Read Tarao Naga 1 KORINTHIA 15 Bible Online

1 KORINTHIA 15 - Tarao Naga bible

1 KORINTHIA 15

¹Unaoeio, nannih in nantheihnatu pek keiin kisonchou, mah chuvah nankuunga akthratrong kiraankha phahkho nanphahpei che mah trongkhanna ngrisachou,

²mah trongkhan nannihkho inkalsachou, mahkhata chet a matuhchoule mah khanna inkal nanphahpei, chunohleva sulla namilotpei.

³Alamva keikho kaphahcheta matsahna amuveita nankuunga kamlanpeichou, mah chuvah ringjih nujuih a inih ileh rella Khrista in thisa,

⁴amahta anphuumpei mahche ringjih nujuih a nithum tihpia ringsa.

⁵Keipha chuche somlei innih ankuunga amah in atakta ammuh ei.

⁶Mahchuche unao reijalei ranga akralchunga veikhat ah ammuh ei, anmah ankaar a mii aktamva pekphah ringmangei, chuta arouva insei.

⁷Mahchuche Jems kho ammuhpei, che raangroi naamteta ammuh ei.

⁸Mah naamte i aknua thla tangnoh a akpok keikho kammuh ang.

⁹Alamva keiva raangroi ankaar a keiin aksiinrem veisang, alamva keiin Ringpu vaa khakla ta kikchut relna keita raangroi ta ongi matik chanoh sang.

¹⁰Chuta keiin ipek kiringi Ringpu amlungsi in ringsang, keikuunga amlan amahvaa malungsi i sulnoh: mahchusoh inthlenga annaamte chunga keiin thloia thlou kitloh mahchu keinoh ang, chuta keisoh inruuijou Ringpu amlungsi in atloh akhalning.

¹¹Mah i kei sanglakho che anmah seilakho, kannih in kanraan, chuche nannih in namilotpei.

¹²Khrista in thinata veikhat ringsa ta pek amahta raanmele, nankaarna arouin thinata veikhat ring amnohta khatloh a nansonchekme.

¹³Chuta akthi inta veikhat ringnoh seileva Khrista inkho veikhat ringnohsa khame.

¹⁴Khrista in veikhat ringnoh saleva, inih in iraankho sul veisa, nannih in namilotkho sul veisa.

¹⁵Alamva Ringpu in Khrista ta veikhat amringpei ta amahrella isonpei, chuta Ringpu in Khrista ta veikhat maringnoh saleva akthi eikho maringnohsa.

¹⁶Alamva akthi eiin ringnoh seileva, Khrista kho ringnohsa.

¹⁷Khrista ta maringnoh saleva nannih in namilotkho sulsa nannih ipekphah nanleh ah ammangchou.

¹⁸Mah chuvah Khrista ah ak in anmahkho maangsei.

¹⁹Alamva inih in iringlaikhoptu veia Khrista ta matuur meleva, inih in mii naamte chunga aklahrem suunga amsame.

²⁰Chuta pekva tak a Khrista in veikhat ring taningva, inna ak am ankaar a matsahrem akrah veisame.

²¹Alamva mii khat apaalla kthi thlengsa, che mii khat apaal akho thinata veikhat kiringkho thlengsa.

²²Alamva Adam a mii naamte thisei, mahchunanga mii naamte Khrista ting inimringpei.

²³Chuta miirel in amah amahtu lai veitu: Khrista in matsahremtu akrah veisa, mahche aknua amah in athlenglai Khrista vaa ata vei tuei.

²⁴Mahchuche rampuui eita, aktloh akhaleita che tuui ak am naamteta ammaangche aknua kurung huunna Apa Ringpu kuunga amlanche achenachu thlengtu.

²⁵Alamva amahta jekna mii naamteta amah akehthuia asihnohmiil anchunga amah in paaltu.

²⁶Achenaremma amah in ammaangsam jeknachuva kthi khasa.

²⁷“Alamva Ringpu in bilam amah akehthui asihpei.”

²⁸Bilam amah athlanga asih eiche, bilamta amah athlanga aksih Ringpu in bilam chunga akthloirem maveinatu amah Asa kupa luungkho amah athlanga asih veitu.

²⁹Chunohleva akthi eita aklup mii in jangantih ume? Akthi mii inta ringnoh seileva akthiei anngut ah jarella anmah in inlupseime?

³⁰Jarella pungrel thihnaringna kphah mangme?

