Read Tarao Naga ROME 5 Bible Online

ROME 5 - Tarao Naga bible

ROME 5

¹Churella malot apaalla inihta inimchim peitaningva, inihtu Akpu Jisu Khrista apaalla inih in Ringpu soh amsame.

²Inih in ingirhna malungsia malot apaalla iluutna iktuukpei, mahche Ringpu vaa paarthrata iphahtuta imtuur rella iroomthokme.

³Mah chukhopnoh a ilah isam akho iroomthok, inih in iromva ilah ksam in doutrang amsuuk;

⁴doutrang in ahoong amsuuk, mahche ahoong in matuur amsuuk,

⁵mahche matuur in imdon koinoh, alamva Akseeng Li ta inimlan apaalla irilla Ringpu arilvolta inipoihpei.

⁶Inih in marnoplai talla, amah apungtal chunna Khrista in Ringpu amlotnoh mii turella kthisa.

⁷Jarelname itih inva akthra mii khat turella tukhat in aril kraanga thislakho akchimlamseh mii khat turella thi i chaalla suuk.

⁸Chuta inih in aleh eveilai talla, Khrista in inih turella thikhan Ringpu in inihta inirilvolkha inimmuhpei.

⁹Churella pekva Jisu athih in inihta inimchimpei, amah apaalla inihta Ringpu amlunghaang khannata jikcha ralla inikal ume!

¹⁰Inih in Ringpu vaa jekna iveisuung talla amah asa kupa in athih apaalla inihta Ringpu soh inimchunpei. Amah in aring apaalla inihta inikal ume.

¹¹Mah chukhopnoh chuta inih Akpu Jisu Khrista apaalla inih in Ringpu ting iroomthoksa, amah apaalla pekva inih in amahsoh inja iphahpei.

¹²Churella mii khat hunhaia tukleiramma aleh mahche aleh hunhaia kthi aluutnanga, kthi i mii naamte kuunga akthekpei alamva mii naamtein aleh itlohpei —

¹³trongsuur louamnoh laia tukleiramma aleh louamsa, chuta trongsuura amnoh laia alehva louteennoh.

¹⁴Chuta kthi in Adam nata Moses phah a paalla am, Adam in trongsuur majuihnoh nanga aleh aktlohnoh ei inkho amah nangjimma intrimsei. Adam vah akthlengsam amahkhava pandamsa.

¹⁵Chuta khangvaal kutthol iva khangvaal nangnoh. Alamva miikhatvaa aleh hunhaia mii khalmoa thisale, Ringpu vah malungsithei mahche mii khat mah chuvah Jisu Khrista in khangvaalla inimlan kuttholta huuitanga miitam kuunga amlanpei,

¹⁶Miikhatvaa aleh hunhaia chimnoh suuknanga khangvaalla inimlan kutthol ivah mahchunang noh. Alamva mii khat in aleh ah atlakrella pichaar suuk janoh huktlasa, chuta trong amjuihnoh tukhat in aknua khangvaalla amlan kutthol in chimnata thlengsa.

¹⁷Alamva miikhatvaa aleh hunhaia amah apaalla kthi inta paalleva, malungsi mahche akchimlamsehta khangvaal kutthol tih a huuitanga akphah eiva mii khat tihva Jisu Khrista apaalla veikhat ralla akringa paaltu.

¹⁸Chunna mii khat in aromnoh hunhaia mii naamteta akchimnohting amthlak nanga, miikhatvaa akchimlamseh athlou apaalla ringnatu amchimkha mii naamteta amlanpei.

¹⁹Alamva mii khat in trongson majuihnoh rella miitamta aleh amthlak nanga miikhatvaa trongson majuih apaalla miitamta akchimlamseh amveitu.

²⁰Trongsuur majuihnoh ahanralnatu trongsuur thlengsei; chuta aleh ahanralna khanna malungsikho huuitang aralpei,

²¹chunna aleh in kthichunga loupaal nanga, inih Akpu Jisu Khrista apaalla ache amnoh ring inimlannatu malungsi in akchimlamseh akliia apaalnatu veisa.