Read Tarao Naga ROME 10 Bible Online

ROME 10 - Tarao Naga bible

ROME 10

¹Unaoeio, kiril in akditva anmah in inkal anphahnatu Ringpu ting ngen isa.

²Anmah in Ringpu rella anrilva luut, chuta romma majuinoh eita keiin anmah rella sakhi kamlan.

³Alamva Ringpu tingna akthleng akchimlamseh ta anmah in romnoh ei, anmah antak anrou turella anjonkhanna Ringpu vaa akchimlamseh ah anmah in luutnoh ei.

⁴Alamva Khrista in trongsuurva achenasa, chunna amahta amlot mii naamteta amchimtu.

⁵Moses in amjihvah, trongsuur ah anbei akchimlamseh ta athlou veia aktlohmii in okhanna ringtu.

⁶Chuta malot ah inbeia akchimlamseh in ason, nang nirilla sonnohro, “Tunang in ringramma kal ume?” (mahchuva, Khrista ta achungnata mathrum)

⁷nohle, “Tunang in kdong amnoh athukna a trum ume?” (mah chuvah Khrista ta thinata achungting han).

⁸Chuta mah i jangta asonname? Trongi nangkuunga innaisa, nang ninar a mahche nang nirilla am (mahchuva, kannih in malot a trong kanraan);

⁹alamva nanginta ninar a Jisu i Akpu tih a phoongchele mahche Ringpu in amahta thinata amringpei tih ata nirilla malotchele, nangta nakaltu.

¹⁰Alamva mii in arilsuunga amilot chunna amahta amchimpei, che amah in anar a aphoong chuuna amahta akal.

¹¹Ringjih in ason, “Amahta amlot miirel injak maphahnohtu.”

¹²Alamva Judi leh Kriik ankaar a anthliin jakhatkho amnoh, amahta ak ong mii in amah adoon akhaalta ankuunga amlanche mii naamte turelva Akpukha intrim.

¹³Alamva, “Akpuva akming ak ong miirelta akaltu.”

¹⁴Chuta amlotnoh mii in amahta khatloh a an ong ume? Che amahta aktheihnoh luung mii in khatloh a amahta amilot ume? Mahche trongraan mii amnoh a anmah in khatloh a antheih ume?

¹⁵Che anmahta mathlahnoh a khatloh a mii in trong anraanchek ume? Mah injih inanga, “Akthratrongta akraan mii ankeh i jikchah thrame!”

¹⁶Chuta annaam in akthratrongta majuhinoh ei; alamva Isaiah in ason, “Akpu, kannih kankuung nata antheihche tunang in amlotpeime?”

¹⁷Chunna, irungeihche malot thlengmang, che Khrista vaa akthra trongraan apaalla rungai iphahmang.

¹⁸Chuta keiin kirui, anmah in theinoh mangeime? Tak a anmah in antheihpei; alamva “Anmah anhou thalei pumte ah sehsa, mahche tukleiram adongna phah ah antrong intheksa.”

¹⁹Veikhatla keiin kirui, Israel in lou theihnoh eime? Moses in matsah a ason, “Jaatboomnoh inkhat ankuunga keiin kallak kamsuuk uchou, kmong jatih khatta huuina a nannih namilung kamhaangtu.”

²⁰Mahche Isaiah in karaanga ason, “Keita keijonnoh mii in keita kantuuk ang, keirella keiruinoh ankuunga kei kitaktalta kammuh ang.”

²¹Chuta amah in Israel rella ason, “Trong amjuihnoh mahche inhea aklou ankuunga nikhat suuntla keiin kikut kijampei.”