Read Tarao Naga NOONNA THLOU 24 Bible Online

NOONNA THLOU 24 - Tarao Naga bible

NOONNA THLOU 24

¹Nijan ranga aknua akthloi thiimpu Ananias in anparuul stesoh che akming Tertulas soh inruuia jungsa. Ukil in rampuui kuunga Paul chunga trong ankatpei;

²amahta amiongche, Tertulas in amahta maraal peknatrong ason, “Akthloi Pheliks kannih in nang napaalla khalmo leh oia am kanphah, che nang napaalla kannih jatihta ralla pungporh namveiung,

³bilamma mahche amun anaamtea nitlohman romma kanjache.

⁴Chuta, nang laita soot lohnohnatu nirilvol akhanna kitrongta toibeb a nirungeihnatu kinoolche.

⁵Alamva amah kupa i trihkhopna thloutloh miisa tih a kanrompei, amah in tukleiramma am Judi ankaar a hou amsuuk miisa che amahva Najareth na kochanoh ruulta akching aklok khatsa.

⁶25 Che amah in mathruunna thlaam luungkho mabuurtangta aksuul chuta amahta kansuurpei.

⁷Chuta akthloi kepten Laisias in kalthi hanga thlenga kannih kankutnata kanilohpei,

⁸Nang nitaktal in amahta ruia minna nisuiche kannih in maraal kanpek i anaamtekho rom nichektu.”

⁹Judi inkho amahchunga amaraal malan injaoseia, mah naamte i chimta ansonpei.

¹⁰Mahcheva rampuui in Paul ta atrongnatu aheisiir in Paul in amsangpei, “Nangin kum vachah soot a mah jaatboom chunga pichaarpu hukveisache ta kiromchera, keiin roomthok a kitak kanngaaknatu kison.

¹¹Keiin Jerusalem a Ringpu amthruun kisehna i nijan somleinih ralnohmang ta thra nirom;

¹²keiin mathruunna thlaamma chunoh a sinakokrel chunoh a khuuboomma tukhatsoh trong inkharh chunoh a miitamta hou kamsuukkho anmah in keituuknoh ei.

¹³Ipek keita kamilan angi akchim sakhi namlan cheknoh tuei.

¹⁴Chuta amah i keiin nikuunga kijapei, ohchuva anmah in heikoh ruul tih a an ong Lam aknujuih a inih ipa ipuei Ringpu ta keiva kamthruun, trongthuunna anjih anaamte che ringraan in ason anaamteta kamlot.

¹⁵Anmah in Ringpu ta matuura anjananga, mahchu akchimleh chimnoh innihrella veikhat thinata ringtu.

¹⁶Nga tloh a keiin lai amrel Ringpu kuunga mahche mii kuungah seengnoh kiveinoh natu klah ang.

¹⁷Ipek kum kak aknua kei kimiiei aklah aknangeita majoomma malannatu che katnatu thlenna thlengang.

¹⁸Mahchuta kitlohlai kei kitakta mathruunna thlaamma kamseeng anmah in anmuh, ohkhanna miitam amnoh ei che innah insuulkho suuknoh. Chuta Asia na Judi arouin

¹⁹keita kamilaalang, anmah in keita keijanoh a ansontuphu amleva nang nimaikuunga kei kamraal ansonuta.

²⁰Chunoh a anmah antak in kei kamraalta tuuk eileva mah jama ankuunga kingirh laia son eiso.

²¹‘Akthi in veikhat ringtu tih a ingaak rella mi in keiin anmah amaa a chaang an kiphahning.’ ”

²²Chuta Lam kharelva minna akrom Pheliks in pichaar atlohnohnatu ason, “Raalmii akpuui Lisias athlengin nannih pichaarkha achena kamthlak umang.”

²³Nga tloh a raalmii reijapuui in Paul ta seella sihnatu chuta aningtamma sihnatu, che aruul apai in amahkuunga malanphu amilanlai anthlouta thingnohnatu trongthuun amlanpei.

²⁴Nijankhat aknua Pheliks in akmei Judi kumei Drusilla soh thlenga; amah in Paul ta am ongche Jisu Khrista ta malot rella trongta arungeih.

²⁵Akchim pichaar tlohrella, atakta inkem achek mahchu vaknua akthlengsam pichaar rella Paul in asonta atheih invah Feiliks in trih a ason, “Ipektu veia sehrosa; keiin taancha kphahlai nangta veikhat kam ongla uche.”

²⁶Mah laitalla Paul in baobeh kamlantungme ta amah in matuura am. Chunna Paul ta ong onga atrongpi.

²⁷Chuta kumnih aknua Porsias Pestas in rampuui veia Philiks angutta amsilpei, Feliks invah Judi ei turella thloutloh akdit a Paul ta simma asihpei.