Read Tarao Naga 1 KORINTHIA 1 Bible Online

1 KORINTHIA 1 - Tarao Naga bible

1 KORINTHIA 1

¹Jisu Khrista vaa raangroi veinatu Ringpu in amdon nujuih a aong, Paul mahche iuhnao Sosthenes.

²Korinthia ah am Ringpu vaa khakla ah Jisu Khrista in amseeng miiei, inih Akpu Jisu Khrista akminga amunnaamte nata aong amah tukho inihtukho Akpu:

³Inih Pa Ringpu khatkho Akpu Jisu Khrista tinga malungsi che leh oi nankuunga am veiso.

⁴Nannih turella lai amrel Ringpu ta kampaak alamva Jisu Khrista apaalla Ringpu malungsita nanimlan relna,

⁵mah chuvah bilam trongla mahche khiial anaamtesoh nannihta nanimdoonpei —

⁶Khrista tingna ringtukna thamin in nannihta nanimchetpei.

⁷Alamchunna inih Akpu Jisu Khrista amdangta nanngaaklai litu vei kutthol jakhatkho vaatnohchou;

⁸inih Akpu Jisu Khrista aknia nanchimnoh amnohnatu amah in nannihta achena phah a chet a nanisihtu.

⁹Amah Asa kupa Akpu Jisu Khrista soh paaljounatu inihta iniong Ringpu vah malot ajakhame.

¹⁰Akpu Jisu Khrista minga kisonchou mah chuvah nannaam injajouva nankaar a inthrek baak amnohnatu, chuta ril intrim mahche pichaartloh ah rilkhat nanveinatu kinoolchou.

¹¹Alamva nankaar a innah insuul amchouta Klois amiiei in keikuunga kantongang.

¹²Kisonnava khatleh khat in, “Keiva Paul amiisang,” nohle “Keiva Apollos amiisang,” nohle “Keiva Kephas amiisang,” nohle “Keiva Khrista amiisang,” ta nanson.

¹³Khrista vah inthrek inbaaksame? Paul ta nanngut a thingkharh ah amithlu peime? Nohle nannih in Paul minga inlup sachoume?

¹⁴Keiin Ringpu ta kampaaknava Krispas leh Kaias noh a tukatkho lupnoh ang;

¹⁵chunohleva keiminga inlup mii in ansontu.

¹⁶(Stephanas innsuung khopta kilupning. Anmahnoh a tututa kilupme intheihnoh sang.)

¹⁷Alamva keita malupnatu Khrista in kamthlahnoh chuta akthratrong raannatu kamthlah ang, akthratrongta theihsinga khatkho lousingsoh raannatu kamthlahnoh, chunangleva Khrista vaa thingkharh atuuikha jakhatkho veinohtu.

¹⁸Alamva akmaang mii turel thingkharh trongi kmongsa, chuta inkal akphah inih turelva Ringpu atuuisa.

¹⁹Mah i nga tloh a injihsa, “Aksingei anlousingta keiin kammaangtu, antheih singta sul kamveitu.”

²⁰Aksingmii ram amseime? Ringjih lulok ram amseime? Mah chup in trong insin aktheih ram amseime? Tukleiram miivaa lousing Ringpu in ammaang nohme?

²¹Alamva tukleiramna mii in Ringpu alousingah ringeita Ringpu ta rom cheknoh ei. Akthratrongta kmong inih in iraan apaalla amlot miita ikalli Ringpu in apelna.

²²Alamva Judi in daang annih, mahche Kriik in lousing anjon,

²³chuta inihva thingkharh ah amithlu Khrista ta iraan, Judi ei turelva keh masuihna che Jental ei turelva kmongna,

²⁴chuta amah in aongche mii Judi leh Kriik ankuungva Khrista i Ringpu atuui mahche Ringpu alousingsa.

²⁵Alamva Ringpu in kmong avei in mii in ralla singsei, Ringpu in marnop avei in mii in ralla trangei.

²⁶Alamva unaoeio, amah in naniongkha minna madonve, tukleiramma iringna chaan nujuih a aksingmii tamnoh, tuuia am mii tamnoh, akliin mii tamnoh,

²⁷chuta aksing eita injak amphahnatu tukleiramna kmong eita Ringpu in achar, aktrang eita amjaknatu tukleiramna marnop eita Ringpu in achar,

²⁸amuveipot eita jakhatkho amveinoh natu Ringpu in tukleiramma intooltaang che mii in jakhatnoh a amidon marnop eita achar,

²⁹ohchunna tukhat inkho Ringpu maikuunga thoiphunoh.

³⁰Khrista Jisu kuunga mah i nannih nanchaan anthruhnasa, mahkuunga Ringpu lousing, akchim lamsehchu, inimseengna mahche inithlokna Akpu veisa;

³¹alamchunna nga tloh a injihsa, “In orh mii in Akpu turel in orhso.”