am, Paul in soot atrong inva imuh alohpeia thikhemma insa, cheva inn inkaang inthumtihpi arelanata tlasa mahche thia anchunpei.

¹⁰Paul in trumma naota akpomche ason, “Nanril malahnohve, alamva amah achaan atak a ammang.”

¹¹Paul in inn inkaang inthumtihpi arella kalsa mahche tolta masuuk a ansaakpei, anmahsoh soot ramvaarphah a trongsa, cheva sehsa.

¹²Mahche anmah in kupasa khata ringa anphurhpei, che anmah anroomthokha ste sta nohsa.

¹³Chuta kannih in muli amna a matsah a lousehsung, muli chuunga Asos ah sehsung, kannih in Paul ta mah khannata mulia kanphurhjasa, alamva Paul in kehlamma sehtangta inchaangsa.

¹⁴Amah in kannihsoh Asos ah antuuklai, amahta muli machuunga kannih in Mitilini ah thlengsung.

¹⁵Kannih in mah khannata muli chuunga kansehlai akhuvar a Khios amaatalla thlengsung; mahche akhuvar akho kannih in Samos ah muli chuunga kanthlengche Miletas ah tlungsung.

¹⁶Alamva Paul in Asia a lai soot a amnohnatu Ephesia vanna muli achuungnatu aril ngirsa; alamva vei ajaleva Pentikos nia amah in Jerusalem atlungnatu innotsa.

¹⁷Mahche Paul in Miletas nata Ephesia ah pao mathlah a mah khanna am khakla va anparuul eita aongei.

¹⁸Che amahkuunga anthleng in alousonpei, “Keiin Asia ramma kikeh kichuunni khannata lai amrella keiin nannihsoh inruuia khatloh a ammangme ta nantak in nanrom,

¹⁹inruruh a mahche ruithli luungsoh inruuia Akpu ta rou kitloh mahche Judiei in keita thranoh masuuknatu chaang kan annang;

²⁰nannih in inkal nanphahnatu akirkho khaak tlonohluunga nankuunga sonna kamdangkir peichou, che savaangna mahche inn inna kamtheih peichou.

²¹Judi leh Kriik mii annih kuunga Ringpu kuunga anril thlengnatu mahche Akpu Jisu Khrista ta malotnatu sakhi kamlan.

²²Che pekva anvesa, Li in keikhit a Jerusalem a sehsang, mah khanna keininga kha suuktungme romnoh ang;

²³khuuboomrel niseh nisehna a simma niluutnatu mahche klah knang niphahnatu nangta nakngaak a amta Akseeng Li in keikuunga keison khopta kromning.

²⁴Chuta kei i aman tammang chunoh a amanchaal mii angta insonnoh ang, keiin kitlohtuphu kithlouta mapaang chuche Ringpu amlungsiva akthra trongta sakhi malannatu Akpu Jisu ningnata keiin kaphah routlohta aktlohsang.

²⁵Ringpu kurung huunnavaa Akthra Trongta nankaar a keiin raanna sehsang, che pekva anve, nannih tukhat inkho kei kimeelta veikhat inlenga keimuhnoh usachou ta krom.

²⁶Churella keiin mi in nangkuunga sakhi kamlanchou mah chuvah tukhat inta nanchaan maang chouleva kei kamraal amnoh,

²⁷alamva Ringpu in inichaak inimtheih apumte akirkho mathlahnoh luunga nangkuunga sonna kamdangkir peichou.

²⁸Nantak turella mahche sadamlom naamte turella pirve, amah Asa kupa vaa thii in akleiche Ringpu vaa khakla ta thra nanroinatu Li Akseeng in nannihta ak an nanimveipei.

²⁹Mah i keiin krom mah chuvah keiin kisehnua akraang uiiramuiipii eiin nankaara thlengtuei, sadamlom inleia mahnohtu;

³⁰mahche nannih nankaarna amlot miiluungkho masimna a chimnoh lamting naniphurh natu nankaarna mii inthruh tuei.

³¹Alamchunna pirve, kumthum luut a suun khulouh inngainoh a ruithli luunga kamtheih choukha intheihve.

³²Pekva keiin nannihta Ringpu mahche amah malungsita son aja kisonpeichou mahtrongin nannihta naniseem achek che amah in amseengche mii in aphahtuphu doikha nanimlan achek.

³³Keiin tukhat kuungata haarngou nohle ra — ao nohle inliingna puunreita ralla dinoh ang.

³⁴Kei darkaar a mahche tlohkhalla kisehpijou in anvaat anpa jikcha kikut innih in tlohkhalla rou kitlohpieita nanrom.

³⁵Mah naamte i nankuunga kammuh peichou mah chuvah nga tloh a thlou tranga tlohcheknoh aksool miita imjoomtu tla, Akpu Jisu atrong, ‘Akphahchunga amlan in ralla doiphah vei’ tih a asonkha intheihtu tlame.”

³⁶Nga tloh a atrongche anmahsoh ankhuk makamjoua annaam anngenjoupei.

³⁷Che anaamtea trapsei mahche Paul ta kon konna amichohpei,

³⁸Anmah in kei kimeelta veikhat inlenga keimuhnoh usachou ta asonkhanna anril khalmo kaangei. Cheva amah in keita mulithaangna phah a kanthulang.