Read Tarao Naga 1 KORINTHIA 2 Bible Online

1 KORINTHIA 2 - Tarao Naga bible

1 KORINTHIA 2

¹Unaoeio, keiin nankuunga kithlenglai Ringpu rella sakhi kamlankha anneem akthratrongta nohle mii lousingsoh malannatu thlengnoh ang.

²Alamva thingkharh ah amithlu Jisu Khrista khanoh a nankaar a aktlei khatkho nanromnoh natu kiril ngirsang.

³Nannihsoh kiamlai marnop khatkho intria che inchuunna amjoume;

⁴keiin trong akthratrong kiraankha miita mapaakna theihsing trongnoh, chuta akchim Li leh tuuita kamdangchou,

⁵chunna nannih in namilotkha mii lousing khanoh Ringpu vaa tuui aveina.

⁶Mapung akpha ankaar avah inih in lousingta imtheih, chulata pek chup invah lousingnoh, nohle maanga chetupot rampuui anlousing khonoh.

⁷Chuta anruk khatkho anthup Ringpu alousingta inih in imtheih. Mah chup i amaa leithinga Ringpu in inihtu paarthratnatu machaanga alousihpei.

⁸Mah chup in rampuui tukhat inkho maita louromnoh ei; mahchuta lourom eileva paar amthrat Akpu ta anmah in thingkharh a loumathlunoh tupotei.

⁹Chuta mah i injihsa, “Mit in amuhnoh, makuur in atheihnoh, chekho miirilla luutnoh; mah ita arilvol mii turel Ringpu in amchaangpei.”

¹⁰Mah i Ringpu in Li apaalla inihting inimdangpei. Alamva Li in bilamma mahche Ringpu vaa akthuuk rellakho aktlok.

¹¹Alamva miivaa akli khanoh a miikaara tunang in miirilta rom achekume? Mahchunang Ringpu vaa ak Li noh avah tukhat inkho Ringpu in amdon romnoh ei.

¹²Inih in tukleiramna lita phahnohme, chuta Ringpu in kutthol inimlanta rom icheknatu amah Lita iphahpei.

¹³Mah i mii lousingta nanimtheihnoh ung, chuta Li ah kamitheihchou.

¹⁴Anono a am mii in Ringpu vaa Lita loulou cheknoh, alamva mahkha anmah turelva kmongnasa, mahkha lia am mii kuungah akchim Lita kamilengna veia chaang anna taningva anmahta amah in rom cheknoh.

¹⁵Li ah am mii in bilam chim chimnoh pichaar atloh, chuta atakva tukhat inkho pichaar tlohnoh.

¹⁶Alamva “Tunang in Akpu arilta romma amtheihchek ume, chuta inihva Khrista vaa aril amme.”