Read Tarao Naga ROME 9 Bible Online

ROME 9 - Tarao Naga bible

ROME 9

¹Keiin Khrista akminga akchimta trongsang, keiin masimna a trongnoh ang, chim chimnoh akrom kiril in akseeng Li vaa apaalla sakhi kamlan.

²Chunna kirilsuunga khalmo klah mahche inngainoh a kirilla amlah am.

³Alamva kiruung tinga kei kisakhei, unaoei, kitaploi kuungei rella kitaktal in phool phah mahche Khrista soh inthreksangta kamdon.

⁴Amahva Israel miivaa ansasei, paarthra, trongirhna, trongsuur malanna, Ringpu ta amthruun, mahche trongchetta akphahsei.

⁵Amahva pipasei, ruungtinga anmah tingnata Khrista poksa. Lai amrella mapaak, apumte chunga Ringpu sa. Amen.

⁶Ringpu trongta tlungnohsa tihrelnanoh. Alamva Israel vaa atute nata akthleng annaamte Israel noh ei.

⁷Abraham atuteh anveirella annaamte in amah atuteh noh ei, “Chuta Isaak nata nang nitute iongtu.”

⁸Mah i asonnavah ruungtinga asa ei in Ringpu asanoh ei, chuta trongchet amlanna asa eikhata atuteh veia ateenpiei.

⁹Alamva mah atrongchet i oisa, “Mainang laia keiin inlengtung mahche Sarah in asa kupakhat apoktu.”

¹⁰Chukhopnoh a, Rebeka inkho miikhatsoh mah chuvah inih ipa Isaak soh innjonga nao inpooitu.

¹¹Chuta nao anpoknoh laia che athra nohle thranoh jakhatkho asuuknoh laia, achar nujuih a Ringpu in amdon khanna ngat a ngirhnatu athlouvaa apaalnanoh, chuta amahta aong apaalna.

¹²Rebeka kuunga asonpei, “Anpaa in maksita rou atlohtu.”

¹³Mah i injih khanangsa, “Jakop ta kiringvolsa, chuta Esau va intirhsang.”

¹⁴Chunna inih in jangison ume? Ringpu vah chimnoh mii manaia thlou atlohta sonreime? Mahchu khak veinohso!

¹⁵Alamva mah i Moses ta ason, “Keiin kiringvol mii khata kikchaaktu, che keiin kamchaal mii khata kamlungsitu.”

¹⁶Chunna mah i mii in amdon tingnakho veinoh nohle mii in aksuultrang tingna khonoh, chuta malungsitheih Ringpu ningnasa.

¹⁷Alamva Ringjih in Pharaoh kuunga ason, “Kei tuuita nangkuunga mamuhnatu che thalei pumte ah keimingta sonna niraannatu keiin nangta ankaang phomma kimbokpeiche.”

¹⁸Chunna ringvoltheih miita amah in amchaalpei, che riltrang miita aril amtrangpei.

¹⁹Chuleva nangin keikuunga naksontung, “Jarella pekphah a amah in akchimnohta ajonmangme? Alamva amah in amdonta tunang in thing achekume?”

²⁰Miieio, Ringpu atrongta amsangsamkha tucheme? Philchop ah beel akseem miita, “Jarella keita nga tloh a nakseem angme?” ta philchop in ruinoh.

²¹Philchoptlang khata athratna athloua huuinatu, nohle akcham thloua huuinasam beelseem mii in philchop atlangta akut ah aseemja hoonga seem ajanohme?

²²Ringpu amlunghaangta mamuh a mii kuungah amah atuuita amromja slakho, tlumkhemma mamaangnatu inchaang slakho, beelta akseem inva amsoiva amnohtu,

²³amah in adoon paarthrata matsah a amchaang malungsitheih beelthum khanna ankuunga amahvaa doonkhaal paarthrata maromnatu,

²⁴amah in Judi khopta ongnoh chuta Jental jaatkho aong, inihkho iniongnoh peime?

²⁵Hosea a amah in tak a nga tloh a ason, “Kei kimiinohta ‘kimiisei,’ ta kiongtu; keiin kirilvolnoh kumeita ‘kiringvol kumei’ ta kiongtu.”

²⁶“Che, nannih i, ‘Kei kimiinoh sachou,’ ta ansonna amuntal khanna amahta, ‘Akring Ringpu vaa asa eio,’ tih a kiongtuei.”

²⁷Mahche Isaiah in Israel rella ongsa, “Israel asa ei in tuiiboomna sitsaichah tam seilakho, ankaar a anmahkhopta kakaltuei;

²⁸alamva Akpu in thaleichunga amlunghaangna che antha achenathlou veia ampaang usa.”

²⁹Chuche Isaiah in matsah a ason khananga, “Akpu inta atute tam inimahnoh lehva, inih in Sodom nangjim vei ume, che Komorah soh intrim usame.”

³⁰Chunna inih in jangison umangme? Akchimlamseh phahnatu akthrulhnoh Jental jatih in akchimlamsehta anphahpei, chuta malot apaalla anphahning;

³¹chuta akchimlamseh veinatu trongsuura anbei Israel in trongsuurta amithlung inkho phahnoh ei.

³²Jarelname? Alamva anmah in akchimlamsehta malot apaalla thrulhnoh ei, chuta anmah in akchimlamsehta phah i thlou itloh apaalla iphahtuta anmidon. Anmah in lungkhanna ankeh amisuihpei,

³³mah i nga tloh a injih khanangsa, “Anve, keiin Jaion na lungkhat kilin, mah khanna miikeh amisuihtu. Mah lungpii khata amlot mii in injak phahnohtu.”