Read Tarao Naga NOONNA THLOU 6 Bible Online

NOONNA THLOU 6 - Tarao Naga bible

NOONNA THLOU 6

¹Ipek akni aknileh aroi tam ahanral in, Kriik trong aktrong Judi ei in Hibru trong aktrong Judi anchunga andah a insosei alamva aknirel saakna iinna ansem anmilanlai anmah trulmeinuta thou sanohsei.

²Chunna somleinih in Akpu amlot mii eita onga ansonpei, “Inih in Ringpu trong akraan thlouta mathlah a tebor thloua routloh i chimnohsa.

³Alamchunna unaoeio, mah thlou irella mii thunna thlou imtlohnatu malot ah anming inthang, Akseeng Li a sip, lousingin sipmii sirih nankaarnata charve,

⁴Chuta inihva angenna mahche akthra trongta routloh a iril maluutreio.”

⁵Mahchuta anson in annaamte anril pelsei, cheva Akseeng Li in mahche lousingin sip Stephen che Philip, Prokhoras, Nikanor, Timon, Parminas mahche Antiokna Judi in ol Nikolas ta ancharpei.

⁶Anmahta raangroi anmaa a ansihpei, che anmah in ngenna anchunga ankut ansihpei.

⁷Mahche Ringpu atrong porh ahanralpei; Jerusalem a ak am aroiei anmasing khalmo tam athloipei, mahche thiimpuei inkho amlot mii aknuta anjuihpei.

⁸Mahche Stephen in malungsi leh tuui in sip a, miikaara salungkhouna thlou mahche daang khalmo atlohpei

⁹Mahchunna thlaang thlaang mii, Sinakok na mii arouin (mahchu ngata an ong); mahche Sirini na, Alexjendri na, Silisia na, che Asia na mii arouin Stephen soh trong inkharh anmithronpei.

¹⁰Chuta anmah in lousing leh Li a trongta indah eia ngir cheknohsei.

¹¹Mahchunna anmah in inruk a miita masoh anmitronpei, “Amah in Moses leh Ringpu ta andah a manuih a trong antheihpei.”

¹²Mahche anmah in anparuul che ringjih lulok eita rok a anmisaopei, che anmah in ankuunga thlenga amahta ansuurpei cheva jama anmaa a anthlenpei,

¹³cheva akchimnoh sakhi amlan miikhatta thlenna anmisonpei, “Amahmii in akseeng ita mahche trongthuunta indah a trong inngainoluung;

¹⁴alamva Najareth na Jisu in amah amunni ammaangtu, mahche Moses in inimlan amaanata iloutloh nonota amah in a thlengtu ta amah in asonkha kannih in kantheihpei.”

¹⁵Mahchunna jama ah anbok annaamte in amahta thratea an an in ameelkha ringroi khatvaa ameelnanga anmuhpei.