Read Tarao Naga 1 KORINTHIA 13 Bible Online

1 KORINTHIA 13 - Tarao Naga bible

1 KORINTHIA 13

¹Keiin tukleiramna miitrong mahche raangroi antrongta trong sanglakho, chuta kitak a mii rilvol amnoh angle, keiva anring daar nohle kanta anring khanangsang.

²Mahche keiin ringraanei antuui amsanglakho, anthuptrong rom sanglakho, mahche khiial naamte amsanglakho, che muulpii eita malennatu kitak apumtea malot sanglakho, chuta kei kitak a mii rilvol amnoh angleva keiva jakhat khonohsang.

³Keiin kamdon naamte malan sanglakho, kiruungta meia haalnatu malan sanglakho; keiinta mii rilvol amnoh angle, mah i keiin kichuungna jakhatkho amnoh.

⁴Rilvol in adoutrang, che rilvol in khallak amnoh nohle in orh amnoh,

⁵rilvol in thranoh hoonga sehnoh; rilvol in akrou turella suulnoh, rilvol in miisoh injanoh tlohnoh, chimnoh tlohnoh, rilvol in intha malunghaang amno, rilvol in thranoh madonnoh,

⁶rilvol in chimnoh thlou a aroomthok hangnoh chuta akchim thloua aroomthok.

⁷Rilvol in pootrik naamte aroon, anaam amlot, annam amtuur che anaamtea adou.

⁸Rilvol in ache amnoh, trongphoongkho kham umang; aktleitrong trongkho dong umang, khiial amslakho maang umang.

⁹Alamva inih khiialva mapung phanoh, che inih trongphoongkho mapung phanoh.

¹⁰Chuta mapung phakha athlengin mapung akphanohkha maangusa.

¹¹Keiin nao kiveilai nao nanga trongang, nao nanga kamdon, nao nanga kirilla suuk; keiin kanrol invah naohoongkha kamthlahpei.

¹²Alamva ipek inih in inthimrip a pitjanga imuhnanga, chuta imaile imai inmuh umangme. Ipek keiin akirruta kromning; chuta keita apumtea keiromnanga aknu avah keiinkho apumte krom umang.

¹³Chunna malot, matuur, rilvol inthum i incheknoh a amjouei, chuta ankaar a anrolremva rilvol isa.