Read Tarao Naga ROME 15 Bible Online

ROME 15 - Tarao Naga bible

ROME 15

¹Aktrang inih in marnop eisoh amjou ringjoutu tlasame, inih irilkhopta maplelnatu tlohnohrei;

²inih in inthringpi miita mathratnatu che anmahta seemjoua anril mapelrei.

³Alamva Khrista inkho atak anrouta mapelnoh chuta mah injih inangsa, “Nangta nansaalna antrongkha keikuung tlasa.”

⁴Alamva leithinga anjih naamte inihta inimtheihnatu injihsa. Mah ringjih in doutranga mahche inih irilta inithok apaalla inih in matuur iamna turelna.

⁵Jisu Khrista aknujuih ah nannih in khatleh khat ril intrimma khalek veia nan amnatu Ringpu in doutrangna mahche rilthoknata nanimlan veiso.

⁶Chunna nannih in pulla roolhkhat veia Ringpu mahche inihtu Akpu Jisu Khrista vaa apata paar namithrat.

⁷Ringpu vaa paarthra rella Khrista in inisoong nanga, nannih in khatleh khat insoongve.

⁸Alamva keiin kisonchou, mah chuvah puthou pithou ankuunga atrongchet amlankhata amngatnatu Ringpu in akchimrella Khrista in anvuntan ankuunga roijuih veisa,

⁹Amah rilvoltheih khanna Jental in Ringpu ta paarthra amiveinatu. Mah i nga tloh a injihsa, “Oirella keiin nangta Jental ankaara kidomuche, mahche nang nikmingta laa veia kitlohtu.”

¹⁰Mahche veikhatla ason, “Jental nang nimiieisoh roomthokve.”

¹¹Veikhatla ason, “Jental nannaam in Akpu ta mapaakve, mahche mii naamtein amahta mapaak veiso.”

¹²Chela Isaiah in ason, “Jisu va akjung thlengtu, amah in Jental anchunga paaltu; Jental in amahkuunga anmituurtu.”

¹³Akseeng Li atuuia nannih in matuurting nansipnatu che malot apaalla leh oi roomthok in nanimsipso.

¹⁴Keitu unaoeio, nantak a akthra in sipsachou, akromin sipsachou, mahche khat in khatta inchaak nanchekpei ta krom in kiril ampelpei.

¹⁵Chuta nannih in nantheihnatu alam ste rella keiin thouna thra a kimjihpei. Ringpu malungsi apaalla.

¹⁶Jental ankuunga keiin Jisu Khrista vaa routloh kiveinatu, thiimpu nanga Jental in ankat pootkha maseeenga akseengpoot inkhat aveinatu.

¹⁷Ringpu thlou a keiin Jisu Khrista kuunga kithoina am.

¹⁸Alamva Jental in trongson amijuihnatu tranga mahche athloua kei kipaalla Khrista in atlohthlou khanoh a aktleia kithouna thranohtung.

¹⁹Akseeng Li atuuia atlohthlou salungkhouna daang mahche salungkhouna thlouvei apaalla keiin Jerusalem avella invella Ilirikam phah ah Khrista vaa akthratrongta huuitanga kraanpei.

²⁰Nga tloh a aktleikhat in innmun atholche mah amunchunga keiin inn kitlohnatu Khrista vaa akming aktheihnoh ankuunga akthratrongta kiraanja hangsa.

²¹Chuta nga tloh a injihsa, “Amahrella insonlou mii in anmuhtu, che amahrella lou theihnoh mii in anromtu.”

²²Mairella nankuunga kithleng sammi injomma keithingang.

²³Chuta pekva mahveelin kithlou mahche a kei turella khum amnohsa chunna nankuunga khalmo kithlengjana kum khalmo sootsa,

²⁴keiin Spain kisehlaia nankuunga thlenga nannihsoh roomthok kitlan thoa nannihsoh kak kiamjouche rapkhei tlalatung.

²⁵Ipektal keiin akseeng mii eita majoomnatu Jerusalem a sehsang.

²⁶Alamva Jerusalem na akseeng mii ankaar a inran ringmii turella majoom i Mesidonia leh Akhaia na mii in anril pelsei;

²⁷mah thlou chunna anmahkho pelsei, tak a anmah ankuunga leiman intoolhsei, alamva Jental in Li tu vei doikhanna chuum phahjou eileva anmah in pootcheitu vei doihva routlohkho antlohtupot.

²⁸Alamchunna keiin thloui kamcheche anmah turella inthrai baobeh ankuunga kamlanche Spain kisehlai nannihsoh inmuhtung,

²⁹Keiin nankuunga kithlenglai Khrista tinga aksip doisoh inruuia thlengtungta krom.

³⁰Kei turella Ringpu kuunga nannihsoh keisoh ingenjounata Akpu Jisu Khrista apaalla mahche Li Akseeng in inirilvol apaalla keiin unao nankuunga kinoolchou.

³¹Mah chuvah Juduia a am Ringpu amlotnoh ei ankuunga atakta ankalnatu che Jerusalem a am akseeng mii in okhanna rou kitlohnatu keija eileva;

³²chuleva Ringpu in amdon nujuih a keiin nankomma roomthoksoh inruuia thleng kichektu, che inih in khatleh khat insonjou ume.

³³Leh oi vaa Ringpu in nannaamteta namimruui veiso. Amen.