Read Tarao Naga 1 KORINTHIA 10 Bible Online

1 KORINTHIA 10 - Tarao Naga bible

1 KORINTHIA 10

¹Unaoeio, mah i nannihta kamromjachou, mah chuvah ipa ipuin sumphai athuuia amma, tuiiboomta anvan,

²annaamte Moses kuunga sumphaia mahche tuiiboomma inphuumsei,

³mahche annaamte intrim litu vei saakphu ansaakjou,

⁴che litu vei tuii anmah in an iin. Alamva anmah annuta akjuih litu vei lungpiinata anmah in tuii an iin, che lungpii khava Khrista sa.

⁵Chuta anmah aktam ankuunga Ringpu in pelnohsa, chunna anmahta raaprilla inthekvorh amsuuk ei.

⁶Pekva anmah in thranoh anditnanga inih in thranoh ikdiknoh natu mah anaamte i inihturel inichaakna veisa.

⁷Anmah arouin leilita mathruun anvei nanga nannihva veinohve; mah i injihsa, “Anmah in ansaaknatu mahche an iinnatu inboksei, mahche roomthok a anlaamnatu inthousei.

⁸Anmah arouin kumei kupa ah chimnoh lamma ansehnanga inihvah kumei kupa ah inlaalnohrei, che nikhatrua mii akpul sopnihlei inthum intolh a thisei.

⁹Anmah mii arouin Akputa chaang an annanga, inih invah Akputa chaang annohrei;

¹⁰nohle anmah mii arouin antlohnanga nannihva insonnohve che akmaang mii in anmahta amimaangpei.

¹¹Ipekva anmahta chaakna turella mah naamte i suuksa, chuta inihta inimtheihnatu mah i injihsa, achena chupkha inihting thlengsa.

¹²Chunna ngir angta amdon mii khanna anriilnoh natu cheksilso.

¹³Mii in iringna ah anonotu vei madoi khanoh a aktleitlei madoina nantakchunga suuknohmang. Ringpu vah malot aja, che nannih in douchek a nanlii ahanralnatu, nannihta madoi tinga nanithlaaknoh natu athing, mahche madoi khannata nannih in dou nancheknatu insenga nanmahnatu lamkhat amah in amchaangtu.

¹⁴“Alamchunna kirilvol unaoeio, leili mathruunnata mahve.

¹⁵Keiin aksing ankuunga kiromnanga kisonchou, keiin kisonchou i nanroua pichaar intlohve.

¹⁶Inih in imlan doiva chapla i Khrista athii achuum ijajoupei! Inih in tol ikhoih Khrista aruungta ijajou nohme?

¹⁷Alamva tol inkhatning inih in miitam melakho ruungva khalekning inih naamtein tol inkhatta isaakjou.

¹⁸Israel eita madonve; inthiimna poot ansaakha thiilkuunga chuum anjajou nohme?

¹⁹Chuleva keiin kison i jangme? Mah chuvah leili kuunga ankatpootchu jangvei ume?

²⁰Rappu ramnai amthruunei in ankatkha Ringpu ting katnoh ei, chuta rappu ramnaiting ankat. Nannih in rappu ramnaita nanpai namivei keiin dinoh ang.

²¹Nannih in Akpu chaplanata che rappu ramnaivaa chaplanata iincheknoh choume? Nannih in Akpu vaa tebor mahche rappu ramnaiva tebor annihnata sajou cheknoh uchou.

²²Inih in Akpu ta mii kallakna maveireime? Ohchunanga inih in trangmeme?

²³“Bilam naamte trongsuur vei” chuta bilam naamte kananoh, “Bilam naamte trogsuur vei,” chuta bilam naamte inseemnanoh.

²⁴Tukhat inkho akroutukhop rella athratna jonnohso, chuta amah aringpimii turelkho athratna tlohso.

²⁵Stak anjurhna ah stak eita seeng seengnoh nirilla ruinoh a saaro.

²⁶Alamva “Thalei mahche asuunga am naamte Akpu ata.”

²⁷Akpu malotnoh mii khat inta buh saakjou natu nak onga sehtung madonchele, nansaaknatu nanmaikunga andoonkha thra thranoh nirilla inruinoh a saaro.

²⁸(Chuta tukhat in nannihta nanison aja, “Mah i rappu ramnaia ankatchepei.” Nga tloh a mah kharella nankuunga nanisonmii rella che chim chimnoh nanromrella mahkha saanohve.

²⁹Mah kisonni nannih turelanoh chuta chim cimnoh ril akdoon mii turella mahkha sonnohve.) Alamva kei kiningtam rella mii in kamirel tupot angme?

³⁰Keiinta mapaaksoh inruuia saa angle, keirella jarella thranoh a trongeime?

³¹Churella nannih in sachoulako nohle iinchoulakho, nannih in nantloh nankhal bilam naamtekha Ringpu paarthratnatu tloh khalve.

³²Judi tingkho, Kriik tingkho mahche Ringpu tingkho, tukhat tingkho, thranoh mathlaaknatu tlohnohve.

³³Kei turelvah reipakthra majonnoh ang chuta bilam mii naamteta mapelnatu insuullang, mah chuvah miinaam in inkal anphahnatu.