Read Tarao Naga NOONNA THLOU 23 Bible Online

NOONNA THLOU 23 - Tarao Naga bible

NOONNA THLOU 23

¹Paul in jamata antlinga asonei, “Unaoeio, mi in phah a keiin Ringpu amaa a akthra thranoh chim chimnoh romna lousinga ringang.”

²Cheva aklok thiimpu Ananias in Paul akomma angireita amah anar a anhainatu jathang amlanei.

³Chunna Paul in amahta ason, “Ringpu in nangta nak haitu, inngou inteibang nanga! Nangin trongsuur nujuih a keita pichaar tlohnatu nanbokche trongsuur nata inthlenga keita khonnatu jathang nitlohme?”

⁴Amah akomma angirhin anson, “Ringpu vaa aklok thiimpu ta jikcha thranoh a nisaal peime?”

⁵Chunna Paul in asonei, “Unaoeio, amahta aklok thiimpu tih a romnohsang; alamva mah i nga tloh a injih a am, ‘Nang nakpuui eita thranoh a trongnohro.’ ”

⁶Chuta amah aroieiva Sadukiis vaa loomsei che aktlei arouinla Pharisi vaa loomsei tih a Paul in arom inva, amah in Jama ankuunga onga, “Unaoeio, keikho Pharisiang, Pharisi khatvaa asa ang matuur leh thinata ring rella keita injah a chaang kan an nang.”

⁷Che mah ita ason inva, Pharisi leh Saduki ankaar a injanoh a innih suuksei.

⁸Alamva Saduki inva thinata akringkho, ringroikho che likho amnoh antih, chulata Pharisi inva anaamte amchim ta anmilot.

⁹Mah chuvah khalmo miitam in ongtlamma housuuksa; cheva Pharisi anloomna trongsuurva lulok eiin ngirra indah a, “Kannih in amahkuunga chimnoh jikchakho tuuknoh ung. Ringroi inkhat in chunoh a li khat in amahkuunga trongleva?”

¹⁰Khatleh khat in injanoh a amahta kanthrelusa ta anson inva raalmii aklok in intrisa raalmii in trumma Paul ta ankaar nata namma anthlennatu che raalmii amna a anhonnatu jathang amlanpei.

¹¹Akhuvar khulouh a Akpuin Paul akomma ngirra ason, “Niril matrangro, alamva nangin keirella Jerusalem a sakhi namlannanga Rome akho nangin sakhi namlantu.”

¹²Ni avaar in, Judiei in inchunna anmah in Paul ta anthatnohmiil jakhatkho saanoh iinnoh umeta intella trongchet anlohpei.

¹³Mah thranoh ita antlohna turella inchaangeichu mii sopli akralei.

¹⁴Che anmah aklok thiimpu leh anparuul ankuunga seh a ansonpei, “Kannih in aktrang trongirsoh inruuia Paul ta kanthat nohmiil jakhatkho matemnoh reita trongchet kanlohpei.

¹⁵Churella anmah kuunga trongsuuk i minna majonna akseengchu maromnatu nannih in jama eisoh raalmii aklokuunga ipek maromve Paul ta nankuunga athlennatu amah in onna atluungnoh maa a amahta kanthatnatu thlouraang chesung.”

¹⁶Pekva Paul asarvaa asa kupa in Paul ta lamma anruungsamta antheihpei, cheva amah in seh a raalmii amna a luut a mahchuta Paul kuunga asonpei.

¹⁷Chunna Paul in raalmii reijapuui ankaarna khatta onga ason, “Mah nao kupa i raalmii aklokuunga phurhro, alamva amakuunga jangmekhat asontu am.”

¹⁸Cheva amah in nao kupa khata phurh a raalmii aklokuung anthlenpiche anson, “Simma am Paul in keionga amahnao kupa i nangkuunga phurhnatu keisonpei, amah in nangkuunga asonja ste am.”

¹⁹Raalmii aklok in akut matuh a athlangtinga sehpia inruk a arui, “Nangin keikuunga nisonja amchu keisonro?”

²⁰Amah in ason, “Tungva Paul ta jama ankuunga jungpia trong suukta minna majonna akseengchu maromnatu ta ansonkha amisimnaning.

²¹Chuta anmah in ansonkha nangin indahhro; alamva kupa sopli akral in amahta anthatnatu lamma ruunga amsei, anmah in Paul ta anthatnohmiil jakhatkho sanoh iinnoh umeta trongchet anlohpei, pekva inchaanga amsei.”

²²Cheva raalmii aklok khanna naokhata, “Amahkuunga keiin kimrompeita tukhat kuungkho sonnohro,” ta nao kupasa khata chaak a amthlahpei.

²³Cheva amah in raalmii reijapuui innihta onga asonei, “Mi in khulouh pung inthumma Keisaria ah sehnatu raalmii reija innihsoh skol raalmii sopsrih mahche kuseichoi reija innihta thlouraang tlohvesa.

²⁴Che Paul in achuungnatu skol ste thlouraang tlohve che rampuui Pheliks kuunga thranoh hoihnoh jakhatkho masuuknoh a Paul ta nanphurhnatu.

²⁵Cheva amah in trongjihthuun nga tloh a amjihpei.

²⁶“Klaudias Lisias akthloi rampuui Feliks, kamthruunche,

²⁷Mah kupa ita Judi in ansuurche thatrei antihpei, amah atak i Rome namii tih a kirompei, raalmii eisoh seh a amahta kikalpei.

²⁸Amahta jarelna amilaalme tihrella kiromja hanga anmahta jama kuunga kithlenpei.

²⁹Mairella keiin kiktuukva anmah trongsuurta anruuina rella amahta maraal anmithlakning, chuta amahta thatnatu chunohle simma sihnatu talva amahkuunga amraalvah amnoh.

³⁰Mah kupa chunga thranoh antlohnatu anruungi keikuunga amithlahpei, amahta amlaalmii ankuung akho achunga chuunga amithlak amaraal chuta nangkuungkho ansonnatu trongthuun kamlan.”

³¹Nga tloh a amah in amitheih nujuih a raalmii in Paul ta phurh a khulouh a Antipatris kuunga anphurhpei.

³²Akhuvar a inlengsei che skol raalmiivah Paul soh ansehnatu anmahpei.

³³Anmah in Keisaria anthlengche rampuui kuunga trongjihthuunta amilanpei, Paul kho amahkuunga amisilpei.

³⁴Rampuui in trongjihthuunta apaache, amahvah ramna mii meta arui. Cheva amahmii i Silisi na miisa tih a arompeia

³⁵amah in ason, “Nangta namlaalmii in atlunglaia nitakchunga trongsuuk i keiin kitheih umang.” Cheva amahta Herot koolla ngaak a sihnatu jathang amlanpei.