Read Tarao Naga 1 KORINTHIA 12 Bible Online

1 KORINTHIA 12 - Tarao Naga bible

1 KORINTHIA 12

¹Unaoeio, pek Li tu vei kutthol nanromnoh i dinoh angchou.

²Nannih in nanrom mah chuvah atrong suuknoh rappu ramnai amthruun veia nan amlai, atrong suuknoh leili kuunga inhea naniching.

³Alamchunna keiin nannihta kamromjachou, mah chuvah Ringpu vaa Li apaalla tukhat inkho “Jisu in phool phahso” tihnoh, che tukhat inkho “Jisu i Akpu” tihcheknoh ei, Li Akseeng khopning.

⁴Pekva ajeje kutthol am chuta Li vah intrim,

⁵che ajeje routlohna ahoong am, chuta Akpuva intrim,

⁶che ajeje athloulam tam am, chuta mii naamteta thlou amtloh Ringpu vah khalekning.

⁷Miinaam turella akthra veinatu Li vaa athlouta mamuh i mii naamte kuunga amlanpei.

⁸Mii khat kuunga intrim li aknujuih a lousing mahche aktleitinga khiialtrong,

⁹aktleitinga intrim Li ah malot, aktleitinga Li khat ah mathratna kutthol,

¹⁰aktlei khattinga salungkhouna thlou tlohnatu, aktlei miitinga trong phoongnatu, aktlei miitinga Li anthliin threknatu, aktlei miiting ajeje aktleitrong trongnatu, aktlei trongta malengnatu.

¹¹Mah naamte i Li khat in intrimma thlou atloh, amah in amdon nujuih a mii khat khatting kutthol amlanpei.

¹²Alamva ruung inkhatna akholva tam am, ruung khat in akhol tam slakho ruung inkhat nangjimma Khrista kho vei.

¹³Alamva inih in Judi mii vei samelakho, Kriik mii vei samelakho, naichi mii vei samelakho, thlaang thlaang mii vei samelakho, inaamte Li khatvaa apaalla ruung inkhat athlanga inlupsame; mahche inaamte Li khat ah inim iinpei.

¹⁴Alamva ruungvah akhol inkat, chuta akhol tam in aseem.

¹⁵Alamva “Keiva kutnoh ang, keiva ruungvaa akholnoh angta akeh in sonleva amah aruungva akholnata inleusame.”

¹⁶“Alamva keiva mitnoh ang, keiva ruungvaa akholnoh angta makuur in sonleva, amahva akholnata inleusme.”

¹⁷Ruung apumte mit veile, ramma irungeih usa? Ruung pumte makuur veile, ramma imhok usa?

¹⁸Chuta oinanga Ringpu in ruungvaa akholkhat khatta amah in achar nujuih a aseempei.

¹⁹Akhol naamtein akhol khatru veileva, ruungva ram am usa?

²⁰Tak a oinang akholva tam am, chuta khalekning.

²¹Chunna mit in kut ah “Nangva keitinga darkaar amnohche” ta son cheknohtu, khatla kang in kehta “Nangva keitinga darkaar amnohche” ta son cheknohtu.

²²Inthleng throlla marnop nanga imuh ruungva akholta threk janoh.

²³Inih in injah a imdon ruungvaa akholleita ralladom injahme, mahche klukanga imdonnoh ruungvaa akholleita ralladom imthrat.

²⁴Klukanga imdon akhollei turella mathrat i darkaarnoh. Chuta Ringpu in ruungvaa akholleita khlek veia aseem mahche amuh veinoh tih a imdon ruungta thloia imdonpei,

²⁵chunna ruung asuuunga inthrek amnohnatu chuta ruungvaa akhol in khat inkhat turella amdon.

²⁶Akhol inkhat inta klahle akhol naamte klahjouei; akhol khatleh khatta injajou eile annaamte roomthok jouei.

²⁷Pekva nannihva Khrista vaa aruung sachou mahche khatleh khat in ruungvaa akhol sachou.

²⁸Ringpu in khakla suunga raangroi ta matsah a thlou athunei, innih tihpia ringraan eita, inthum tihpia lulok eita atthunei, chuche salungkhouna thlou aktloh eita chela kna ksa mathratnatu kutthol amlanei, akchingei mahchuche trong ajeje trongnatu thlou athunei.

²⁹Annaamte raangroi seime? Annaamte ringraan seime? Annaamte lulok seime? Annaamte salungkhouna thloutloh seime?

³⁰Annaamte kna ksa mathratnatu kutthol amseime? Annaamte aktleitrong trongseime? Annaamte trong amlengseime?

³¹Chuta kliin kuttholta nanril malut a diveh. Mahche keiin nankuunga akral akthloirem lam kamtheih uchou.