Read Tarao Naga NOONNA THLOU 26 Bible Online

NOONNA THLOU 26 - Tarao Naga bible

NOONNA THLOU 26

¹Agrippa in Paul ta ason, “Nangin nitak turella nitrongnatu kijapeiche.” Chuna Paul in akutta ajamche atakta anngaaknatu asonpei:

²“Kurung Agrippa, Judi in keita keiandah a kanloon relna kei kitakta kanngaaknatu nimaikuunga mi in ngirra trong kphahrella kireipak thrata kloh,

³alamva Judi ei kastam anaamte che anmah in injetna jikcha thloia niromkir; churella kitrongta tlohtheih a nirungeihnatu kinoolche.

⁴“Mathron lainata keiin kijatih ankaar a mahche Jerusalem a nao kiveilainata keiin kiringna, kichaan khatkho kihoong kiva Judi annaamte in kanromang.

⁵Lai khalmo soot a anmah in keita kanrom taningangva, anmah inta keirella sakhi anmilanjale malaneiso, mah chuvah inih heikoh in ralremma cheksil ruul Pharisi khat veia ringsang.

⁶Ringpu in ipa ipuei ankuunga trongchet amlankhata keiin kimtuur relna keiin onna ngirsang che keita chaang keianpei.

⁷Isakhei somleinih inkho amahta kanphahtuta matuura khulouh suun anril maluut a Ringpu ta amithruun. Kurungo! Mah matuur irelnasa keita Judi ei in kanloonna angi.

⁸Ringpu in mii thinata amringta nannih in jarella malotjanoh ta namidonme?

⁹“Kei kitak inkho ja a Najareth vaa Jisu akmingta indah a thlou jikcha kitlohtuta kamdon.

¹⁰Mahtal chuta Jerusalem a keiin kitlohpei; keiin aklok thiimpu ningnata akchek amnehva trongrol kphahche akseeng mii jikchaeita simma thunkhop noh a anmahta thatnatukho rou kijapei.

¹¹Sinakok jikcha ah anmahta injomma tanti kamlanei mahche Ringpu ta thranoh manuih a antrongnatu kiksuullei; anmahta andah a mei suuk a kimluung inhaanga miiram khuuboom luungkho seh a anmahta kikchut ei.”

¹²“Nga tloh a keiin aklok thiimpuei ankuungnata akchek amnehvaa trongrol mahche thlou masilna jathangsoh inruuia Damascas ah seh ang.

¹³Kurungo, lamma kisehlaia suunjai talla, ringramnata kvaarkhat kinita ralla intle in che keisoh sehjou kannaamta hiilla kvaar kimuhpei.

¹⁴Kannaamte a tuklei ah kanril invah houkhat in Hibru tronga keikuunga keitihpei, ‘Saul, Saul, Jarella nangin keita nakchut angme? Lungkumta indah a nikeh a kao i nangta naksoktu.’

¹⁵Ohchunna keiin kison, ‘Akpu, nang tucheme?’ Akpu in keison, ‘Keiva nangin nikchut Jisu khasang.

¹⁶Chuta inthoua a ngirro; alamva mairella keiin nikuunga kamuhpeiche, mah chuvah nangin nimuhche khatkho nikuunga keiin kammuhsam alam irella rou nitlohnatu che sakhi niveinatu keiin nangta thlou kithun uche.

¹⁷Keiin kamthlah Israel leh Jental ei jatih nata kikaluche.

¹⁸Anmah anmitta mahoongnatu, mah chuvah anmah in kthihnata akvaara anlengnatu che seitan vaa tuui nata Ringpu tinga anlengnatu, chunna anmah in anlehnata in ip anphahnatu khatkho keita kamilot apaalla akseeng ankaar nata tutu inkho anphahphuchu anphahnatu.’ ”

¹⁹“Kurung Agrippa o, ringramna ahamuhkha keiin mahuihnoh tlohnoh ang,

²⁰chuta matsah a keiin Damaskas ah mahche Jerusalem na mii khatkho Judia ramboom apumtea khatkho Jental jatih akho sonna kamdangtuei, mah chuvah anmah in anrilta thlenga Ringpu ting inlengtu tlasei mahche anril anthleng i matikcha tihrella thlou amipaang tutla ta kisontuei.

²¹Mah irella mathruunna thlaamma kiamlai Judi ei in keita suura kanthatnatu ansuul.

²²Mi in phah a keita kamjoom Ringpu tingnata thleng, chunna onna keiin ngirra mii aksiin leh akliin annihtinga sakhi kamlanpei, Moses mahche ringraan in suuktu tlasa ta ansonpot jakhatkho sonnoh ang:

²³mah chuvah Khrista in klah knang athotu, chuche matsahremtu veia thinata ringtua Israel mahche jatih innih ah akvaarta sonna araantuta matsah a asonpei.”

²⁴Amah atakta anngaaknatu oita ason inva, Festas in hou inkaanga asonpei, “Paul nangi innahsache; nangin khalmo nitam nitheih khanna nangta namnahpei.”

²⁵Chuta Paul in ason, “Akthloi Festas, kei i innahnoh ang, chuta kitak in seenga akchimta trongsang.

²⁶Alamva mah irella kurung in niromkhaning, keiin amahkuung akho kiningtamma trongsang; alamva mairella amah in aromnanoh amnohta kirom, alamva mah i akiingkaangah tlohphu thlounoh.

²⁷Kurung Agrippa, ringraan eita namlotme? Keiin krom mah chuvah nangin namlot.”

²⁸Agrippa in Paul ta ason, “Lai kak asuunga keita Khristen kamveitangta namdonme!”

²⁹Paul in ason, “Lai kaksuungna slakho soot slakho thirhang talva inkhitnoh a nang khop noh a chuta mi in keitrongta arungai mii naamte in keinangjimma nanveinatu Ringpu ta kingen.”

³⁰Cheva kurung, rampuui, Bernis mahche anmahsoh inbokjou anaamtea inthousei;

³¹ohkhanna inmahseia, anmah in khatleh khat insonsei, “Amah kupa in thi aja nohleh simma thunnatu matikcha thlou jakhatkho tlohnoh.”

³²Chunna Akrippa in Festas kuunga ason, “Amah inta Keisaar kuunga trong katnoleva mathlah aja uta.”