Read Tarao Naga 1 KORINTHIA 11 Bible Online

1 KORINTHIA 11 - Tarao Naga bible

1 KORINTHIA 11

¹Keiin Khrista ahoong kamjuih nanga nannih inkho kei kihoongta majuihve.

²Bilamma nannih in keita intheihchou che keiin nannihta kamtheih choukha nannih in ngaak a nansehnatu rella keiin nannihta kampaakchou.

³Chuta nannih in rom kikditva kupatu akangva Khrista, kumeitu akangva amsal, mahche Khrista tu akangva Ringpu.

⁴Tunangkhat kupa in akang makhumma ngen nohle Ringpu trongta trongle amah akangta injahnohsa.

⁵Chuta tukhat kumei in amah akang makhumnoh a ngen nohle trong phoongle amah akangta injahnohsa, akang matusoh intrimsa.

⁶Alamva kumei khat in akang makhumnohle, amah in asam chehso, chuta kumei inta asam chehnohle, amah akang matuta injakna veile amah in akang makhumso.

⁷Alamva kupava Ringpu vaa paarthra khatkho aniim taningva akang makhumnohso; chuta kumeiva kupa vaa paarthrasa.

⁸(Alamva kupa i kumeinata seemnoh, chuta kumeiva kupanata vei.

⁹Kupa i kumei turella seemnoh, chuta kumei i kupa turella aseem.)

¹⁰Mah chuvah ringroi in alamveia kumei in anchunga inkhat ammangta injahna daang veia akang makhumso.

¹¹(Chuta Akpu ningva kumei in kupa jaonoh a ring janoh, che kupa in kumei jaonoh a ring janoh),

¹²alamva kupanata kumei aseemnanga pekva kumeinata kupa apok. Bilam Ringpu tingnata veiseengning.

¹³Nanroua pichaar intlohve, kumei in akang makhumnoh a ngen i tlohphunoh;

¹⁴Kupakhat in asam seile, atak anrouva chop aphah i mahousa louamnoh inkho inimtheih,

¹⁵chuta kumei khat in asam seile mahkha atak an orh nanohme? Alamva asamseikha amah akangta makhumnatu veia amlanpei.

¹⁶Tukhat in huuinanoh, nohle Ringpu vaa khakla inkho huuinanoh tih i inih in irom.

¹⁷Chuta nannihta kamthieh nachou nanimpaak noh ang, alamva nannih in thlengjoua inboomjou chou i athratna veinoh chuta ralla athratnohna vei,

¹⁸alamva matsahremma khakla veia nanboomlai, nankaar a inthrek baak suuk chouta kitheih; mahchu steva kamlot,

¹⁹Alamva nannih nankaara akchim akseeng romna turella inthrek baak suukchou.

²⁰Nannih in nanchunlai Akpu buhdoon saaknatu inchunnohchou.

²¹Alamva nannih in nansaaklai aktlei akthlengnohta ngaaknoh a nanta nantata nansaak tukhatva matsah a heitraamsei che aktlei in inruisei.

²²Jarelname? Nansaak nan iinnatu inn amnoh choume? Chunoh a Ringpu khakla ta usitnoh choume, mahche akdoonnohta namijak name? Keiin nannihta jangkitih uchoume? Mahchunoh keiin tlohnohtung.

²³ Alamva keiin Akpu ningnata kphahta, nannih nankuunga kamlanchou, Akpu Jisuta anjurhni khulouh a tolta alohpei,

²⁴che amah in ampaaknua tolta akhoihche, “Mah i nannih turella kei kiruungsa. Keita nantheihnatu mah i tlohve.”

²⁵Mahchunanga ampaakche chaplata loua ason, “Mah chapla i kei kithiina akthar trongirhnasa. Mah i nannih in nantheihnatu tlohve.

²⁶Alamva nannih in nansaakrel khatkho amah chapla ita nan iinrel Akpu anlengnohmiil Akpu thikha nannih in raanve.”

²⁷Alamchunna tukhat in tolta saa nohle Akpu vaa chaplata matik chanoh hoonga iinle amahva Akpu mahche thii ah amaraal amsa.

²⁸Mii khat in atak kminna in anso, che tolkha saaso mahche chaplakha iinso.

²⁹Alamva tukhat in mah i jarella ruung in isaak i iinme tihta romnoh a saa iinleva, akroua pichaar intlohnoh a asaak a iinpei.

³⁰Mairella nankaar a mii khalmo marnopsei, che knasei mahche arouin thisei.

³¹Chuta inih itak inta chimma pichaar intlohmele, inihta pichaar initlohnoh usa.

³²Chuta Akpu in pichaar initlohlai tukleiramna miisoh inruuia chimnohting inimthlaknoh natu Akpu in inichaak.

³³Chunna unaoeio, nannih in nansaaknatu pulla nanboklai, khatleh khat inngaakve —

³⁴nannih in nanboomlai mii in nanimlaalnoh natu, tukhat in traamle amah a inna saaso che aktlei relnava keiin kithlenglai kamtheih umangchou.