Read Tarao Naga NOONNA THLOU 22 Bible Online

NOONNA THLOU 22 - Tarao Naga bible

NOONNA THLOU 22

¹“Unaoei mahche kipa kipueio, ipek keiin nanmaikunga kitak kanngaaknatu kisontrongi rungaive.”

²Amah in ankuunga Hibru tronga atrongta antheih inva, anmah in ralla daichrit a amsei. Che ason:

³“Kei i Silisia na Tarsas ah pok Judi ang, chuta keiva amah khuuboom inna Kamaliel athlanga liinsang, inih ipa ipuei trongsuur jiksiir athlanga keita klukanga nirik kamtam anga mii kamveiang, nannih naamtein ipek nanringna nanhoong nanvaa inanga keikho Ringpu rella kiril luutsang,

⁴mah lammita aknu akjuih mii eita keiin thi ajaphah a kikchut kamnangei, kupa kumei eita makaanga simma kithunei,

⁵mah i akthloi thiimpu leh anparuulna jama annaamtein kei sakhisei. Unaoei ankuunga amithlahnatu trongjihthuun jama ankuungnata kphah mahche anmahta tanti malannatu chekho anmahta suur suura Jerusalem athlennatu keiin Damaskas ah sehsang.”

⁶“Keiin nga tloh a kisehlaia, Damaskas kannai in suunjai jaanga inromloua kak hanga ringramnata khalmo intle aakvaarkhat in keihiilla vaarsa.

⁷Cheva tukleia inriilsang chunna houkhat in keikuunga ason kitheihpei, ‘Saul, Saul, keita jarella nakchut nammaang angme?’

⁸Mahchunna keiin kamsang, ‘Akpu tucheme?’ Amah in keita keison, ‘Keiva nangin chut a mananga nisih Nazaret na Jisu khasang.’

⁹Ipek keisoh sehjou mii invah intle akvaarkha muhvah anmuh chuta keikuunga aktrong amah ahouva theihnoh ei.

¹⁰Mahchunna keiin kisonni, ‘Akpu, keiin jangkitlohtu tlame?’ Chunna Akpu in keisonang, ‘Inthouva Damaskas ah luutro, nangin nitlohtu thlou Ringpu in thlouraang atloh anaamte relna ohkhanna nangkuunga naksontu.’

¹¹Kvaarkha antlehmal invah kimit muh cheknohsang, keisoh inruuimii in kikutta matuh a kansehpipei, mahche Damaskas ah tlungsang.

¹²“Judi annaam in injahna mii, trongsuur nujuih a malotting arilluutmii akming Ananias an ong mii khat ohkhanna am.

¹³Amah in kikuunga thlenga kikomma angirhche keisonnang, ‘Unao Saul, nimit muhchekrosa!’ Mahlaital chunna keiin muh kichekpei.

¹⁴Amah in keita keisonnang, ‘Nangin Ringpu amdon niromnatu, Akchim Akpu ta muh nicheknatu mahche amah anarhouta nitheihnatu, inih ipa ipuei Ringpu in thlou tlohnatu nakcharpei.

¹⁵Alamva nangin nimuh khatkho nitheih eita mah kharelna mii naamte ankuunga nangin sakhi veiuche.

¹⁶Ipek nangin jarella ningaakme? Inthouro che inlupro, amah akming ongchalaia nang nilehta chaamro.’ ”

¹⁷“Keiin Jerusalem a inlenga mathruunna thlaamma kingenlai, keiin ahamuh ah amsang,

¹⁸amahta kimuh in keisonang, ‘Intharo che Jerusalem nata inthabeb a inthruh rosa, alamva keirella nang nisakhi anmah in naklounoh tuei.’

¹⁹Mahchunna keiin kison, ‘Akpu, anmah antak in anrom mah chuvah sinakokrel nangta namlot mii eita simma kithunnei che kakhonnei.

²⁰Mahche nang turella sakhi amlan Stephen athii atlaklai keikho akomma ngirang mahchu keiinkho kaja, che amahta anthatlai amah anpuunreita ngaak a ammang.’

²¹Chuta amah in keison, ‘Sehro; alamva keiin nangta ram aklah Jental jatih ankaar a kamthlah uche?’ ”

²²Maiphah a anmah in atrongchuta minna anrungeih; mahcheva anrool inkaanga onga anson, “Mainang mii i thaleinata mamaanga thatvesa! ta anson. Alamva amah in aringnatu thlou amnohsa.”

²³Anmah in ongsei, anpuunta anlekpei mahche marvaantonga phil anthekpei,

²⁴raalmii amna munna anthlennatu trongthuun amilanpei, che miitam in amahta indah a khalmo ongsei, jarelname alam romnatu amahta khonna trong ruinatu jathang amilanpei.

²⁵Chuta amahta khonnatu savunruia amikaang in, Paul in akomma akngir raalmii reijapuuita ason, “Rome na miikhatta pichaar tloh a amraal antuuknoh maa a khonni aiilme?”

²⁶Raalmii reijapuui in mahchuta atheih invah amah in raalmii aklokkuunga seh a asonpei, “Nangin jangtlohtang nitihme? Alamva mah kupa i Rome na mii.”

²⁷Mahchunna raalmii aklok in thlenga Paul ta ason, “Keisonro nangi Rome na miicheme?” Amah in ason, “Oi.”

²⁸Raalmii aklok in amsangpei, “Keiin inbaobeh tam malanna Rome na mii vei kphahning.” Paul in ason, “Chuta keiva kipoklainata Rome namii veichesang.”

²⁹Cheva amahta invuia trong aruisamkha kak hanga inlengsei; che raalmii aklok inkho Paul i Rome namii khat tih a arompei che amahta akhitmii inkho trihsa.

³⁰Chuta amahta akkhit kuunga ason invah amjakpei, Judiei in amahta jarella amilaalme ta aromja rella aklok thiimpu leh jama annaamte inchunnatu jathang amilanpei, che Paul ta athlenche anmah anmaa a amigirhpei.