Read Tarao Naga NOONNA THLOU 4 Bible Online

NOONNA THLOU 4 - Tarao Naga bible

NOONNA THLOU 4

¹Anmah in miisoh antronglai, thiimpu leh mathruunna thlaam angaakei aklok mahche Sadukiis ei in anmah kuunga thlengsei,

²mii in amilung inhaangsei alamva Jisu thinata veikhat ringsa ta anmah in mii kuungah anraan kharella.

³Cheva anmahta ansuurpeia tungva juktiing aphahnohmiil simma ansihpei, alamva mahchu khulouhram veisa.

⁴Chuta trongkhata arungai mii aktam inva amilotpei; amlot mii akpul rangavak ei.

⁵Akhuvar a rampuuiei, anparuulei, che ringjih lulok eiin Jerusalem a inchunsei

⁶inruuia akthloi thiimpu Annas, Kajaphas, John leh Alekjendar mahche akthloi thiimpu innsuung aksuuk ei in Jerusalem a annaamtea inchunsei.

⁷Mahche anmahta ankaar a sih a trong anruipei, “Jaknang tuuia chunoh a tunang minga nannih in mah i nantlohme?”

⁸Chunna Pitar in Akseeng Li a sip a ankuunga asonnei, “Rampuuiei che anparuulei,

⁹akehtu miita kannih in akthra thlou kantloh rella jaknang li a amahta namithrat amah ita mii in kannihta chaang kanian eileva,

¹⁰nannaamte in mahche Israel mii naamtein mah i romve, mah chuvah nannih in thingkharh a namithlu che Ringpu in thinata amring Najareth vaa Jisu Khrista minga mah chuvah amah apaalla mah kupa i thrakhemma nanmaa a ngirsa.

¹¹Inntloh mii inhuuina indah a nanlontal lungin inn akiinglung veisa.

¹²Che aktlei tukhat kuunga chaanring amnoh, alamva ringram athlanga amlan miikaara inihta inikaltu aktleiming inkhatkho amnoh.”

¹³Ipek Pitar leh John in anril anraangta anmuh in, anmahva nirik theinoh mahche miistru ningeita anrom inva anmah in salungkhousei; che anmahva Jisu soh inruuijouei tih a anrompei.

¹⁴Chuta anmah in amithrat kupakhan ankomma ngirra am anmuh in, mahchu indah a jakhatkho son cheknohsei.

¹⁵Chuta anmah in jamanata aktleia sehnatu jathang amilanche, mahchurella anmah inkhatle khat intelsei,

¹⁶che anson, “Inih in antakchunga jangitloh ume? Alamva anmah in inthangna daang inkhat amipaangpei ta Jerusalem a ak am miinaam kuunga amidangpei, che inih inkho mahchuta indah cheknohme?

¹⁷Chuta mairella miikaara antongnoh natu, tukhat kuungkho amah akminga ralla antrongnoh natu mathrit eirei.”

¹⁸Chunna anmahta an ongche Jisu minga antrongnoh natu che mii amitheihnoh natu anmah in anchaakpei.

¹⁹Chuta Pitar leh John in ankuunga amisangpei, “Kannih in Ringpu atrongta majuihchunga nantrongta majuih in Ringpu auunga thloia thra umeta nanroua picaar intlohve;

²⁰alamva kannih in kanmuhta mahche kantheihta sonnoh cheknoh ung.”

²¹Anmahta tandi tlohnatu alam tuuknohseia, anmahta ralla amithritche mii antrih rella amithlahpei; alamva aksuukthlou kharella miinaam in Ringpu ta amipaakpei.

²²Alamva kum sopli akral mii anatnata mathratna daang antlohpei.

²³Anmah ansuurkhata anmithlah inva anpaikuunga seh a akthloi thiimpu leh anparuul in ansonkhata ankuunga antongpei.

²⁴Che mahchuta antheih in anmah in Ringpu kuunga anhou suuk a onga anngen, “Akthloirem Akpu, marvaan, tukleiram, tuiiboom mahche asuunga ak am anaamteta akseem Ringpu,

²⁵nang roijuih kan pa David in Akseeng Li apaalla asonpei, ‘Jental in Jarella amilung inhaangseime, mahche jarelna mii eiin veinohtupot thlouta anmidon peime?

²⁶Tukleiramna kurung eiin anroua inchaangsei, mahche Akputa khatkho amah in thao apoih eita andah a rampuui in inchunjousei’ —

²⁷alamva amah atak a nangin thao nipoih nangtu akseeng roijuih Jisuta andah a Herot leh Pontias Pilat annih a Jental leh Israel eikho amah khuuboomma inchunjousei,

²⁸amah i nang nikut in che nangin matsah nimchaang khata tlohnatu relna.

²⁹Chunna pekva Akpu, anmah in anmithrit eikha anrosa, mahche nang niroi ei in karaanga nang nitrongta antrongnatu machekeiro,

³⁰nang roijuih akseeng Jisu apaalla aknata mathratnatu daang leh salungkhouna thlou mapaangnatu nikutkha jamro.”

³¹Chunna anngenlai, anmah in inchunna an amna munkha inloksa; che annaamte Akseeng Li insipseia kraanga Ringpu trongta trongsei.

³²Pekva amlot mii annaamte anril khatkho anli khalek veijoua, mahche tukhat inkho andoon ankhaalta keitaning tih a madonnohei, chuta ansihpoot anaam miinaamtu veia anhuina.

³³Mahche aktrang tuuisoh inruuia raangroiei in Akpu Jisu aringna rella anmah anringtukna thaminta anmilan, che annaamte chunga akliin malungsi anphah.

³⁴Anmah ankaar a tukhatkho akvaat amnoh ei, alamva ram chunoleh inn lou akdoon in mahchuta juura, che anjuurhna amanchuta anthlen.

³⁵Mahche raangroi ankehkuunga mahchuta ansih; che tukhat darkaar am miita ansem.

³⁶Nga tloh a Saipras ah pok, Levi vaa raangroi in Barnabas antih amahsoh asa kupa anromna Josep in,

³⁷amah alou inkhatta ajuurhche, baobeh thlenna raangroi ankehkuunga asih.