Read Tarao Naga NOONNA THLOU 5 Bible Online

NOONNA THLOU 5 - Tarao Naga bible

NOONNA THLOU 5

¹Chuta akming Ananias an ong mii khat in amah akmei Sapphira soh amah aram akirkhat ajurh,

²che amah akmeisoh romjoua anphahnata ste anmah chuumtuta ansihche, arouruta thlenna raangroiei ankehkunga asihpei.

³Chuta Pitar in ason. “Ananias, nangin Akseeng Li ta masimna a mahche ram amannata nangtu arou nikhainatu jarelna Seitan in nirilsuunga sipmeio?

⁴Mahchu nijurhnoh laiva nitanohme? Chuta mahchu nijurhcheva nihuuinaja ahuuina janohsa. Mah thloui nitlohnatu nang nirilla khatloh a akthar inthruhme? Nangin miita masimna nohche, chuta Ringpu ta namsimnapei.”

⁵Ananias in trongchu atheihsoh, tukleia inriilla thisa, che aktheih annaamte in khalmo intrisei.

⁶Mahchu akmuh intlangsa ei in inthoua amah aruungta tuumma apaal khur a anphuumpei.

⁷Pung inthumvak inngeihche aknua amah akmei in aksuuk thloukha jakhatkho romnohluunga hukluutsa.

⁸Mahchunna Pitar in akuunga ason, “Keisonro nangin ramkha vachahruin nijurhningme?” Cheva amah in ason, “Oi maichah a.”

⁹Chuta Pitar in amahta ason, “Akpu vaa Li ta madoinatu nannih in khatloh a injachoume? Rungairo nang namsalta akphuum eikha innkhaar kuunga ammei, che nangta apaalla nanphurhtu”

¹⁰Kak hanga Pitar akehkungah amahkho inriilla thisa. Intlangsa in anluutlaia amahta thia am antuukpei, cheva amahta apaalla anphurhche amsalkomma anphuumpei.

¹¹Maita aktheih mii naamte anchunga khalmo intri hangsei.

¹²Ipekva raangroi ankut a daang leh salungkhouna thlou khalmoa miikaara antlohpei. Mahche annaamte in Solomon innmuk a inchunsei.

¹³Che anmah ankaar a tunangkhat inkho anmahsoh inchunpia kraang cheknohsei, chuta mii inva anmahta khalmo injahsei

¹⁴Mahche amlot kupaleh kumei miitam in ral ralla Akpu kuunga amichunei,

¹⁵mahchunna anmah in aknaei luungkho lamma thlenna mahche intolhna tuklaichunga matolh a ansih, alamva Pitar in lamma athlenglai amah aniim slakho anchunga atlaknatuta.

¹⁶Jerusalem vella ak am khuupii khuupiinata miitam in aknaeita anthlen, che anmah annat ansatna thraei.

¹⁷Chuta akthloi thiimpu leh amah in anruuipi Sadukiis loomei in kallak a sipsei,

¹⁸anmah in raangroi eita ansuurche miitam amna simma ansihpei.

¹⁹Chuta khulouh a Akpu vaa ringroi khat in sim akhaareita mahoonga anmahta apaalla anthruhpiche asonei,

²⁰“Seh choulaia mathruunna thlaamsuunga ngirra mah Akringtrong naamte i mii kuungah raanna tongve.”

²¹Chunna mahchuta antheih in kini avaarsoh mathruunna thlaamsuunga luut a amitheihpei. Ipek aklok thiimpu leh amah in anruuipi in thlenga Israel vaa jamaleh chum eita annaam ongjoua, raangroi eita simma thlennatu amithlahpei.

²²Chuta phrangki in anthlenglaia, anmahta simsuunga tuuknohsei, cheva anmah in inlenga antongpei.

²³“Simkha thra inkhaar che akngaak ei in thongkha thra anngaak a kantuuk ei, chuta thong akhaar kamihoong inva asuunga tukhatkho tuuknohsung.”

²⁴Ipek mathruunna thlaamta akngaak raalmii akpuui mahche akthloi thiimpu in mahtrong chuta antheih in anmah rella khalmoa inhalsei,

²⁵Mahchunna tukhat in ankuunga thlenga atih, “Nannih in simma nanthun mii eikha mathruunna thlaamsuunga ngirra miita matheih a amsei.”

²⁶Mahchunna raalmii akpuui in phrangki eisoh sehjoua hou masuuknoh luunga anmahta anthlenpei, alamva mii in lung kanidentu ta intrisei.

²⁷Chunna anmahta anthlenche jama ankaar a ansihpei che akthloi thiimpu in anmahta trong anruiei,

²⁸“Amah akminga mii namitheihnoh natu tranga kanchaakchou, chuta nannih in miita namitheih a Jerusalem a sipsa, che amah athii kantakchunga namithlak natu nantlohpei.”

²⁹Chuta Pitar leh raangroi in amisang, “Kannih in miitrongta kamijuihtu ngutva Ringpu trong kamijuihtu tla.”

³⁰Nannih in thinga mathoia nanthat Jisu ta kannih kan pa Ringpu in amringpei

³¹Israel in anril anthlengnatu mahche anmah anlehta ipnatu, Ringpu in amahta Akching mahche akkal Akpu veia akchang kut a amliinpei.

³²Mairella kannih in sakhisung, mahche Ringpu in ason amjuih mii eita amlan Akseeng Li inkho sakhi.

³³Mahchuta antheih in anmahva khalmo amilunghaangsa mahche amahta anthatjasa.

³⁴Chuta jamana Pharisi akmingva Kamaliel, trongsuurvaa lulok mii naamtein injahnavei inkhat in ngirsa, mahche raangroi eita apaalla kak ansihnatu jathang amlanei

³⁵Che amah in ankuunga asonei, “Israel miieio, anmah ankuunga nantlohthlou i cheksilve.

³⁶Alamva mah akniei i amaa a akming Theodas in kei ningsangta amdon mii khat inthruh, mii reija manlivak in amah aknuta anjuih; chuta amahta anthatpei mahche aknua aje ajea inthek invorhsei, che jakhatkho veinohsa.

³⁷Amah aknua miipok teennatu amah aknichunna Kalili na Juda in inthoua mahche mii arouta amah aknuta anjuihpei; atakkho kmaang kremsa, che amah aknu akjuih mii eikho inthek invorhsei.

³⁸Mahchunna ipek aksuukthlou i keiin nankuunga kitihchou, maseh eivesa; alamva anmah in antlohthlou i mii tingnata suukleva mah i jakhatkho veinohtu;

³⁹chuta mah i Ringpu tingnata veileva nannih in anmahta cheknoh uchou!”

⁴⁰Chunna anmah in atrongkha anjapei, che anmah in raangroi eita onga ankhonpei mahche Jisu akminga antrongnoh natu anchaakche anmithlahpei.

⁴¹Cheva anmah in jamanata sehsei, anroomthoksei mah chuvah amah akming kharelna klah knang phah matikcha injahna vei tuei tih a Ringpu in asonpei.

⁴²Mahche anmah in aknirel mathruunna thlaam a che inn inna matheih a Jisu Khrista ta akraan, inngainoh luungsei.