Read Tarao Naga ROME 6 Bible Online

ROME 6 - Tarao Naga bible

ROME 6

¹Chela jangison umangme? Malungsi ahanralnatu inih in alehthlouta inleng inlenga tloh a amreime?

²Mah chuvah suuknohso! Inih in khatloh a aleh ah na am umeme?

³Jisu Khrista soh inlup nannih in inaamma amah athii a inlupsme tih i romnoh choume?

⁴Alamva thii a inlup apaalla amahsoh inphuumsme, nga tloh a Pa vaa paarthra apaalla Khrista ta thinata amringnanga inihkho akthravaa chaanna isehnatu relnasa.

⁵Alamva amah in athihkhanna inihta amah athii apaalla inimchun saleva, inlitnoh a inihkho amah in veikhat aringna a inimchuntu.

⁶Alehvaa aruungta mamaangnatu inih in veikhat alehvaa naichi iveinohnatu inihvaa amlui miikha amahsoh inruuia thingkharh ah amithlupei tih a inih in irom.

⁷Alamva akthi miikha alehnata aningtam veisa.

⁸Chuta inih inta Khrista soh inruuia thijou taningmeva inih in imlotvah amasoh ringjou ume.

⁹Alamva inih in iromva thinata amringche Khrista in tiknikho veikhat inlenga thinoh usa; mahche thi in veikhat inlenga chek a achunga paalnoh usa.

¹⁰Amah in thikha alehtinga anaamte thisa, chuta amah achaan akringva Ringpu ting ringsa

¹¹Nga tloh a nannih inkho alehtinga thisachou mahche Jisu khrista apaalla Ringpu ting ringsungta madonve.

¹²Churella thi aja nanruunga aleh in akditta atlohnatu aleh in nanchunga akchek veia nanipuuinohsa.

¹³Nannih nanruungvaa akhol in aleh thranohta atlohnatu akchimnoh tinga kutlai veia huuinanohve chuta thinata amringche mii nanga khatkho nanruungvaa akhol eikha Ringpu vaa akchimlamsehna kutlai nanga nantakta Ringpu kuunga malanve.

¹⁴Alamva aleh in nanchunga akchekveia nanihuuina nohso, jarelna tihva nannihvah trongsuur athlanga ringnoh sachou chuta malungsi athlanga ringsachou.

¹⁵Chekha itlohtu tlame? Inih in trongsuur athlanga amnoh a malungsivaa athlanga am taningmeva alehta tloh a amraseime? Chunangva veinohso!

¹⁶Kthita akthlen alehvaa naichi vei sachoulakho, chunoh a akchimlamseh akthlen son majuivaa roijuih vei sachoulakho, nantakta naichi veia trongson majuihnatu malanchoule, trongson amjuihvaa roijuih veisachou tih a romnoh choume?

¹⁷Chuta Ringpu ta mapaakrei, alamva nannih in alehvaa naichi louvei sachoulakho, nankuunga nanimlan matheihna ahoongkha ril luut a namijuihpei,

¹⁸mahche alehnata mathlah a nanphah peitaningva akchimlamseh vaa roijuih veisachou.

¹⁹Nantak in marnop taningchouva keiin miihoong nanga trongsang. Alamva nannih in seengnoh mahche akchimnoh ah ralla chimnoh a naichi veia nantak akhol eita namilankhempei, chunna pekva amseengnatu akchimlamseh vaa roijuih veia nantak akhol eikha malankhem vesa.

²⁰Nannih in aleh ah nan amsuunga, akchimlamseh nanveinatu nannihta alehnata ningtam nanimphahpei.

²¹Pek nannih in nanjakna thlou kharella nankuunga jaknang kanana inlengme? Alamva mah naammtetu achenavah kthisa.

²²Chuta pekva nannihta alehnata mathlah aningtam nanimlanpei mahche Ringpu vaa roijuih veisachou, nannih in nanchuungnavah akseengta phah mahche adongna avah ache amnoh a Ring phah khasa.

²³Alamva aleh tlohna khaanva kthi khasa chuta Ringpu tingna khangvaal akuttholvah inih Akpu Jisu Khrista ah ache amnoh aring khasa.