Read Tarao Naga NOONNA THLOU 28 Bible Online

NOONNA THLOU 28 - Tarao Naga bible

NOONNA THLOU 28

¹Kannih in kthi kanphahsam nata inlit kanphahche, tuiiboom rammingvah Melta antihkha kanrompei.

²Mah khanna mii anrilthrata kanimmuh ung mah chuvah anmah in meitloh a kanikem ung, alamva khusuur amthronpeia ksiksa.

³Paul in thing apulkhat amtlonpeia mei abukpei, mei antruung invah murul inkhat inthruh a akutta ajella inthoia amsa.

⁴Chunna amah akut a inthoia am murulta anmuh in, anmah in khatleh khat insonsei, “Ril inhalna amnohsa mah i miithat mii, amah in kthi aphahsam tuiiboomnata inlitslakho akchim pichaar in amahta ringa am janohsa.”

⁵Chuta murulta meisuunga akthinpei che akuunga jakhatkho soknohsa.

⁶Atakta inthlinga kak hanga intolh a thi usata ngaak a amsei; chuta lai soot a amahta anngaaknua atakchunga reipaksina jakhatkho suuk anmuhnoh invah, anril inthlenga antihpei amahvah rappusa.

⁷Tuiiboom ramchu kurungming Pablias antihpot aramsoh intonga ramkhat am, amah in kanilohche rilvolla rou kanitloh a nijanthum kanisih ung.

⁸Nga tloh a suuksa Pablias apata atlunna mahche anap kluunga knasa; chunna Paul in amahta phah a a anche ngenna atakchunga akut sih a amthratpei.

⁹Mah i asuuk inva tuiiboomma am aktlei akna eikho thlengeia amah in amthratei.

¹⁰Anmah in kutthol khalmo kanimlanung; che kannih in mulithoua kanseh samsoh kannihtu darkaar am malisuunga anraangpei.

¹¹Thlathum aknua pheipok unaota injih Alexandri na mulikhat a chuunga phalbi suunga tuiiboom chunga sehsung.

¹²Sirakos ah kantlungche ohkhanna nijanthum amsung.

¹³Mah khannata inkoia mulithoua Rhejiam ah tlungsung; nikhat kan amche aknua akhutongna thli karaangsa, che nijannih tihpia Puteoli ah thlengsung.

¹⁴Amlot unaoei ohkhanna intuuk unga anmahsoh nijan sirih amjounatu kannihta kanikouhpei. Chuche Rome a thlengsung.

¹⁵Ohkhanna unaoei in kannih rella Inn Inthum antihkha phah a kannihsoh intuukpinatu thlengsei. Paul in anmahta amuh inva Ringpu ta ampaakpei che aril amtrangpei.

¹⁶Kannih in Rome a kanthlengin, Paul vah amahta akngaak raalmii eisoh amjounatu amjapei.

¹⁷Nijanthum aknua ohkhanna Judi akchim eita annaamtea Paul in aongei; annaamma anpul in ankuunga asonni, “Unaoeio, keiin inih imiieita chunoh a inih kastamta andah a kitloh thlouvah jakhatkho amnoh, chuta anmah in keita Jerusalem nata simma kansih anga Rome namii veia ankut a kamilanang.

¹⁸Anmah in keita minna kanrui anga, keita kamthlahja hangsa, alamva kei kes a anmah in keita tanditloh a thranoh ah kanthlaknatu alam jakhatkho amnoh.

¹⁹Chuta Judi in mahchuta indahseia, keiin kijatih chunga andah a kitloh jakhatkho amnoh slakho keiva Keisaar kuunga trong kikattu tlasa.

²⁰Chunna mairella nannihta inmuhpinatu che nannihsoh trongnatu kijon peichou, keiin thirhang inluk angi Israel in amituur kharelna.”

²¹Chunna amahta asonei, “Nangrella Judia tingnata trongjihthuun phahnoh ung, che onna akthleng unaopasa tukhat inkho nangrella thranoh antong mahche antrong nakho amnoh.

²²Chuta nangin nimdonchuta nangningnata kanrungeihja; alamva amun naamtena mii in nang nimiieita indah a antrongnavah kantheih.”

²³Mahchu nikhatni aminaiche amah in mii kuungah thlengsei. Juktiingnata khulouhram phah a Ringpu huunarel ankuunga maphorh a sonna sakhi amlanei mahche Jisu rella Moses trongthuun nata che ringraanei niriknata amsuullei.

²⁴Mah asonkhanna mii arou inva amilotpei, chuta arou inva malotnohsei.

²⁵Nga tloh a ankaar a khatleh khat injanoh a, Paul in ankuunga trong asonche inthreksei, Paul in ankuunga ason trongchuva:

²⁶“Mahmii ankuunga seh a sonve, nannih in rungaiva nanrungeih taktu chuta tiknikho romnoh uchou, nannih in muhva nanmuhtaktu chuta maromcheknoh uchou.

²⁷Alamva mahmii ei i amidonnatu katalla anril kmongsei, anmah amikur in rungaidahsei, che anmah anmit in ksingsei; chunohleva anmah anmit in anmuh uta, anmah amikur in antheih uta, anril in anrom uta, anmah annatnata kamthratnatu keikuunga inleng tuei ta;

²⁸keiin nankuunga kamromjachou, mah chuvah Ringpu vaa chaanring i Jental jatih a kamthlahpei; anmah in anrungeihtu.”

²⁹Paul in mahtrong chuta asonlai, Judi ei in amahta anmahpei, che anmah ankaar a anroua khalmo klukanga intelsei.

³⁰Kumnih tluunta amah in an amna innkhanna amsa che amahkuunga akthleng annaamta roomthok a aloujapei,

³¹tukhat inkho thingnoh a che indanglenga Ringpu kurung huunna rella sonna araan mahche Akpu Jisu Khrista rella amtheih ei.