Read Tarao Naga ROME 11 Bible Online

ROME 11 - Tarao Naga bible

ROME 11

¹Cheva keiin kirui, Ringpu in amahmiita indahme? Mah chuvah khak veinohso! Kei kitaktalkho Israel ang, Abraham atute ang, Benjamin jatihva miisang.

²Ringpu in matsah a alourom amiita janoh a indah tlohnoh, Elijah rella ringjih in khatloh a nanisonme romnoh choume? Israel ta andah a amah in Ringpu ting khatloh a anoolme?

³“Akpu nang trongraan eita akthat anmah in nang thiilkuungta anthritpei, che kikroua kanmah ningsang, che anmah in kei chaanta thatnatu kanjonang.”

⁴Chuta Ringpu in ankuunga khatloh a amsangume? Baalta ankhuk makamma amithruun nohmiil akpul sirih keiturel ajea kisihpei.

⁵Chunangjimma ipek malungsi apaalla achar anlei ste ammei.

⁶Chuta malungsi apaalla charleva mah i thlounata veinoh; chuleva malungsi i malungsi veinoh usa.

⁷Chuleva khasa? Israel in aphahnatu ajonta tuuknohsei. Achar miikhop in mahchuta anphahning, chuta anlei makheiva amtrangei.

⁸Mah i nga tloh a injihsa, “Ringpu in ankuunga kmong amuhnohnatu mit mahche antheihnoh natu makuur mi in phah a ankuunga amlanei.”

⁹Che Davit in ason, “Anmah teborkha thranoh madoina khatkho chaang veiso, anmah turella keh masuihna khatkho inlenga athunglohna veiso.

¹⁰Anmah in muh ancheknoh natu anmit inthimso, mahche ache amnoh a ankong inkuiso.”

¹¹Mahchunna keiin kirui, anmah in anloomnatu keh masuih veiseima? Mah chuvah tiknikho suuknohso! Chuta anmah in aleh ah ansehsuunga Jental ankuunga chaanring thlengsa. Chunna Israel ta kallak masuukna turelna.

¹²Ipekva anmah in aleh ah sehsei isonnava tukleiram in doonkhaal avei in, anmah in maichahtal pungporh phahseileva jikchahtal doonkhal tueime.

¹³Keiin ipek nannih Jental nankuunga trongsang. Keiin Jental jatihtu raangroi kiveisoot, kei routlohta kamliinang.

¹⁴Kei kiruul Judi eita kallak masuuknatu che ankaarna mii arouta kalnatu.

¹⁵Alamva anmah in injaonoh a tukleiramma inchamna veileva, anmah in anlouja i thinata ringnoh avah kha suuk ume?

¹⁶Matsah akrahva adihnata seengle adih atlangkho seeng; akjungta seengle abaak eikho seengei.

¹⁷Chuta abaak arouin tliklehva che raprilna chorphol asoiinanga anmahva amunkhanna mamoonga chorphol adoonkha inseemnatu namithloppei,

¹⁸Abaak achunga thoinohro. Nanginta thoichele, nangta nakjok akjungkha nangnohche chuta akjung khanna nangta nakjok tih i intheihro.

¹⁹Nangin nitihtu, “Keita kamthlopnatu abaak eikha athlikei.”

²⁰Mahchu chim. Anmah in amilotnoh alamma anmahta athlikpei, chuta nangva namlotrella ngat a ngirche. Mahchunna nangin thoinohro, chuta trihro

²¹Alamva Ringpu in ak amche thingbaakei khata kalnohlehva, nangkho amah in nakalnohtu

²²Chunna Ringpu vah miita amchaaltheih mahche trihkhopnakho vei tih a romro. Chuta Ringpu vah mii machaal theihkha nikuunga inkeih a amtu, chunohlehva nangtalkho naktantu.

²³Aktlei inkho malotnoh a mathlah seileva kamthloptuei, alamva veikhat inlenga mathlopnatu Ringpu ninga atuui am.

²⁴Alamva nangta raprilla akmoong chorphol akuungnata tanna thakbilna chorphol akuunga asoi masuunnatu nakseem anglehva, raprilna chorphol abaak eita louva asoii masuunnatu seem meleva jikcha thra a suun ume.

²⁵Unaoeio, mah anthup trongi nannih inkho rom kikdit, chunohlehva nanroua singungta namidontu mah chuvah Jental jatih in tanga anthleng nohmiil Israel ta akirkhat a anril kamtrangpei,

²⁶che Israel anaamteta inkaltuei, mah i injih khanangsa, “Nangta nakkal mii in Jaion nata thlengtu che Jakop nata amlotnoh miivah ammangtu.”

²⁷“Keiin anmah anlehta kilohlaia amah in ankuunga kei trongirhna vei tuei.”

²⁸Akthra trongin alamveia anmahva nannih turella Ringpu jekna veisei, chuta achar in alam veia, puthou ipithou eita madonna anmahta anrilvol.

²⁹Alamva Ringpu in aong leh akuttholva thlengnoh.

³⁰Laikhat avah nannih in Ringpu atrongsonta majuih nohchou chuta pekva anmah in atrongson amijuinoh rella nannih in rilvoltheih nanphahpei.

³¹Chunna nannih in amah rilvoltheihta nanimmuh rella anmahtingkho amah rilvoltheihta maphahnatu, ipek anmah in trong majuinoh veisei

³²Alamva Ringpu in mii naamteta trongson majuihnoh amveiei, chunna amah rilvoltheihta ammuhnatu relna.

³³Ah, Ringpu vaa atheih asing, alousing mahche adoon akhaalta jikcha phah a sui cheknoh meme?

³⁴“Alamva tunang in Akpu vaa arilta aromchek ume, chunoh a tunang in amahta akchaakchek veimeme?”

³⁵“Chunohle tunang in veikhat kamlenglatung ta madonna akuunga kutthol alamme?”

³⁶Alamva amahkuung nata khatkho amah apaalla che poot anaamte amah turelna seengning amahkuunga ache amnoh paarthra veiso. Amen.