³¹Unaoeio, inihtu Akpu Jisu Khrista kuuga keiin ammangta nankuunga in orh angi keiin indanglonga kan orh relna keithingang.

³²Ephesia ah rapril sasoh kannaak in miihoong veia ktrongin keitu kichuunga jangamme? Akthi in ringnoh seileva, “Inih in saarei iinrei, alamva inih in tungva thiume.”

³³Nannih in insimnanohve: “Thranoh miisoh inruui in akthra hoongta ammang.”

³⁴Akchimril khanna inlengve mahche aleh tlohnohve. Alamva mii arouva Ringpu vaa khiial amnoh ei. Nannih in injak nanphahnoh natu maita kisonchou.

³⁵Chuta mii arou invah anruitu, “Akthi mii in khatloh a ringume? Anmah in jaknanga ruung veia thleng tueime?”

³⁶Kmong miio! Nangin nivorh chikha thinoh avah mah in ringnohtu!

³⁷Mahche nangin chi nivorhlai akmoongcheta vornohche, chikhopta nivorhning, mahchu kehu nohle aktleichi veikho aja.

³⁸Chuta Ringpu in akdit nujuih a chikha amah amahtu ajanatu amlanpei, che amah amahtu chi nujuih akmoong.

³⁹Alamva atakchi anaam intrimnoh, chuta miitakchi in alam aje, sa eikho antakchi alamkhat, nga eikho antakchi alam ajeje.

⁴⁰Ringramna ruung akveikho mahche tukleiramna ruung akveikho ammei; chuta ringramtu vei ruungva paarthra inkhat che tukleiramtu vei ruungva paarthra in ajela.

⁴¹Kini kvaar in antle athratna inkhat, che thla kvaar in antle athratna inkhat, mahche arsi kvaar in antle athratna inkhat, alamva arsi khat in avaar antle i aktlei arsi khat avaar antlesoh athrat inthlin.

⁴²Thinata veikhat ringkho oinanga vei. Maangtuphu ah invorhsa, maangnohtu phuting kiringsa.

⁴³Injahphu nohting invorhsa, paarthrating kiringsa. Marnopting invorhsa, tuuiting amringpei.

⁴⁴Aruungting invorhsa, litu vei ruunga kiringsa. Tukleiramtu ruungta amle litu ruungkho am.

⁴⁵Nga tloh a injihsa, “Matsahna mii Adam in akringtu mii hukveisa” juktoolna mii Adam in akring amlan Li hukveisa.

⁴⁶Chuta Li tu akveiva matsahna khanoh, chuta tukleiramtu vei aruungkhare, che aknua Li khasa.

⁴⁷Matsahna miikha thaleinasa, amahva tukleina mii; innih tihpina mii in ringramna.

⁴⁸Philnata aseemnanga, philla aseem amahkho mainangsei; ringramnata veinanga ringramnatu akvei anmahkho mainangsei.

⁴⁹Inih in tukleinata aseem aniim louva poknanga, inih inkho ringramna aniim louva pok ume.

⁵⁰Unaoeio, keiin mah i kisonchou: thiileh ruung in akmaangnoh tupot phah janohtu.

⁵¹Anve! Anthup trongta kisonchou. Inaam innoh ume, chuta inaamte inthleng ume,

⁵²kaksuunga imit rip itlohsuunga juktoolna pik ul atumtu. Alamva pik ul atumtu, akthi eita maang janohting amringtu, mahche inihta inimthlengtu.

⁵³Alamva maang aja i maang janoh ah isilhtu tla, kthi akvei tupot i kthinoh tupot isilhtu tla.

⁵⁴Maang aja i maang janoh ah inthlengche, isilh inna mahche kthi aja i kthi janoh tinga isilh in ringjih in asonkha tlungsa: “Raalchek in akthita amduulpei”

⁵⁵“Akthi nango, nangin raal nichekha khosame? Akthi nango, nang namreikha khosame?”

⁵⁶Akthivaa amreiva alehsa; alehvaa tuuiva trongsuursa.

⁵⁷Chuta inih Akpu Jisu Khrista apaalla raalchek inimlan Ringpu ta mapaakreio.

⁵⁸Alamchunna kirilvol unaoeio, ngat a ngirve, inchekchik tlohnohve, Akpu thlouta nantloh nankhal in sul aveinoh natu romma lai amrel Akpu a thloutloh ah huuitanga tloh khalve.